Marũa ma Mbere Kũrĩ Akorintho

16 Rĩu-rĩ, ũhoro wĩgiĩ kũruta mĩhothi nĩ ũndũ wa arĩa aamũre,+ no mũrũmagĩrĩre maũndũ marĩa nderire ciũngano cia Galatia. 2 Mũthenya wa mbere wa o kiumia, o ũmwe wanyu nĩ aigage kĩndũ kũringana na ũhoti wake, nĩguo mĩhothi ndĩkanonganio ndakinya. 3 No ndakinya kũu, nĩ ngaatũma andũ arĩa mũgũthuura marũa-inĩ manyu+ nĩguo matware kĩheo kĩanyu kĩa ũtugi Jerusalemu. 4 No rĩrĩ, kũngĩoneka arĩ wega o na niĩ thiĩ kuo, nĩ magaathiĩ hamwe na niĩ.

5 No ngooka kũrĩ inyuĩ ndamba kũgerera Makedonia, tondũ nĩ ngũgerera Makedonia;+ 6 na hihi nĩ ngaaikara o na kana ngorũo hamwe na inyuĩ hĩndĩ ya heho, nĩguo mũgaacoka mũnyumagarie hanini ngĩthiĩ kũrĩa ngaakorũo ngĩthiĩ. 7 Nĩ gũkorũo ndirenda kũmuona ihinda-inĩ rĩrĩ o ngĩhĩtũka tu, tondũ nĩ ndĩrerĩgĩrĩra kũhũthĩra ihinda rĩigana ũna hamwe na inyuĩ+ Jehova* angĩtĩkĩria. 8 No nĩ ngũikara gũkũ Efeso+ o nginya hĩndĩ ya Gĩathĩ kĩa Pentekoste, 9 tondũ nĩ hingũrĩirũo mũrango mũnene wa ũtungata,+ no kũrĩ na akararia aingĩ.

10 Rĩu-rĩ, Timotheo+ angĩũka, tigĩrĩrai atĩ ndegũkorũo na ũndũ wa gwĩtigĩra arĩ gatagatĩ-inĩ kanyu, nĩ gũkorũo araruta wĩra wa Jehova,*+ o ta niĩ. 11 Nĩ ũndũ ũcio-rĩ, mũndũ o na ũrĩkũ ndakamũhũthie. Na mũreke oimagare na thayũ oke kũrĩ niĩ, tondũ nĩ ndĩmwetereire o hamwe na ariũ a Ithe witũ.

12 Ũhoro-inĩ wĩgiĩ mũrũ wa Ithe witũ Apolo-rĩ,+ nĩ ndamũringĩrĩirie mũno oke kũrĩ inyuĩ marĩ hamwe na ariũ a Ithe witũ. Ndwarĩ muoroto wake oke ihinda-inĩ rĩrĩ, no nĩ arĩũka rĩrĩa arĩona mweke.

13 Ikaragai mwĩhũgĩte,+ mũrũgame mwĩrũmĩtie thĩinĩ wa wĩtĩkio,+ koragwoi mũtariĩ ta arũme,*+ na mũgĩe na hinya.+ 14 Maũndũ mothe marĩa mwĩkaga mekagei na wendo.+

15 Nĩ mũĩ atĩ andũ a nyũmba ya Stefana nĩo maciaro ma mbere ma Akaia na atĩ nĩ meerutĩire mũno gũtungatĩra andũ arĩa aamũre. Nĩ ũndũ ũcio ariũ a Ithe witũ-rĩ, no nyende kũmũhatĩrĩria: 16 Mwĩnyihagĩriei andũ ta acio na arĩa othe maranyitanĩra na makaruta wĩra na kĩyo.+ 17 No nĩ ngenete gũkorũo hamwe na Stefana+ na Foritunato na Akaiko, tondũ nĩ mandeithĩtie hĩndĩ ĩno tũtarĩ na inyuĩ. 18 Nĩ gũkorũo nĩ macanjamũrĩte roho wakwa o na wanyu. Nĩ ũndũ ũcio-rĩ, heagai andũ ta acio gĩtĩo.

19 Ciũngano cia Asia nĩ ciamũgeithia. Akila na Priska o hamwe na kĩũngano kĩrĩa gĩcemanagia kwao mũciĩ+ nĩ mamũgeithia mũno thĩinĩ wa Mwathani. 20 Ariũ othe a Ithe witũ nĩ mamũgeithia. Geithaniai inyuĩ ene na ngeithi theru cia kũmumunyana.

21 Ici nĩ ngeithi ciakwa, niĩ Paulo, ndandĩka na guoko gwakwa mwene.

22 Angĩkorũo nĩ harĩ mũndũ ũtendete Mwathani, aronyitwo nĩ kĩrumi. Mwathani witũ, ũka! 23 Ũtugi mũnene wa Mwathani Jesu ũroikara hamwe na inyuĩ. 24 Wendo wakwa ũroikara hamwe na inyuĩ inyuothe mũrĩ na ũiguano na Kristo Jesu.