Athamaki wa Mbere

7 Suleimani aahũthĩrire mĩaka 13 gwaka nyũmba yake mwene,*+ nginya nyũmba yake yothe ĩkĩrĩka.+

2 Na agĩaka Nyũmba ya Mũtitũ wa Lebanoni+ ya ũraihu wa mĩkono* 100, wariĩ wa mĩkono 50, na ũraihu wa na igũrũ wa mĩkono 30 igũrũ rĩa mĩhari ĩna ya itugĩ cia mũtarakwa; na haarĩ na mĩgamba ya mũtarakwa+ igũrũ rĩa itugĩ icio. 3 Yahumbĩrĩtwo igũrũ na mbaũ cia mũtarakwa mĩaro-inĩ ĩrĩa yaigĩrĩirũo itugĩ-inĩ icio; mĩaro ĩyo yarĩ 45, o mũhari mĩaro 15. 4 Haarĩ na ndirica mĩhari ĩtatũ ciarĩ na buremu, na o ndirica yangʼetheire ndirica ĩrĩa ĩngĩ ngoroba-inĩ ithatũ. 5 Mĩromo yothe na itugĩ cia mĩrango yarĩ na buremu ciaiganaine mĩena yothe ĩna, o ta ũrĩa ndirica icio ciangʼethanĩire ciatariĩ mwena wa mbere ngoroba-inĩ ithatũ.

6 Na agĩaka Nyũmba ya Itugĩ ya ũraihu wa mĩkono 50 na wariĩ wa mĩkono 30, na haarĩ na gĩthaku mwena wayo wa mbere, kĩarĩ na itugĩ na rwembea.

7 Ningĩ agĩaka Nyũmba ya* Gĩtĩ kĩa Ũnene,+ kũrĩa aaciirithanagĩria—Nyũmba ya Gũciirithanĩria+—na makĩmĩhumbĩra na mbaũ cia mũtarakwa kuuma thĩ nginya mĩitĩrĩro-inĩ.

8 Nayo nyũmba yake* ya gũikara, ĩrĩa yarĩ thĩinĩ wa nja ĩyo ĩngĩ,+ yaakirũo mwena wa na thutha haraihu kuuma Nyũmba-inĩ ĩyo, na mwakĩre wayo watariĩ o ta wa ĩyo. Ningĩ agĩakĩra mwarĩ wa Firauni ũrĩa Suleimani aahikĩtie nyũmba yatariĩ o ta Nyũmba ĩyo.+

9 Mĩako ĩyo yothe yaakĩtwo na mahiga ma goro+ maaicũhĩtio kũringana na ũrĩa maathimĩtwo, marengereirũo mwena wa thĩinĩ na wa nja na thoo cia kũrenga mahiga, kuuma mũthingi-inĩ wayo nginya igũrũ, na nja gũthiĩ nginya nja ĩrĩa nene.+ 10 Naguo mũthingi waakĩtwo na mahiga manene mũno ma goro; mahiga mamwe maarĩ ma mĩkono ikũmi, namo mahiga mangĩ maarĩ ma mĩkono ĩnana. 11 Na igũrũ rĩamo haarĩ na mahiga ma goro, maaicũhĩtio kũringana na ũrĩa maathimĩtwo, o hamwe na mbaũ cia mũtarakwa. 12 Nayo nja ĩrĩa nene yathiũrũrũkĩirio na mĩhari ĩtatũ ya mahiga ma gwacũhio na mũhari ũmwe wa mĩgamba ya mũtarakwa, o ta ũrĩa nja ĩrĩa nini+ ya nyũmba ya Jehova yatariĩ hamwe na gĩthaku kĩa nyũmba ĩyo.+

13 Mũthamaki Suleimani agĩtũmanĩra Hiramu+ na akĩmũrehe kuuma Turo. 14 Aarĩ mũrũ wa mũtumia wa ndigwa wa kuuma mũhĩrĩga-inĩ wa Nafitali, nake ithe aarĩ Mũturo na aarĩ mũturi wa indo cia gĩcango;+ na aarĩ na ũũgĩ mũingĩ mũno, ũtaũku,+ na ũmenyeru wa wĩra wa mĩthemba yothe wĩgiĩ gĩcango. Nĩ ũndũ ũcio agĩthiĩ kũrĩ Mũthamaki Suleimani na akĩruta wĩra wake wothe.

