Ũhoro Mwega Ũrĩa Waandĩkirũo nĩ Johana
20 Na mũthenya wa mbere wa kiumia, Mariamu Mũmagidali agĩthiĩ mbĩrĩra-inĩ* rũcinĩ tene+ kũrĩ o na nduma, agĩkora ihiga nĩ rĩeeheretio mbĩrĩra-inĩ.*+ 2 Nĩ ũndũ ũcio, agĩthiĩ atengʼerete kũrĩ Simoni Petero na mũrutwo ũrĩa wendetwo nĩ Jesu,+ akĩmeera atĩrĩ: “Nĩ meheretie Mwathani mbĩrĩra-inĩ,+ na tũtiũĩ kũrĩa mamũkometie.”
3 Nake Petero na mũrutwo ũcio ũngĩ makiumagara marorete mbĩrĩra-inĩ. 4 O eerĩ makĩambĩrĩria gũtengʼera hamwe, no mũrutwo ũcio ũngĩ agĩtengʼera gũkĩra Petero na agĩkinya mbĩrĩra-inĩ mbere. 5 Na rĩrĩa aainamĩrĩire, agĩcũthĩrĩria akĩona itambaya iria cia gatani hau thĩ,+ no ndaatonyire. 6 Nake Simoni Petero agĩũka amũrũmĩrĩire, agĩtonya thĩinĩ wa mbĩrĩra. Na akĩona itambaya icio cia gatani hau thĩ. 7 Gĩtambaya kĩrĩa kĩarĩ mũtwe-inĩ wake gĩtiarĩ hamwe na itambaya iria ingĩ aathaĩtwo nacio no kĩarĩ handũ gĩkũnjĩtwo kĩrĩ giki. 8 Mũrutwo ũcio ũngĩ wakinyĩte mbĩrĩra-inĩ mbere o nake agĩtonya na akĩona na agĩtĩkia. 9 Nĩ gũkorũo gũkinyĩria hĩndĩ ĩyo matiataũkĩirũo nĩ rĩandĩko atĩ no mũhaka ariũke kuuma kũrĩ arĩa akuũ.+ 10 Kwoguo arutwo acio magĩcoka mĩciĩ kwao.
11 No Mariamu agĩikara arũgamĩte hakuhĩ na mbĩrĩra, akĩrĩraga. Na hĩndĩ ĩyo aarĩraga, akĩinamĩrĩra nĩguo acũthĩrĩrie mbĩrĩra thĩinĩ, 12 akĩona araika erĩ+ mehumbĩte nguo cia rangi mwerũ maikarĩte thĩ harĩa mwĩrĩ wa Jesu wakometio, ũmwe mũtwe-inĩ na ũrĩa ũngĩ magũrũ-inĩ. 13 Nao makĩmũũria atĩrĩ: “Mũtumia ũyũ, ũrarĩra nĩkĩ?” Nake akĩmeera: “Nĩ meheretie Mwathani wakwa, na ndiũĩ kũrĩa mamũkometie.” 14 Thutha wa kuuga ũguo, akĩĩhũgũra na akĩona Jesu arũgamĩte hau, no ndaamenyire atĩ nĩ Jesu.+ 15 Jesu akĩmwĩra atĩrĩ: “Mũtumia ũyũ, ũrarĩra nĩkĩ? Ũracaria ũ?” Tondũ Mariamu eeciragia nĩ mũrĩmi wa mũgũnda ũcio, akĩmwĩra: “Mũthuri ũyũ, angĩkorũo nĩwe ũmweheretie, njĩĩra kũrĩa ũmũkometie, na nĩ ngũmuoya.” 16 Jesu akĩmwĩra: “Mariamu!” Na rĩrĩa eehũgũrire, akĩmwĩra na Kĩhibirania: “Raboni!” (ũguo nĩ kuuga “Mũrutani!”) 17 Jesu akĩmwĩra: “Tiga kũũnyita, nĩ gũkorũo ndirĩ ndĩrambata kũrĩ Awa. No thiĩ kũrĩ ariũ a Awa+ ũmeere atĩrĩ, ‘Ndĩrambata kũrĩ Awa+ na no we Ithe wanyu na kũrĩ Ngai wakwa+ na no we Ngai wanyu.’” 18 Mariamu Mũmagidali agĩthiĩ na akĩhe arutwo ũhoro ũcio, akĩmeera: “Nĩ ndona Mwathani!” Na akĩmeera maũndũ marĩa Jesu aamwĩrĩte.+
