Ũhoro Mwega Ũrĩa Waandĩkirũo nĩ Mathayo

13 Mũthenya ũcio Jesu akiuma nyũmba na agĩthiĩ agĩikara thĩ hakuhĩ na iria. 2 Na kĩrĩndĩ kĩnene gĩgĩũka harĩ we, ũndũ ũrĩa watũmire ahaice gatarũ na agĩikara thĩ, nakĩo kĩrĩndĩ gĩothe kĩarũgamĩte rũteere-inĩ rwa iria.+ 3 Agĩcoka akĩmeera maũndũ maingĩ na njĩra ya ngerekano,+ akiuga ũũ: “Atĩrĩrĩ, mũhuri ũmwe nĩ aathiire kũhura mbeũ.+ 4 Na rĩrĩa aahuraga, mbeũ imwe ikĩgwa mũkĩra-inĩ wa njĩra, na nyoni igĩũka igĩcirĩa.+ 5 Ingĩ ikĩgwa kũndũ kũrĩ mahiga, kũrĩa gũtaarĩ na tĩri mũingĩ, na ikĩmera narua tondũ tĩri ũcio ndwarĩ mũriku.+ 6 No rĩrĩa riũa rĩaarire, ikĩhĩa na ikĩũma tondũ itiarĩ na mĩri. 7 Ingĩ ikĩgwa mĩigua-inĩ, nayo mĩigua ĩyo ĩkĩneneha ĩgĩcihatĩka.+ 8 Nacio ingĩ ikĩgwa tĩri-inĩ ũrĩa mwega, na ikĩambĩrĩria kũruta maciaro, ĩmwe maita 100 makĩria, ĩngĩ maita 60, nayo ĩngĩ maita 30.+ 9 Ũrĩa ũrĩ matũ nĩ aigue.”+

10 Nĩ ũndũ ũcio arutwo ake magĩũka kũrĩ we makĩmũũria atĩrĩ: “Nĩ kĩĩ gĩtũmaga ũhũthĩre ngerekano ũkĩaria nao?”+ 11 Akĩmacokeria ũũ: “Inyuĩ nĩ mwĩtĩkĩrĩtio gũtaũkĩrũo nĩ hitho theru+ ciĩgiĩ Ũthamaki wa Ngai, no o matiĩtĩkĩrĩtio. 12 Tondũ mũndũ o wothe ũrĩ na kĩndũ, nĩ akoongererũo makĩria, na aiyũrĩrĩrio; ĩndĩ ũrĩa wothe ũtarĩ, o na kĩrĩa arĩ nakĩo nĩ agaatunywo.+ 13 Nĩkĩo hũthagĩra ngerekano ngĩaria nao; tondũ maroraga no mationaga, magathikĩrĩria no matiguaga, o na matitaũkagĩrũo nĩ maũndũ macio.+ 14 Na ũrathi wa Isaia nĩ ũrahinga harĩ o. Ũrathi ũcio uugaga ũũ: ‘Kũigua nĩ mũkaaigua, no mũtitaũkĩrũo, na kũrora nĩ mũkaarora no mũtione.+ 15 Nĩ gũkorũo andũ aya nĩ momĩtie ngoro ciao, kũigua nĩ maiguaga no makaga kuoya ikinya, na makahinga maitho mao, nĩguo matikanone na maitho mao na matikanaigue na matũ mao mataũkĩrũo ngoro-inĩ ciao na magarũrũke, na niĩ ndĩmahonie.’+

16 “No rĩrĩ, gũkena nĩ maitho manyu tondũ nĩ monaga, na matũ manyu tondũ nĩ maiguaga.+ 17 Nĩ ũndũ ngũmwĩra atĩrĩ na ma, anabii na andũ aingĩ athingu nĩ meeriragĩria kuona maũndũ marĩa inyuĩ mũrona no matiamonire,+ na kũigua maũndũ marĩa mũraigua no matiamaiguire.

18 “Rĩu gĩthikĩrĩriei ngerekano ya mũndũ ũrĩa wahurire mbeũ.+ 19 Mũndũ o wothe angĩigua kiugo kĩa Ũthamaki na age gũtaũkĩrũo nĩkĩo, ũrĩa mũũru+ okaga akamũtunya kĩrĩa kĩhurĩtwo ngoro-inĩ yake; ũcio nĩwe mbeũ ĩrĩa yahurirũo mũkĩra-inĩ wa njĩra.+ 20 Nayo ĩrĩa yahurirũo kũndũ kũrĩ na mahiga, nĩ mũndũ ũrĩa ũiguaga kiugo na agagĩtĩkĩra o na ihenya akenete.+ 21 Ĩndĩ, ndakoragwo na mĩri no athiaga na mbere kwa ihinda, na thĩna woka kana anyarirũo nĩ ũndũ wa kiugo kĩu, o rĩmwe akahĩngĩka. 22 Nayo ĩrĩa yahurirũo mĩigua-inĩ, nĩ mũndũ ũrĩa ũiguaga kiugo, no mĩtangĩko ya mũtabarĩre ũyũ wa maũndũ*+ na hinya wa maheeni wa ũtonga ikahatĩka kiugo kĩu, nakĩo gĩkaga maciaro.+ 23 Nayo ĩrĩa yahurirũo tĩri-inĩ mwega, nĩ mũndũ ũrĩa ũiguaga kiugo na agataũkĩrũo nĩkĩo, ũrĩa kũna ũciaraga maciaro, ũmwe maita 100 makĩria, ũngĩ 60, na ũngĩ 30.”+

