Maũndũ Marĩa Meekirũo nĩ Atũmwo
22 “Athuri aya, ariũ a baba na maithe maitũ, thikĩrĩriai ngĩĩtetera mbere yanyu rĩu.”+ 2 Rĩrĩa maaiguire akĩmaarĩria na rũthiomi rwa Kĩhibirania, magĩkira o na makĩria, nake akiuga ũũ: 3 “Niĩ ndĩ Mũyahudi+ ũciarĩirũo Tariso ya Kilikia,+ no thomeire itũũra-inĩ rĩrĩ, ngathomithio magũrũ-inĩ ma Gamalieli,+ ngataarũo kũrũmia biũ Watho wa maithe maitũ ma tene,+ na ngoretwo na kĩyo harĩ wĩra wa Ngai o ta ũrĩa inyuothe mũtariĩ ũmũthĩ.+ 4 Nĩ ndanyariraga arũmĩrĩri a Njĩra ĩno, ngatũma moragwo, ngamoha na ngamaneana maikio njera, arũme o na atumia+ 5 o ta ũrĩa mũthĩnjĩri-Ngai ũrĩa mũnene o hamwe na athuri othe mangĩruta ũira. Ningĩ nĩ maaheire marũa ndwarĩre ariũ a baba a Dameski, na hĩndĩ ĩyo ndarĩ njĩra-inĩ kũgĩĩra arĩa maarĩ kũu ndĩmarehe Jerusalemu mohetwo nĩguo maherithio.
6 “No rĩrĩa ndathiaga ndĩ hakuhĩ Dameski, ta thaa thita cia mũthenya, ũtheri mũnene ũkiuma igũrũ o rĩmwe ũkĩĩmũrĩka mĩena yothe,+ 7 ngĩgwa thĩ na ngĩigua mũgambo ũkĩnjũria atĩrĩ: ‘Saulu, Saulu, ũraanyarira nĩkĩ?’ 8 Ngĩũria atĩrĩ: ‘Nĩ we ũ, Mwathani?’ Akĩnjokeria: ‘Nĩ niĩ Jesu Mũnazarethi, ũrĩa ũranyarira.’ 9 Na rĩrĩ, andũ arĩa twatwaranĩte nao nĩ moonire ũtheri ũcio, ĩndĩ matiaiguire mũgambo wa ũrĩa wanjaragĩria. 10 Niĩ ngĩkĩmũũria atĩrĩ: ‘Mwathani, njagĩrĩirũo nĩ gwĩka atĩa?’ Mwathani akĩnjokeria: ‘Ũkĩra, ũtonye Dameski, wakinya kũu nĩ ũkwĩrũo maũndũ mothe marĩa wathĩrĩirũo gwĩka.’+ 11 No tondũ ndingĩahotire kuona o na hanini nĩ ũndũ wa riri wa ũtheri ũcio-rĩ, ndakinyire Dameski nyitĩtwo guoko nĩ acio twatwaranĩte nao.
