Samueli wa Mbere

15 Samueli agĩcoka akĩra Saulu ũũ: “Jehova aandũmire ngũitĩrĩrie maguta ũtuĩke mũthamaki wa gũthamakĩra andũ ake Isiraeli;+ rĩu thikĩrĩria ũrĩa Jehova ekuuga.+ 2 Ũũ nĩguo Jehova mũnene wa ita ekuuga: ‘Nĩ ngũtuĩra Aamaleki nĩ ũndũ wa ũrĩa meekire andũ a Isiraeli rĩrĩa maareganire nao marĩ njĩra-inĩ makiuma Misiri.+ 3 Rĩu thiĩ ũtharĩkĩre Aamaleki,+ na ũmaniine+ hamwe na kĩrĩa gĩothe marĩ nakĩo. Ndwagĩrĩirũo kũmahonokia;* wagĩrĩirũo kũmoraga,+ mũndũrũme o hamwe na mũtumia, mwana o hamwe na gakenge, ndegwa o hamwe na ngʼondu, ngamĩra o hamwe na ndigiri.’”+ 4 Saulu agĩgĩta andũ na akĩmatara marĩ Telaimu: Maarĩ thigari 200,000 cia gũthiĩ na magũrũ na arũme 10,000 a Juda.+

5 Saulu agĩthiĩ nginya itũũra rĩa Amaleki na akĩmoheria mũkuru-inĩ. 6 Saulu agĩcoka akĩra Akeni atĩrĩ:+ “Thiĩi, eherai kuuma kũrĩ Aamaleki, nĩguo ndikamũniinanĩrie nao.+ Nĩ gũkorũo inyuĩ nĩ muoonirie andũ othe a Isiraeli wendo mwĩhokeku+ hĩndĩ ĩrĩa mooimaga Misiri.” Nĩ ũndũ ũcio Akeni makĩehera gatagatĩ-inĩ ka Amaleki. 7 Thutha ũcio Saulu akĩũraga Aamaleki+ kuuma Havila+ o nginya Shuri,+ ĩrĩa ĩhakanĩte na Misiri. 8 Akĩnyita Agagi+ mũthamaki wa Amaleki arĩ muoyo, no andũ acio angĩ othe akĩmaniina na rũhiũ rwa njora.+ 9 No rĩrĩ, Saulu hamwe na andũ acio makĩhonokia* Agagi na nyamũ iria njega biũ cia rũũru rwa mbũri na rwa ngʼondu, rũũru rwa ngʼombe, nyamũ iria norie, ndũrũme, na kĩrĩa gĩothe kĩarĩ kĩega.+ Matiendaga gũciananga. No indo iria ciothe itaarĩ kĩene na itangĩendeka, nĩcio maanangire.

10 Nakĩo kiugo kĩa Jehova gĩgĩkinyĩra Samueli, akĩmwĩra ũũ: 11 “Nĩ ndĩrerira* nĩ ũndũ wa gũtua Saulu mũthamaki, nĩ gũkorũo nĩ atigĩte kũnũmĩrĩra na nĩ agĩte kũhingia ciugo ciakwa.”+ Samueli agĩkĩigua ũũru mũno, na akĩrĩrĩra Jehova ũtukũ mũgima.+ 12 Rĩrĩa Samueli ookĩrire rũcinĩ tene agacemanie na Saulu, Samueli akĩrũo atĩrĩ: “Saulu athiire Karimeli,+ na ahanda gĩtugĩ kuo nĩ ũndũ wake mwene.+ Acoka ahũndũka aikũrũka Giligali.” 13 Rĩrĩa Samueli aakinyire kũrĩ we, Saulu akĩmwĩra ũũ: “Jehova arokũrathima. Nĩ hingĩtie kiugo kĩa Jehova.” 14 No Samueli akĩmũũria atĩrĩ: “Na nĩ mũgambo ũrĩkũ ũcio ndĩraigua matũ-inĩ makwa wa rũũru rwa mbũri na rwa ngʼondu o na mũgambo ũcio ndĩraigua wa ngʼombe?”+ 15 Saulu akĩmũcokeria atĩrĩ: “Irarehirũo kuuma kũrĩ Aamaleki, tondũ andũ nĩ marahonokirie* nyamũ iria njega biũ cia rũũru rwa mbũri na rwa ngʼondu na rũũru rwa ngʼombe, cia kũrutĩra Jehova Ngai waku igongona; no nĩ tũranangire kĩrĩa kĩratigarire.” 16 Nĩ ũndũ ũcio Samueli akĩra Saulu ũũ: “Kinyia hau! Reke ngwĩre ũrĩa Jehova aranjĩrire hwaĩ.”+ Agĩkĩmwĩra atĩrĩ: “Njĩĩra!”

17 Samueli agĩgĩthiĩ na mbere akiuga atĩrĩ: “Na githĩ nduoonaga ta ũtagĩrĩire+ rĩrĩa watuagwo mũtongoria wa mĩhĩrĩga ya Isiraeli na rĩrĩa Jehova aagũitĩrĩirie maguta ũtuĩke mũthamaki wa Isiraeli?+ 18 Thutha-inĩ Jehova agĩkũhe wĩra agĩkwĩra atĩrĩ, ‘Thiĩ wanange Aamaleki acio ehia.+ Matharĩkĩre o nginya ũmaniine biũ.’+ 19 Nĩ kĩĩ kĩratũmire wage gwathĩkĩra mũgambo wa Jehova? Ithenya rĩa ũguo, ũratengʼereire indo cia gũtahwo ũrĩ na ũkoroku+ na ũreka ũndũ mũũru maitho-inĩ ma Jehova!”

