Ũhoro Mwega Ũrĩa Waandĩkirũo nĩ Johana

14 “Mũtikareke ngoro cianyu itangĩke.+ Onaniai wĩtĩkio harĩ Ngai;+ ningĩ onaniai wĩtĩkio harĩ niĩ. 2 Thĩinĩ wa nyũmba ya Awa kũrĩ ciikaro nyingĩ. Gũtangĩrĩ ũguo, ingĩrĩ kũmwĩra, nĩ gũkorũo ndĩrathiĩ kũhaarĩria handũ nĩ ũndũ wanyu.+ 3 Ningĩ rĩrĩa ngaathiĩ na haarĩrie handũ nĩ ũndũ wanyu, nĩ ngooka rĩngĩ na ndĩmũgĩĩre, nĩguo harĩa ndĩ o na inyuĩ mũkoragwo ho.+ 4 Na kũrĩa ndĩrathiĩ nĩ mũĩ njĩra.”

5 Toma+ akĩmwĩra atĩrĩ: “Mwathani, ithuĩ tũtiũĩ kũrĩa ũrathiĩ. Tũngĩkĩmenya njĩra atĩa?”

6 Jesu akĩmwĩra: “Nĩ niĩ njĩra+ na nĩ niĩ ũhoro ũrĩa wa ma+ na nĩ niĩ muoyo.+ Gũtirĩ mũndũ ũũkaga kũrĩ Awa atagereire harĩ niĩ.+ 7 Korũo nĩ mũnjũĩ, nĩ mũngĩmenyete Awa o nake; kuuma rĩu nĩ mũmũĩ na nĩ mũmuonete.”+

8 Filipu akĩmwĩra: “Mwathani, tuonie Awa, na nĩ tũkũiganĩra.”

9 Nake Jesu akĩmũũria atĩrĩ: “Filipu ndũrĩ ũrakinya kũũmenya o na thutha wa gũkorũo hamwe na inyuĩ ihinda iraya ũguo? Mũndũ o wothe ũnyonete nĩ onete Awa o nake.+ Nĩ kĩĩ gĩagĩtũma ũnjĩre, ‘Tuonie Awa’? 10 Kaĩ ũtetĩkĩtie atĩ ndĩ na ũiguano na Awa na atĩ Awa arĩ na ũiguano na niĩ?+ Maũndũ marĩa ndĩmwĩraga ndiaragia ndĩĩrĩte niĩ mwene,+ ĩndĩ Awa, ũrĩa ũtũũraga arĩ na ũiguano na niĩ nĩwe ũraruta mawĩra make. 11 Njĩtĩkiai ngiuga atĩ ndĩ na ũiguano na Awa nake Awa arĩ na ũiguano na niĩ; okorũo ti ũguo, mũgĩtĩkie tondũ wa maũndũ marĩa njĩkĩte.+ 12 Ngũmwĩra atĩrĩ o ma o ma, mũndũ o wothe wonanagia wĩtĩkio harĩ niĩ o nake nĩ arĩkaga maũndũ marĩa njĩkaga; na nĩ arĩkaga maũndũ manene gũkĩra maya,+ tondũ ndĩrathiĩ kũrĩ Awa.+ 13 Ningĩ ũndũ o wothe mũrĩhoyaga na rĩĩtwa rĩakwa, nĩ ndĩrĩmũhingagĩria, nĩguo Awa agoocithio kũgerera harĩ Mũriũ.+ 14 Mũngĩhoya ũndũ o wothe na rĩĩtwa rĩakwa, nĩ ndĩrĩmũhingagĩria.

15 “Angĩkorũo nĩ mũnyendete, nĩ mũrĩathĩkagĩra maathani makwa.+ 16 Na nĩ ngũhoya Awa na nĩ ekũmũhe mũteithia* ũngĩ akoragwo hamwe na inyuĩ tene na tene,+ 17 roho wa ũhoro ũrĩa wa ma,+ ũrĩa thĩ ĩtangĩamũkĩra tondũ ndĩwonaga na ndĩũmenyaga.+ Inyuĩ nĩ mũĩ roho ũcio tondũ ũkoragwo hamwe na inyuĩ na ũrĩ thĩinĩ wanyu. 18 Ndikũmũtiga mũtariĩ ta ciana cia ndigwa. Nĩ ngũcoka kũrĩ inyuĩ.+ 19 Thutha wa kahinda kanini, thĩ ndĩkanyona rĩngĩ, no inyuĩ nĩ mũkaanyona+ tondũ ndĩ muoyo, na inyuĩ nĩ mũgaatũũra muoyo. 20 Mũthenya ũcio nĩ mũkaamenya atĩ ndĩ na ũiguano na Awa na inyuĩ mũrĩ na ũiguano na niĩ, na niĩ ndĩ na ũiguano na inyuĩ.+ 21 Mũndũ o wothe wĩtĩkagĩra maathani makwa na akamaathĩkĩra, ũcio nĩwe ũnyendete. Nake ũrĩa wothe ũnyendete nĩ arĩendagwo nĩ Awa, na niĩ nĩ ndĩrĩmwendaga na ngeyonithania wega harĩ we.”

22 Nake Judasi,+ no ti ũrĩa Mũisikariota, akĩmũũria atĩrĩ: “Mwathani, kaĩ gũthiĩte atĩa tondũ ũrenda kwĩyonithania wega harĩ ithuĩ no ti harĩ thĩ?”

23 Jesu akĩmũcokeria akĩmwĩra: “Mũndũ o wothe angĩkorũo nĩ anyendete, nĩ arĩathĩkagĩra kiugo gĩakwa,+ nake Awa nĩ ekũmwenda, na nĩ tũgũka harĩ we na tũikaranie nake.+ 24 Ũrĩa wothe ũtanyendete ndathĩkagĩra ciugo ciakwa. Kiugo kĩrĩa mũraigua ti gĩakwa, ĩndĩ nĩ kĩa Awa ũrĩa wandũmire.+

25 “Ndĩmwĩrĩte maũndũ macio hĩndĩ ĩno ngoretwo hamwe na inyuĩ. 26 No mũteithia, roho mũtheru, ũrĩa Awa agaatũma na rĩĩtwa rĩakwa, nĩ ũkaamũruta maũndũ mothe na ũmũririkanie maũndũ mothe marĩa ndĩmwĩrĩte.+ 27 Ndamũtigĩra thayũ; ndamũhe thayũ wakwa.+ Ndinamũhe thayũ na njĩra ta ĩrĩa thĩ ĩũheanaga. Mũtikareke ngoro cianyu itangĩke o na kana itoorio nĩ guoya. 28 Nĩ mwaigua atĩ ndamwĩra, ‘nĩ gũthiĩ ngũthiĩ na nĩ ngũcoka kũrĩ inyuĩ.’ Mũngĩnyendete, nĩ mũngĩakena tondũ ndathiĩ kũrĩ Awa, nĩ gũkorũo Awa nĩ mũnene kũrĩ niĩ.+ 29 Ndamwĩra ũndũ ũcio ũtanekĩka nĩguo hĩndĩ ĩrĩa ũgeekĩka mũgeetĩkia.+ 30 Ndikwaria na inyuĩ rĩngĩ maũndũ maingĩ, nĩ gũkorũo mũnene wa thĩ ĩno+ nĩ aroka, na ũcio ndarĩ na hinya igũrũ rĩakwa.+ 31 No nĩguo thĩ ĩmenye atĩ nĩ nyendete Awa, ndĩreka o ũrĩa Awa anjathĩte njĩke.+ Ũkĩrai, rekei tuume haha.