12 “Nake mũndũ ũmwe wetagwo Anania, wetigĩrĩte Ngai mũno kũringana na Watho, na nĩ aagaathagĩrĩrio nĩ Ayahudi othe arĩa maaikaraga kũu, 13 agĩũka kũrĩ niĩ. Akĩrũgama harĩa ndarĩ na akĩnjĩra: ‘Mũrũ wa Ithe witũ Saulu, coka kuona rĩngĩ!’ Na o hĩndĩ ĩyo ngĩtiira maitho na ngĩmuona.+ 14 Akĩnjĩra ũũ: ‘Ngai wa maithe maitũ ma tene nĩ agũthuurĩte ũmenye wendi wake na wone ũrĩa mũthingu+ na ũigue mũgambo wa kanua gake, 15 tondũ ũgũtuĩka mũira wake kũrĩ andũ othe ũhoro-inĩ wa maũndũ marĩa wonete na ũkaigua.+ 16 Na rĩu-rĩ, nĩ kĩĩ wetereire? Ũkĩra, ũbatithio, na wĩthambe mehia maku+ mathire na njĩra ya gũkaĩra rĩĩtwa rĩake.’+
17 “No rĩrĩa ndacokire Jerusalemu,+ ndĩ hekarũ-inĩ ngĩhoya ngĩona kĩoneki 18 na ngĩona Mwathani akĩnjĩra atĩrĩ: ‘Hiũha uume Jerusalemu na ihenya, tondũ matigwĩtĩkĩra ũira waku ũnjĩgiĩ.’+ 19 Na niĩ ngĩmwĩra: ‘Mwathani, o ene nĩ moĩ wega atĩ nĩ ndathiaga kuuma thunagogi ĩmwe nginya ĩrĩa ĩngĩ, ngĩikagia arĩa magwĩtĩkĩtie njera ngĩmahũũraga;+ 20 na rĩrĩa thakame ya Stefano mũira waku yaitagwo, niĩ mwene ndarũgamĩte hau na ngĩnyita ũndũ ũcio mbaru na ngĩrangĩra nguo cia igũrũ cia arĩa maamũũragaga.’+ 21 O na kũrĩ ũguo, akĩnjĩra: ‘Thiĩ, tondũ nĩ ngũgũtũma kũrĩ ndũrĩrĩ kũndũ kũraya mũno.’”+
22 Nao magĩikara mamũthikĩrĩirie nginya akĩrĩkia ciugo icio. Magĩcoka makĩanĩrĩra makiuga: “Eheriai mũndũ ũcio gũkũ thĩ, nĩ gũkorũo ndagĩrĩire gũtũũra!” 23 Na tondũ nĩ maanagĩrĩra, magĩteangaga nguo ciao cia igũrũ, na makahuria rũkũngũ rĩera-inĩ,+ 24 mũtongoria wa mbũtũ agĩathana Paulo atonyio nyũmba-inĩ cia thigari na akiuga ahũngwo mahũri akĩhũũragwo iboko, nĩguo amenye wega kĩrĩa gĩatũmaga kĩrĩndĩ kiugĩrĩrie Paulo na njĩra ĩyo. 25 No rĩrĩa maamuohire nĩguo mamũhũũre, Paulo akĩũria mũnene ũcio wa thigari warũgamĩte hau atĩrĩ: “Hihi nĩ ũndũ mwĩtĩkĩrĩku mũhũũre Mũroma* iboko atarĩ mũtuĩre?”*+ 26 Rĩrĩa mũnene ũcio wa mbũtũ aaiguire ũguo, agĩthiĩ kũrĩ mũtongoria wa mbũtũ akĩmwĩra ũhoro ũcio, na akĩmũũria: “Ũbangĩte gwĩka atĩa? Nĩ gũkorũo mũndũ ũyũ nĩ Mũroma.” 27 Kwoguo mũtongoria ũcio wa mbũtũ agĩthiĩ harĩ we akĩmũũria: “Ta njĩĩra atĩrĩ, wee ũrĩ Mũroma?” Nake akĩmũcokeria: “Ĩĩ.” 28 Mũtongoria ũcio wa mbũtũ akĩmwĩra: “Ndarĩhire mbeca nyingĩ mũno nĩguo nduĩke raiya wa Roma.” Paulo akĩmwĩra: “No niĩ ndaciarirũo ndĩ Mũroma.”+
29 O hĩndĩ ĩyo, arũme arĩa meendaga kũmũhũnga mahũri na kũmũhũũra iboko magĩtigana nake; nake mũtongoria ũcio wa mbũtũ agĩĩtigĩra thutha wa kũmenya atĩ Paulo aarĩ Mũroma na nĩ aamuohete na mĩnyororo.+
30 Nĩ ũndũ ũcio, mũthenya ũrĩa warũmĩrĩire, tondũ nĩ eendaga kũmenya wega kĩrĩa gĩatũmĩte Ayahudi mamũthitange, akĩmuohora na agĩatha anene a athĩnjĩri-Ngai hamwe na Sanhedrini yothe magomane. Agĩcoka agĩtwara Paulo hau maagomanĩte na akĩmũrũgamia gatagatĩ-inĩ kao.+