15 Agĩthondeka itugĩ igĩrĩ cia gĩcango gĩtwekie;+ o gĩtugĩ kĩarĩ na ũraihu wa mĩkono 18, na rũrigi rwa gũthima rũrĩa rũngĩathiũrũrũkĩirie o gĩtugĩ harĩ itugĩ icio cierĩ rwarĩ rwa ũraihu wa mĩkono 12.*+ 16 Na agĩtwekia gĩcango agĩthondeka ciongo igĩrĩ cia gwĩkĩrũo igũrũ rĩa itugĩ icio. Kĩongo kĩmwe kĩarĩ na ũraihu wa na igũrũ wa mĩkono ĩtano, nakĩo kĩongo kĩu kĩngĩ kĩarĩ na ũraihu wa na igũrũ wa mĩkono ĩtano. 17 O kĩongo igũrũ rĩa gĩtugĩ kĩarĩ na neti yagathĩkanĩtio na tũmĩnyororo tuogothe;+ neti mũgwanja kĩongo-inĩ kĩmwe na neti mũgwanja kĩongo-inĩ kĩu kĩngĩ. 18 Na agĩthondeka makomamanga mĩhari ĩĩrĩ mathiũrũrũkĩirie neti ĩmwe ma kũhumbĩra ciongo icio ciarĩ igũrũ rĩa itugĩ icio; agĩka ũguo harĩ ciongo icio cierĩ. 19 Ciongo icio ciarĩ igũrũ rĩa itugĩ icio gĩthaku-inĩ, ciahaanaga ihũa rĩa itoka gĩcunjĩ gĩacio kĩa ũraihu wa na igũrũ wa mĩkono ĩna. 20 Ciongo icio ciarĩ igũrũ rĩa itugĩ icio igĩrĩ, igũrũ rĩa gĩcunjĩ gĩa gĩthiũrũrĩ kĩrĩa kĩanyitaine na neti; na o kĩongo kĩarĩ na makomamanga 200 maarĩtwo mĩhari magĩthiũrũrũkĩirie.+

21 Agĩkĩhanda itugĩ icio cia gĩthaku kĩa hekarũ.*+ Akĩhanda gĩtugĩ gĩa guoko kwa ũrĩo* na agĩgĩta Jakini,* agĩcoka akĩhanda gĩtugĩ gĩa guoko kwa ũmotho* na agĩgĩta Boazu.*+ 22 Na itugĩ icio igũrũ ciahaanaga ihũa rĩa itoka. Nĩ ũndũ ũcio wĩra wa gũthondeka itugĩ icio ũkĩrĩka.

23 Agĩcoka agĩthondeka Karia* akĩhũthĩra cuma ndwekie.+ Kaarĩ ga gĩthiũrũrĩ, na kaarĩ ka mĩkono 10 kuuma mwena ũmwe wa mũromo nginya mwena ũrĩa ũngĩ na ũraihu wa na igũrũ wa mĩkono 5, na rũrigi rwa gũthima rũrĩa rũngĩagathiũrũrũkĩirie rwarĩ rwa ũraihu wa mĩkono 30.*+ 24 Na thĩ wa mũromo wako haagemetio na mĩũngũ,+ ĩgathiũrũrũkĩirie guothe, mĩũngũ ikũmi harĩ o mũkono gũthiũrũrũkĩria Karia kau gothe, kaarĩ na mĩhari ĩĩrĩ ya mĩũngũ ĩtwekanĩirio hamwe nako ĩgatuĩka kĩndũ kĩmwe. 25 Kaaigĩrĩirũo igũrũ rĩa ndegwa 12,+ 3 ciarorete mwena wa rũgongo, 3 ikarora mwena wa ithũĩro, 3 ikarora mwena wa mũhuro, na 3 ikarora mwena wa irathĩro; Karia kau kaaigĩrĩirũo igũrũ rĩacio, nacio ciĩga ciothe ciacio cia na thutha ciarorete gatagatĩ. 26 Naguo ũtungu wako waiganaine na wariĩ wa rũhĩ rũmwe;* na mũromo wako wathondeketwo o ta mũromo wa gĩkombe, watariĩ o ta ihũa icanũku rĩa itoka. Kaaiganagĩra maĩ ithimi 2,000 cia mbathi.*