19 Na gwakinya hwaĩ-inĩ mũthenya o ũcio wa mbere wa kiumia, rĩrĩa arutwo maahingĩte mĩrango kũrĩa maarĩ nĩ ũndũ wa gwĩtigĩra Ayahudi, Jesu akĩmoimĩrĩra na akĩrũgama gatagatĩ-inĩ kao akĩmeera: “Mũrogĩa na thayũ.”+ 20 Thutha wa kuuga ũguo, akĩmonia moko na mbaru ciake.+ Nao arutwo magĩkena mũno nĩ ũndũ wa kuona Mwathani.+ 21 Jesu akĩmeera o rĩngĩ: “Mũrogĩa na thayũ.+ O ta ũrĩa Awa andũmĩte,+ o na niĩ nĩ ndamũtũma inyuĩ.”+ 22 Arĩkia kuuga ũguo, akĩmahuuha na mĩhũmũ, akĩmeera: “Amũkĩrai roho mũtheru.+ 23 Mũndũ o wothe mũngĩohera mehia make, nĩ muohere; mũndũ o wothe mũngĩaga kuohera mehia make, ti muohere.”
24 No rĩrĩ, Toma,+ ũmwe wa arĩa Ikũmi na Erĩ, ũrĩa wetagwo Wa-mahatha, ndaarĩ hamwe na acio angĩ hĩndĩ ĩyo Jesu ookĩte. 25 Nĩ ũndũ ũcio, arutwo arĩa angĩ maamwĩraga atĩrĩ: “Nĩ tuonete Mwathani!” No we akameera: “Itonete irema cia mĩcumarĩ moko-inĩ make, na ngatonyia kĩara gĩakwa irema-inĩ icio cia mĩcumarĩ na ngatonyia guoko gwakwa mbaru-inĩ ciake,+ ndirĩ hĩndĩ ingĩtĩkia.”
26 Matukũ manana thutha ũcio, arutwo ake maarĩ nyũmba thĩinĩ o rĩngĩ, na Toma aarĩ hamwe nao. Jesu akĩmoimĩrĩra, o na gũtuĩka mĩrango yarĩ mĩhinge, akĩrũgama gatagatĩ-inĩ kao akiuga: “Mũrogĩa na thayũ.”+ 27 Agĩcoka akĩra Toma ũũ: “Iga kĩara gĩaku haha, na ũrore moko makwa, na ũrehe guoko gwaku ũgũtonyie mbaru-inĩ ciakwa, nĩguo wĩtĩkie ũtige kũgĩa na nganja.”* 28 Nake Toma akĩmũcokeria akĩmwĩra: “Mwathani wakwa na Ngai wakwa!” 29 Jesu akĩmwĩra: “Wetĩkia tondũ nĩ wanyona? Gũkena-rĩ, nĩ arĩa matonete no nĩ metĩkagia.”
30 Hatarĩ nganja, Jesu nĩ aaringire ciama ingĩ nyingĩ arutwo ake makĩonaga, iria itandĩkĩtwo gĩkũnjo-inĩ gĩkĩ.+ 31 No maũndũ macio mandĩkĩtwo nĩguo mwĩtĩkie atĩ Jesu nĩwe Kristo, Mũrũ wa Ngai, na tondũ wa gwĩtĩkia mũgĩe na muoyo kũgerera harĩ rĩĩtwa rĩake.+