24 Agĩcoka akĩmahe ngerekano ĩngĩ, akiuga: “Ũthamaki wa igũrũ no ũhaananio na mũndũ wahurire mbeũ njega mũgũnda-inĩ wake. 25 Rĩrĩa andũ maarĩ toro, thũ yake ĩgĩũka na ĩkĩhura itindiĩ* kũu ngano-inĩ na ĩgĩthiĩ. 26 Rĩrĩa ngano ĩyo yamerire na ĩgĩciara maciaro, itindiĩ o narĩo rĩkĩambĩrĩria kuoneka. 27 Nĩ ũndũ ũcio ngombo ciake igĩthiĩ kũrĩ we ikĩmũũria atĩrĩ, ‘Mwathi witũ, githĩ ndwahurire mbeũ njega mũgũnda-inĩ waku? Gũthiĩte atĩa gũgakorũo na itindiĩ?’ 28 Agĩcicokeria ũũ, ‘Nĩ mũndũ ũrĩ ũthũ na niĩ wĩkĩte ũguo.’+ Nacio ngombo icio ikĩmũũria atĩrĩ, ‘Nĩ ũkwenda tũthiĩ tũkamunye itindiĩ rĩu?’ 29 Agĩciĩra, ‘Aca; nĩguo mũkĩmunya itindiĩ mũtikarĩmunyanĩrie na ngano. 30 Rekei ikũranĩre o nginya hĩndĩ ya magetha, na ihinda rĩa magetha rĩakinya-rĩ, nĩ ngeera agethi ũũ: Ambai mũmunye itindiĩ rĩu na mũrĩohe itĩa nĩguo rĩcinwo; mũcoke mũcokanĩrĩrie ngano thĩinĩ wa ikũmbĩ rĩakwa.’”+

31 Agĩcoka akĩmahe ngerekano ĩngĩ, akĩmeera ũũ: “Ũthamaki wa igũrũ ũtariĩ ta mbegũ ya karatarĩ,* ĩrĩa mũndũ ũmwe ooire akĩhanda mũgũnda wake.+ 32 Ĩyo nĩyo mbegũ ĩrĩa nini biũ gũkĩra mbegũ iria ingĩ ciothe, no rĩrĩa yakũra, ĩnenehaga gũkĩra mĩmera ĩrĩa ĩngĩ ya mũgũnda na ĩgatuĩka mũtĩ, nginya nyoni cia rĩera-inĩ* igoka ikona handũ ha gũikara honge-inĩ ciaguo.”

33 Akĩmahe ngerekano ĩngĩ: “Ũthamaki wa igũrũ ũtariĩ ta ndawa ya kũimbia, ĩrĩa mũtumia ũmwe ooire na agĩtukania na mũtu ithimi ithatũ nene nginya mũtu ũcio wothe ũkĩimba.”+

34 Jesu aaragĩria kĩrĩndĩ maũndũ macio mothe na njĩra ya ngerekano. Gũtirĩ hĩndĩ aaragia nao hatarĩ ngerekano,+ 35 nĩguo ahingie ũhoro ũrĩa waaririo kũgerera mũnabii ũrĩa woigire: “Nĩ ngũtumũra kanua gakwa njarie na ngerekano; nĩ ngũmenyithania maũndũ marĩa makoretwo marĩ mahithe kuuma o kĩambĩrĩria.”*+