27 Agĩcoka agĩthondeka tũkaari* ikũmi+ twa gĩcango. O gakaari kaarĩ na ũraihu wa mĩkono ĩna, wariĩ wa mĩkono ĩna, na ũraihu wa na igũrũ wa mĩkono ĩtatũ. 28 Na ũũ nĩguo tũkaari tũu twathondeketwo: Twarĩ na tũbaati mĩena-inĩ, na tũbaati tũu twa mĩena-inĩ twarĩ gatagatĩ ka mĩgamba ya gũkĩrania. 29 Na tũbaati-inĩ tũu twa mĩena gatagatĩ ka mĩgamba ya gũkĩrania haarĩ na mĩrũthi,+ ndegwa, na akerubi,+ na magemio macio nomo meekĩrĩtwo mĩgamba-inĩ ĩyo ya gũkĩrania. Mwena wa igũrũ na wa thĩ wa mĩrũthi ĩyo na ndegwa icio haarĩ na mahũa maathondeketwo tũthiũrũrĩ. 30 Na o gakaari kaarĩ na magũrũ mana ma gĩcango na cuma iria inyitithanagia magũrũ cia gĩcango, na cuma ciako inya cia kona-inĩ nĩcio ciacinyitĩrĩire. Rungu rwa kĩraĩ haarĩ na cuma cia gũkĩnyitĩrĩra, na ciathondekanĩirio na mahũa maathondeketwo tũthiũrũrĩ mwena-inĩ wa o cuma. 31 Mũromo wa kĩraĩ kĩu warĩ thĩinĩ wa hau igũrũ, gĩgacomoka na igũrũ mũkono ũmwe, na mũromo wa gakaari kau warĩ wa gĩthiũrũrĩ, gĩgakorũo na ũraihu wa mũkono ũmwe na nuthu, na mũromo-inĩ wako kaarĩ na mĩcongo. Na tũbaati twa mwena-inĩ twa tũkaari tũu twarĩ na mĩena ĩna, tũtiarĩ twa gĩthiũrũrĩ. 32 Magũrũ mako mana maarĩ thĩ wa tũbaati tũu twa mĩena-inĩ, nacio cuma cia kũnyitĩrĩra magũrũ macio cianyitithanĩtio na gakaari kau, na o kũgũrũ kwarĩ na ũraihu wa mũkono ũmwe na nuthu. 33 Na magũrũ mako maathondeketwo ta magũrũ ma ngaari ya mbarathi. Cuma cia kũmanyitĩrĩra, mĩbara, mĩrĩnga, tũcuma tũrĩa tũkoragwo magũrũ-inĩ gatagatĩ, ciothe ciathondeketwo na cuma ndwekie. 34 Kona ciothe inya cia o gakaari ciarĩ na cuma inya cia gũkanyitĩrĩra; cuma icio cia gũkanyitĩrĩra ciathondekanĩirio hamwe na gakaari kau irĩ gĩcunjĩ gĩako.* 35 Igũrũ rĩa gakaari kau haarĩ na mũcibi wagathiũrũrũkĩirie warĩ na ũraihu wa na igũrũ wa nuthu mũkono, na igũrũ rĩa gakaari kau, tũcuma tũrĩa twathondekete tũburemu o hamwe na tũbaati twa mĩena-inĩ, ciathondekanĩirio hamwe irĩ gĩcunjĩ gĩako.* 36 Na tũcuma-inĩ tũu twathondekete tũburemu o hamwe na tũbaati twa mĩena-inĩ, agĩconga akerubi, mĩrũthi, na mĩtĩ ya mĩkĩndũ kũringana na ũrĩa o handũ haaiganaga, o hamwe na mahũa maathondeketwo tũthiũrũrĩ mathiũrũrũkĩirie.+ 37 Ũguo nĩguo aathondekire tũkaari tũu ikũmi;+ tuothe twathondekirũo ũndũ ũmwe,+ tũrĩ na ithimi ciganaine na nĩ twahaanaine.