20 Ĩndĩ Saulu akĩra Samueli atĩrĩ: “No ndĩragĩathĩkĩire mũgambo wa Jehova! Nĩ ndĩrathiire ndĩraruta wĩra ũrĩa Jehova aaheire, ndĩrarehe Agagi mũthamaki wa Amaleki, na ndĩrananga Aamaleki.+ 21 No andũ nĩ marakuuire ngʼondu na ngʼombe kuuma harĩ indo cia gũtahwo, indo iria irarĩ njega biũ kuuma harĩ iria ciatuĩrĩirũo kwanangwo, nĩguo irutĩrũo Jehova Ngai waku igongona Giligali.”+

22 Samueli agĩcoka akiuga ũũ: “Hihi Jehova akenagio nĩ magongona ma njino na maruta+ gũkĩra gwathĩkĩra mũgambo wa Jehova? Atĩrĩrĩ, gwathĩka nĩ kwa bata gũkĩra igongona,+ na gũthikĩrĩria nĩ kwa bata gũkĩra maguta+ ma ndũrũme; 23 nĩ gũkorũo ũremi+ no ũndũ ũmwe na rĩhia rĩa ũragũri,+ na gwĩka maũndũ na mwĩĩro no ũndũ ũmwe na kũhũthĩra hinya wa ũragũri kana ũhoi mĩhianano.* Tondũ nĩ warega kiugo kĩa Jehova,+ nake nĩ arega ũkorũo ũrĩ mũthamaki.”+

24 Saulu agĩcoka akĩra Samueli atĩrĩ: “Nĩ njĩhĩtie, nĩ gũkorũo nĩ njagararĩte watho wa Jehova na ngaagarara ciugo ciaku, tondũ ndĩretigĩrire andũ ndĩrathikĩrĩria ũrĩa maroigaga. 25 Rĩu ndagũthaitha, ndekera mehia makwa, na tũcoke nawe nĩguo ngainamĩrĩre Jehova.”+ 26 No Samueli akĩra Saulu ũũ: “Tũtigũcoka hamwe nawe tondũ nĩ ũregete kiugo kĩa Jehova, na Jehova nĩ aregete ũthiĩ na mbere gũkorũo ũrĩ mũthamaki wa Isiraeli.”+ 27 Na rĩrĩa Samueli aagarũrũkire nĩguo athiĩ, Saulu akĩnyita ruuno rwa igooti rĩake rĩtarĩ moko, no rĩgĩtarũka. 28 Nĩ ũndũ ũcio Samueli akĩmwĩra atĩrĩ: “Ũmũthĩ Jehova nĩ atarũra ũthamaki wa Isiraeli kuuma harĩ wee, na nĩ ekũũneana kũrĩ mũndũ ũngĩ mwega gũgũkĩra.+ 29 Ningĩ, ũrĩa Mũgaathe wa Isiraeli+ ndegũtuĩka wa maheeni+ kana ericũkwo,* tondũ We ti mũndũ atĩ nĩ ekwĩricũkwo.”*+

30 Nĩ ũndũ ũcio akiuga atĩrĩ: “Nĩ njĩhĩtie. No rĩrĩ, ndagũthaitha ũnyonie gĩtĩo mbere ya athuri* a andũ akwa na mbere ya andũ a Isiraeli. Nĩ tũcoke nawe, na nĩ ngũinamĩrĩra Jehova Ngai waku.”+ 31 Samueli agĩgĩcoka arũmĩrĩire Saulu, na Saulu akĩinamĩrĩra Jehova. 32 Nake Samueli akiuga ũũ: “Rehe Agagi mũthamaki wa Amaleki hakuhĩ na niĩ.” Agagi agĩgĩthiĩ kũrĩ we ekururĩtie,* nĩ gũkorũo Agagi eeĩraga atĩrĩ: ‘Hatarĩ nganja nĩ njehereire ũgwati wa gĩkuũ.’ 33 No Samueli akiuga ũũ: “O ta ũrĩa rũhiũ rwaku rwa njora rũtũmĩte atumia makuĩrũo nĩ ciana, noguo nake maitũguo egũkorũo akuĩrĩirũo o na makĩria ma atumia arĩa angĩ.” Samueli arĩkia kuuga ũguo, agĩtinangia Agagi icunjĩ mbere ya Jehova kũu Giligali.+

34 Samueli agĩthiĩ Rama, nake Saulu akĩambata agĩthiĩ gwake mũciĩ Gibea ya Saulu. 35 Samueli ndoonire Saulu rĩngĩ nginya mũthenya ũrĩa aakuire, nĩ gũkorũo Samueli nĩ aacakayagĩra Saulu.+ Na Jehova akĩĩrira nĩ ũndũ wa gũtua Saulu mũthamaki wa Isiraeli.+