Ezekieli

22 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Wee mũrũ wa mũndũ-rĩ, hihi nĩ wĩhaarĩirie kũmenyithania ituĩro harĩ* itũũra rĩu rĩrĩ na mahĩtia ma ũiti wa thakame+ o na kũrĩmenyithia maũndũ ma rĩo mothe marĩa marĩ magigi?+ 3 Ũrĩĩre atĩrĩ, ‘Jehova Mwathani Ũrĩa Mũnene oigĩte ũũ: “Wee itũũra rĩrĩ rĩitithagia thakame+ thĩinĩ warĩo, ihinda rĩaku nĩ rĩroka,+ o wee ũthondekaga mĩhianano ĩrĩ magigi* nĩguo wĩthahie,+ 4 ũiti waku wa thakame nĩ ũtũmĩte ũkorũo na mahĩtia,+ na mĩhianano yaku ĩrĩ magigi ĩgatũma ũkorũo ũtarĩ mũtheru.+ Nĩ ũtũmĩte mũthia wa matukũ maku ũkinye na ihenya, na mũthia wa mĩaka yaku nĩ mũkinyu. Nĩkĩo ngaatũma ũtuĩke kĩndũ gĩa kũnyũrũrio harĩ ndũrĩrĩ na ũtuĩke kĩndũ gĩa gũthekererũo mabũrũri-inĩ mothe.+ 5 Mabũrũri marĩa magũkuhĩrĩirie o na marĩa makũraihĩrĩirie nĩ magaakũnyũrũria,+ o wee ũrĩ na rĩĩtwa rĩtarĩ itheru na ũiyũirũo nĩ ngũĩ. 6 Atĩrĩrĩ, mũtongoria o wothe wa Isiraeli thĩinĩ waku ahũthagĩra ũnene wake gũitithia thakame.+ 7 Thĩinĩ waku andũ nĩ manyararaga maithe na manyina.+ Nĩ mahinyagĩrĩria mũgeni, na makanyamaria mwana ũtarĩ ithe* na mũtumia wa ndigwa.”’”+

8 “‘Nĩ mũnyararaga kũndũ gwakwa kũrĩa gũtheru, na mũgathahia thabatũ ciakwa.+ 9 Thĩinĩ waku kũrĩ na andũ macambanagia makĩenda gũita thakame.+ Thĩinĩ waku andũ nĩ marĩagĩra magongona irĩma-inĩ na mageka mĩtugo ya ũũra-thoni gatagatĩ-inĩ gaku.+ 10 Thĩinĩ waku andũ matiheaga ũrĩrĩ wa maithe mao gĩtĩo,*+ na nĩ makomaga na mũtumia ũtarĩ mũtheru ihinda-inĩ rĩake rĩa mweri.+ 11 Thĩinĩ waku mũndũ ũmwe ekaga maũndũ marĩ magigi na mũtumia wa mũndũ ũngĩ,+ ũngĩ agathahia mũtumia wa mũrũwe na mĩtugo ya ũũra-thoni,+ ũngĩ nake agakoma na mwarĩ wa ithe.+ 12 Thĩinĩ waku andũ nĩ moyaga ihaki nĩguo maite thakame.+ Ũkombanagĩra mbeca nĩguo wĩtie maciaro+ kana wone uumithio, na ũgatunya arĩa mũriganĩtie nao mbeca.+ Ti itherũ nĩ ũriganĩirũo nĩ niĩ biũ,’ ũguo nĩguo Jehova Mwathani Ũrĩa Mũnene oigĩte.

13 “‘Atĩrĩrĩ, nĩ hũũrĩte hĩ nĩ ũndũ wa kũrakario nĩ uumithio ũcio ũtarĩ wa kĩhooto ũgĩĩte naguo na nĩ ũndũ wa ciĩko cia ũiti wa thakame iria irĩ gatagatĩ-inĩ gaku. 14 Hihi ũmĩrĩru waku nĩ ũgeetiiria* na moko maku maikare marĩ o na hinya matukũ-inĩ marĩa ngaakuoera ikinya?+ Niĩ mwene, Jehova, nĩ njarĩtie, na nĩ ngoya ikinya. 15 Nĩ ngaakũhurunja ndũrĩrĩ-inĩ na ngũharaganĩrie mabũrũri-inĩ,+ na nĩ ngaaniina maũndũ macio maku matarĩ matheru.+ 16 Ningĩ nĩ ũgaaconorithio mbere ya ndũrĩrĩ, na nĩ ũkaamenya atĩ niĩ nĩ niĩ Jehova.’”+