38 Agĩthondeka iraĩ ikũmi cia gĩcango;+ o kĩraĩ kĩaiganagĩra maĩ ithimi 40 cia mbathi. O kĩraĩ kĩarĩ na gĩthimi kĩa mĩkono ĩna.* O kĩraĩ kĩarĩ gĩa gakaari kamwe harĩ tũkaari tũu ikũmi. 39 Agĩcoka akĩiga tũkaari tũtano mwena wa ũrĩo wa nyũmba ĩyo na tũkaari tũtano mwena wa ũmotho wa nyũmba ĩyo, nako Karia agĩkaiga mwena wa ũrĩo wa nyũmba ĩyo, kwerekera mũhuro wa mwena wa irathĩro.+

40 Ningĩ Hiramu+ agĩthondeka iraĩ, icakũri,+ na mbakũri.+

Nĩ ũndũ ũcio Hiramu akĩrĩkia wĩra wothe ũrĩa aarutagĩra Mũthamaki Suleimani wĩgiĩ nyũmba ya Jehova:+ 41 itugĩ igĩrĩ+ na ciongo ihaana mbakũri, iria ciarĩ igũrũ rĩa itugĩ icio igĩrĩ; neti igĩrĩ+ cia kũhumbĩra ciongo icio igĩrĩ ciahaanaga mbakũri, icio ciarĩ igũrũ rĩa itugĩ icio; 42 makomamanga 400+ ma neti icio igĩrĩ, mĩhari ĩĩrĩ ya makomamanga harĩ o neti, nĩ ũndũ wa kũhumbĩra ciongo icio igĩrĩ ciahaanaga mbakũri, icio ciarĩ igũrũ rĩa itugĩ icio igĩrĩ; 43 tũkaari ikũmi+ hamwe na iraĩ ikũmi+ iria ciarĩ tũkaari-inĩ tũu; 44 Karia+ na ndegwa 12 iria ciarĩ rungu rwa Karia kau; 45 na ndoo, icakũri, mbakũri, na indo ciothe, iria Hiramu aathondekeire Mũthamaki Suleimani akĩhũthĩra gĩcango gĩkumuthe irĩ cia nyũmba ya Jehova. 46 Mũthamaki aacitwekirie agĩcithondekera rĩũmba-inĩ gĩcigo-inĩ kĩa Jorodani, gatagatĩ ga Sukothu na Zarethani.

47 Suleimani ndaathimire ũritũ wa indo icio ciothe tondũ ciarĩ nyingĩ mũno. Ũritũ wa gĩcango kĩu ndwamenyekire ũrĩa waiganaga.+ 48 Suleimani agĩgĩthondeka indo ciothe cia nyũmba ya Jehova: kĩgongona+ gĩa thahabu; metha ya thahabu+ ya kũigĩrĩrũo mĩgate ya magongona; 49 mĩtĩ ya kũigĩrĩrũo matawa+ ya thahabu therie, ĩtano mwena wa ũrĩo na ĩtano mwena wa ũmotho mbere ya rumu ya thĩinĩ biũ; na mahũa,+ matawa, magathĩ ma kũnyita ndambĩ, agĩcithondeka na thahabu;+ 50 iraĩ, magathĩ ma kũhoria ndambĩ,+ mbakũri, ikombe,+ ngĩo cia mwaki,+ cia thahabu therie; na icũhĩ cia mĩrango ya nyũmba ya thĩinĩ,+ na noho Harĩa Hatheru Mũno, na cia mĩrango ya nyũmba ya hekarũ,+ agĩcithondeka na thahabu.

51 Nĩ ũndũ ũcio Mũthamaki Suleimani akĩrĩkia wĩra wothe ũrĩa aagĩrĩirũo kũruta wa nyũmba ya Jehova. Suleimani agĩcoka akĩingĩria indo iria ithe Daudi aamũrĩte,+ na akĩiga betha, thahabu, na indo icio ingĩ igĩna-inĩ cia nyũmba ya Jehova.+