Ũhoro Mwega Ũrĩa Waandĩkirũo nĩ Mathayo
16 Na rĩrĩ, Afarisai na Asadukai magĩũka harĩ Jesu nĩguo mamũgerie, makĩmwĩra amonie kĩmenyithia kiumĩte igũrũ.+ 2 Nake akĩmacokeria ũũ: “Rĩrĩa gwakinya hwaĩ-inĩ muugaga atĩrĩ, ‘Gũgũkorũo na rĩera rĩega, tondũ igũrũ nĩ itune,’ 3 na rũcinĩ mũkoiga atĩrĩ, ‘Ũmũthĩ gũgũkorũo na heho na mbura, tondũ igũrũ nĩ itune ĩndĩ kũrĩ na matu.’ Nĩ mũhotaga gũtaarĩria ũrĩa rĩera rĩgũkorũo rĩhaana, no mũtihotaga gũkũũrana imenyithia cia mahinda. 4 Rũciaro rũru na rũtharia* rwendaga kuona kĩmenyithia, no gũtirĩ kĩmenyithia rũkuonio+ o tiga kĩmenyithia kĩrĩa kĩa Jona.”+ Agĩcoka agĩthiĩ akĩmatiga.
5 Na rĩrĩ, arutwo makĩringa mũrĩmo ũcio ũngĩ no makĩriganĩrũo nĩ gũkuua mĩgate.+ 6 Jesu akĩmeera ũũ: “Ikaragai mũhingũrĩtie maitho manyu, na mwĩmenyagĩrĩre ndawa ya kũimbia ya Afarisai na Asadukai.”+ 7 Nĩ ũndũ ũcio, makĩambĩrĩria kwĩrana atĩrĩ: “Tũtinakuua mũgate o na ũmwe.” 8 Jesu amenya ũguo, akĩmoria ũũ: “Nĩ kĩĩ kĩratũma mwĩrane atĩ mũtirĩ na mĩgate, inyuĩ mũrĩ na wĩtĩkio mũnini? 9 Kaĩ mũtarĩ mũrataũkĩrũo, kana mũtiraririkana mĩgate ĩrĩa ĩtano yarĩirũo nĩ andũ arĩa 5,000 na ikabu iria ciothe muonganirie yatigara?+ 10 Kana mĩgate ĩrĩa mũgwanja yarĩirũo nĩ arĩa 4,000 na ikabu* iria ciothe nene muonganirie yatigara?+ 11 Nĩ kĩĩ kĩragiria mũtaũkĩrũo atĩ ndiraria ũhoro wa mĩgate? Mwĩmenyererei ndawa ya kũimbia ya Afarisai na Asadukai.”+ 12 Hĩndĩ ĩyo magĩtaũkĩrũo atĩ ooigaga memenyerere ũrutani wa Afarisai na Asadukai, no ti ndawa ya kũimbia mĩgate.
13 Rĩrĩa Jesu aathiire gĩcigo-inĩ gĩa Kaisarea Filipi, akĩũria arutwo ake atĩrĩ: “Andũ moigaga Mũrũ wa mũndũ nũũ?”+ 14 Makĩmwĩra: “Amwe moigaga nĩ Johana Mũbatithania,+ angĩ Elija,+ na angĩ Jeremia kana ũmwe wa anabii.” 15 Nake akĩmoria atĩrĩ: “Ĩ inyuĩ na inyuĩ-rĩ, muugaga ndĩ ũ?” 16 Simoni Petero agĩcokia: “Wee nĩwe Kristo,+ Mũrũ wa Ngai ũrĩa ũtũũraga muoyo.”+ 17 Nake Jesu akĩmwĩra: “Gũkena-rĩ, nĩwe Simoni mũrũ wa Jona, tondũ ti mũndũ ũrĩ na mwĩrĩ wa nyama na thakame ũkũguũrĩirie ũndũ ũcio, no nĩ Awa ũrĩa ũrĩ igũrũ.+ 18 Ningĩ ngũkwĩra atĩrĩ: Wee nĩwe Petero,+ na igũrũ rĩa rwaro rũrũ rwa ihiga,+ nĩ ngaaka kĩũngano gĩakwa, na ihingo cia Mbĩrĩra* itigagĩtooria. 19 Nĩ ngaakũhe cabi cia Ũthamaki wa igũrũ, na kĩrĩa gĩothe ũkooha gũkũ thĩ gĩgaakorũo kĩrĩ kĩohe kũrĩa igũrũ, na kĩrĩa gĩothe ũkoohora gũkũ thĩ, gĩgaakorũo kĩrĩ kĩohore kũrĩa igũrũ.” 20 Agĩcoka akĩhe arutwo ake mũkaana mũrũmu matikeere mũndũ o na ũrĩkũ atĩ nĩwe Kristo.+
21 Kuuma hĩndĩ ĩyo, Jesu akĩambĩrĩria gũtaarĩria arutwo ake atĩ no mũhaka athiĩ Jerusalemu na anyamario mũno nĩ athuri, anene a athĩnjĩri-Ngai, na andĩki-watho, na oragwo, na ariũkio mũthenya wa gatatũ.+ 22 Nake Petero aigua ũguo akĩmũtwara keheri-inĩ akĩambĩrĩria kũmũkaania, akĩmwĩra ũũ: “Mwathani, wĩiguĩre tha; maũndũ macio gũtirĩ hĩndĩ magaagũkora.”+ 23 No Jesu akĩgarũrũka akĩra Petero ũũ: “Coka thutha wakwa, Shaitani! Wee ũrĩ mũhĩnga harĩ niĩ, nĩ ũndũ ndũreciria meciria ma Ngai, ĩndĩ ũreciria meciria ma andũ.”+
24 Jesu agĩcoka akĩra arutwo ake ũũ: “Mũndũ o wothe angĩenda kũnũmĩrĩra, nĩ erege na oe mũtĩ wake wa kũnyarirĩrũo* na anũmagĩrĩre.+ 25 Nĩ gũkorũo mũndũ o wothe wendaga kũhonokia muoyo wake nĩ akoorũo nĩguo, no mũndũ o wothe ũkũrũo nĩ muoyo wake nĩ ũndũ wakwa nĩ akaawona.+ 26 Nĩ ũndũ-rĩ, mũndũ angĩgunĩka atĩa angĩĩgwatĩra thĩ yothe no orũo nĩ muoyo wake?+ Kana nĩ kĩĩ mũndũ angĩruta nĩguo akũũre muoyo wake nakĩo?+ 27 Tondũ Mũrũ wa mũndũ nĩ agooka na araika ake arĩ na riri wa Ithe, na nĩ akaarĩha o mũndũ kũringana na ciĩko ciake.+ 28 Ngũmwĩra atĩrĩ o ma, nĩ harĩ amwe marũgamĩte haha matagacama gĩkuũ o rĩ nginya mambe mone Mũrũ wa mũndũ agĩũka arĩ Ũthamaki-inĩ wake.”+