17 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 18 “Mũrũ wa mũndũ, harĩ niĩ nyũmba ya Isiraeli ĩtuĩkĩte ta gĩko. Othe nĩ gĩcango, ibati, kĩgera, na ngocorai* irĩ riiko. Matuĩkĩte gĩko kĩrĩa gĩtigaraga betha yatherio.+

19 “Nĩ ũndũ ũcio-rĩ, Jehova Mwathani Ũrĩa Mũnene oigĩte ũũ: ‘Tondũ inyuothe nĩ mũtuĩkĩte o ta gĩko,+ nĩ ngũmũcokanĩrĩria hamwe thĩinĩ wa Jerusalemu. 20 O ta ũrĩa betha, gĩcango, kĩgera, ngocorai,* na ibati icokanagĩrĩrio thĩinĩ wa riiko nĩguo ihuuhĩrĩrio mwaki itweke, noguo ngaamũcokanĩrĩria hamwe ndĩ na marakara o na mathũgũta, na nĩ ngaamũhuuhĩrĩria ndũme mũtweke.+ 21 Ngaamũcokanĩrĩria na ndĩmũhuuhĩrĩrie na mwaki wa mathũgũta makwa,+ na inyuĩ mũtwekio mũrĩ thĩinĩ wa itũũra rĩu.+ 22 O ta ũrĩa betha ĩtwekagio thĩinĩ wa riiko, noguo mũgaatwekio mũrĩ thĩinĩ wa itũũra rĩu; na nĩ mũkaamenya atĩ niĩ mwene, Jehova, nĩ ndĩmũitũrũrĩire mathũgũta makwa.’”

23 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 24 “Mũrũ wa mũndũ, ĩra itũũra rĩu atĩrĩ, ‘Wee ũrĩ bũrũri ũtagaatherio kana uurĩrũo nĩ mbura mũthenya wa marakara. 25 Anabii a rĩo nĩ mabangĩte njama thĩinĩ warĩo,+ o ta mũrũthi ũkũrarama ũgĩtambura kĩrĩa wanyita.+ Nĩ maratambura andũ. Makaiya mĩthithũ na indo ingĩ cia goro. Nĩ matũmĩte atumia aingĩ thĩinĩ warĩo matuĩke a ndigwa. 26 Athĩnjĩri-Ngai a rĩo nĩ magararĩte watho wakwa,+ na nĩ mathahagia kũndũ gwakwa kũrĩa gũtheru.+ Matikũũranaga kĩndũ kĩrĩa gĩtheru na kĩrĩa gĩtarĩ gĩtheru,+ na matimenyithanagia indo iria irĩ thahu na iria itarĩ thahu,+ na nĩ maregaga kũrũmĩrĩra thabatũ ciakwa, na niĩ ngaaga kũheo gĩtĩo gatagatĩ-inĩ kao. 27 Anene a rĩo matariĩ ta njũi igĩtambura kĩrĩa cianyita; maitaga thakame na makoraga andũ* nĩguo magĩe na uumithio ũtarĩ wa kĩhooto.+ 28 No anabii a rĩo nĩ mahakĩte ciĩko ciao coka magacihumbĩra. Monaga cioneki cia maheeni na makaheana ũragũri wa maheeni,+ makoiga atĩrĩ: “Jehova Mwathani Ũrĩa Mũnene oigĩte ũũ,” na hĩndĩ ĩyo Jehova we mwene ndarĩtie. 29 Andũ a bũrũri ũcio nĩ matunyanĩte o na makaiya,+ nĩ mahinyĩrĩirie abatari na athĩni, na magatunya mũgeni na makamũima kĩhooto.’

30 “‘Ndacaragia mũndũ gatagatĩ-inĩ kao ũngĩcokereria rũthingo rwa ihiga kana arũgame mbere yakwa mwanya-inĩ agitĩre bũrũri ũcio nĩguo ndũkaanangwo,+ no ndionire o na ũmwe. 31 Nĩ ũndũ ũcio, nĩ ngaamaitũrũrĩra marakara makwa na ndĩmaniine na mwaki wa mathũgũta makwa. Nĩ ngaamarehera moimĩrĩro ma njĩra yao igũrũ rĩa mũtwe wao ene,’ ũguo nĩguo Jehova Mwathani Ũrĩa Mũnene ekuuga.”