36 Ningĩ thutha wa kwĩra kĩrĩndĩ gĩthiĩ, akĩingĩra nyũmba. Na arutwo ake magĩthiĩ kũrĩ we makĩmwĩra atĩrĩ: “Tũtaarĩrie ngerekano ĩyo ya itindiĩ rĩu rĩarĩ mũgũnda-inĩ.” 37 Akĩmacokeria akĩmeera: “Mũhuri wa mbeũ ĩrĩa njega nĩ Mũrũ wa mũndũ; 38 mũgũnda nĩ thĩ.+ Nayo mbeũ ĩrĩa njega, nĩ ariũ a Ũthamaki, no itindiĩ nĩ ariũ a ũrĩa mũũru,+ 39 nayo thũ ĩrĩa yahurire itindiĩ nĩ Mũcukani. Magetha nĩ ithirĩro rĩa mũtabarĩre wa maũndũ,* nao agethi nĩ araika. 40 Nĩ ũndũ ũcio, o ta ũrĩa itindiĩ rĩmunyagwo na rĩgacinwo na mwaki-rĩ, noguo gũkaahaana hĩndĩ ya ithirĩro rĩa mũtabarĩre wa maũndũ.*+ 41 Mũrũ wa mũndũ nĩ agaatũma araika ake, nao nĩ magaacokanĩrĩria kĩrĩa gĩothe kĩhĩngithagia andũ na andũ arĩa mekaga maũndũ ma uuni-watho, mameherie Ũthamaki-inĩ wake, 42 na mamaikie thĩinĩ wa mwaki mũnene.+ Kũu nĩkuo makaarĩragĩra na makahagarania magego. 43 Hĩndĩ ĩyo arĩa athingu magaacangarara o ta riũa+ Ũthamaki-inĩ wa Ithe wao. Ũrĩa ũrĩ matũ nĩ aigue.

44 “Ũthamaki wa igũrũ ũtariĩ ta mũthithũ wahithĩtwo mũgũnda-inĩ, ũrĩa mũndũ ũmwe oonire na agĩcoka akĩũhitha; na nĩ ũndũ wa gĩkeno kĩrĩa aarĩ nakĩo, agĩthiĩ akĩendia indo ciake ciothe na akĩgũra mũgũnda ũcio.+

45 “Ningĩ Ũthamaki wa igũrũ ũtariĩ ta mũhũũri biacara wagendaga agĩcaria ruru njega. 46 Rĩrĩa oonire ruru ĩmwe ya goro, agĩthiĩ na akĩendia indo ciothe iria aarĩ nacio na ihenya na akĩmĩgũra.+

47 “Ningĩ Ũthamaki wa igũrũ ũtariĩ ta neti ya gũtega ĩrĩa yaikirio thĩinĩ wa iria ĩkĩnyita thamaki cia mĩthemba yothe. 48 Rĩrĩa yaiyũrire, ategi makĩmĩgucia nginya rũteere-inĩ rwa iria, na maikara thĩ magĩthuura iria njega+ magĩciikia ikabu-inĩ, no iria itaarĩ njega+ magĩte. 49 Ũguo nĩguo gũkaahaana hĩndĩ ya ithirĩro rĩa mũtabarĩre wa maũndũ.* Araika nĩ magaathiĩ na maamũranie arĩa aganu kuuma kũrĩ arĩa athingu 50 na mamaikie thĩinĩ wa mwaki ũrĩa mũnene. Kũu nĩkuo makaarĩragĩra na makahagarania magego.

51 Agĩcoka akĩmoria atĩrĩ: “Hihi nĩ mwataũkĩrũo nĩ maũndũ macio mothe?” Makĩmwĩra: “Ĩĩ.” 52 Nake akĩmeera ũũ: “Angĩkorũo nĩ mwataũkĩrũo-rĩ, mũrutani o wothe wa andũ angĩrutwo ũhoro wa Ũthamaki wa igũrũ, atariĩ ta mũndũ mwene nyũmba, ũrĩa ũrutaga indo iria njerũ na iria ngũrũ kuuma mũthithũ-inĩ wake.”

53 Rĩrĩa Jesu aarĩkirie kũheana ngerekano icio, akiuma kũu agĩthiĩ. 54 Thutha wa gũkinya itũũra rĩa kwao,+ akĩambĩrĩria kũruta andũ ũhoro thunagogi-inĩ yao, nao makĩgega na makĩũria atĩrĩ: “Mũndũ ũyũ arutĩte kũ ũũgĩ ũyũ na ũhoti wa gwĩka mawĩko maya ma hinya?+ 55 Githĩ ũyũ ti mũrũ wa bundi ũrĩa wa mbaũ?+ Githĩ nyina ndetagwo Mariamu, na ariũ a nyina nĩ Jakubu na Jusufu na Simoni na Judasi?+ 56 Nao aarĩ a nyina githĩ othe matiikaraga o gũkũ hamwe na ithuĩ? Gũkĩrĩ ũguo-rĩ, mũndũ ũyũ arutĩte kũ maũndũ maya mothe?”+ 57 Kwoguo makĩambĩrĩria kũhĩngĩka nĩ ũndũ wake.+ No Jesu akĩmeera atĩrĩ: “Mũnabii ndaimagwo gĩtĩo tiga o itũũra-inĩ rĩa kwao na gwake mũciĩ.”+ 58 Na ndeekire mawĩko maingĩ ma hinya kũu nĩ ũndũ wao kwaga wĩtĩkio.