Ayubu
42 Nake Ayubu agĩcokeria Jehova akĩmwĩra atĩrĩ:
2 “Rĩu nĩ menyete atĩ no ũhote gwĩka maũndũ mothe
Na atĩ gũtirĩ ũndũ ũbangĩte gwĩka ũngĩkũrema.+
3 Wee woigire atĩrĩ, ‘Nũũ ũyũ ũrekĩra ũtaaro wakwa nduma atarĩ na ũmenyo?’+
Na niĩ ngĩaria, no ndaririe itarĩ na ũtaũku
Igũrũ rĩgiĩ maũndũ ma magegania mũno harĩ niĩ, marĩa itamenyaga.+
4 Nawe ũkiuga ũũ, ‘Thikĩrĩria, na niĩ njarie.
Nĩ ngũkũũria ciũria, nawe ũnjokerie.’+
5 Matũ makwa nĩ maiguĩte ũhoro waku,
No rĩu nĩ nguonete na maitho makwa.
7 Thutha wa Jehova kwĩra Ayubu ciugo icio, Jehova akĩra Elifazu ũrĩa Mũtemani atĩrĩ:
“Nĩ ndakarĩte mũno nĩ ũndũ waku na arata acio aku erĩ,+ tondũ mũtiarĩtie ũhoro wa ma ũngoniĩ+ ta ũrĩa Ayubu ndungata yakwa ekĩte. 8 Nĩ ũndũ ũcio oyai ndegwa mũgwanja na ndũrũme mũgwanja mũthiĩ kũrĩ Ayubu ndungata yakwa, mũkarute igongona rĩa njino nĩ ũndũ wanyu inyuĩ ene. Nake Ayubu ndungata yakwa nĩ ekũmũhoera.+ Na niĩ hatarĩ nganja nĩ ngwĩtĩkĩra ihoya rĩake* atĩ ndikamwĩke kũringana na ũrimũ wanyu, tondũ mũtiarĩtie ũhoro wa ma ũngoniĩ ta ũrĩa Ayubu ndungata yakwa ekĩte.”
9 Elifazu ũrĩa Mũtemani, Bilidadi ũrĩa Mũshuhi, na Zofaru ũrĩa Mũnaamathi magĩgĩthiĩ na magĩka ũrĩa Jehova aameerĩte meke. Nake Jehova agĩtĩkĩra ihoya rĩa Ayubu.
10 Thutha wa Ayubu kũhoera arata ake,+ Jehova akĩmwehereria mathĩna+ na akĩmũcokeria ũtonga wake.* Jehova akĩmũhe maita merĩ ma kĩrĩa aarĩ nakĩo hau kabere.+ 11 Ariũ na aarĩ a nyina othe hamwe na arata arĩa othe aarĩ nao mbere ĩyo+ magĩthiĩ kũrĩ we na makĩrĩanĩra nake nyũmba-inĩ yake. Makĩmũhooreria na makĩmũũmĩrĩria nĩ ũndũ wa mathĩna mothe marĩa Jehova eetĩkĩrĩtie mamũkore. O ũmwe wao akĩmũhe gĩcunjĩ gĩa betha na gĩcũhĩ gĩa thahabu.
12 Jehova agĩkĩrathima matukũ ma mũthia ma ũtũũro wa Ayubu gũkĩra ma kĩambĩrĩria,+ na Ayubu akĩgĩa ngʼondu 14,000, ngamĩra 6,000, ngʼombe 2,000,* na ndigiri 1,000 cia mũgoma.+ 13 Ningĩ nĩ aagĩire ariũ angĩ mũgwanja o na aarĩ angĩ atatũ.+ 14 Mũirĩtu wa mbere aamwĩtire Jemima, wa kerĩ akĩmwĩta Kezia, na wa gatatũ Kereni-hapuku. 15 Gũtirĩ atumia angĩ maarĩ athaka ta aarĩ acio a Ayubu bũrũri-inĩ ũcio wothe, na ithe wao nĩ aamaheire igai hamwe na ariũ a nyina.
16 Thutha wa maũndũ macio Ayubu aatũũrire mĩaka 140, na akĩona ciana ciake na ciana cia ciana ciake, njiarũa inya. 17 Mũthia-inĩ, Ayubu agĩkua thutha wa gũtũũra ihinda iraya na akaiganĩra.*