Maũndũ Marĩa Meekirũo nĩ Atũmwo
26 Agiripa+ akĩra Paulo atĩrĩ: “Rĩu ũrĩ na rũtha rwa kwĩyarĩrĩria.” Nake Paulo agĩtambũrũkia guoko agĩĩtetera akiuga ũũ:
2 “Mũthamaki Agiripa, ha ũhoro wa maũndũ marĩa mothe thitangĩirũo nĩ Ayahudi-rĩ,+ ũmũthĩ niĩ ndĩ mũkenu nĩ gũkorũo ndĩ mbere yaku nĩguo ndĩtetere, 3 na makĩria nĩ gũkorũo wee nĩ ũĩ wega biũ mĩtugo ya Ayahudi na maũndũ marĩa makararanagĩria. Nĩ ũndũ ũcio, ndĩrakũũria ũũthikĩrĩrie ũtegũthethũka.
4 “Mũtũũrĩre wakwa kuuma ũnyinyi-inĩ wakwa, ndĩ gatagatĩ-inĩ ka andũ aitũ* na ndĩ Jerusalemu nĩ ũĩkaine wega nĩ Ayahudi othe+ 5 arĩa twamenyanĩte nao, na angĩkorũo no mende kũruta ũira, niĩ ndatũũraga ndĩ Mũfarisai,+ ngarũmia maũndũ ma gĩkundi gitũ kĩa nyamũkano, kĩrĩa kĩrũmagia biũ maũndũ ma ũthathaiya witũ.+ 6 No rĩu ndĩraciirithio nĩ ũndũ wa gũkorũo na kĩĩrĩgĩrĩro harĩ kĩĩranĩro kĩrĩa Ngai eerĩire maithe maitũ ma tene;+ 7 kĩĩranĩro o kĩrĩa mĩhĩrĩga itũ 12 ĩrĩgĩrĩire kuona gĩkĩhinga, magakĩrutĩra Ngai ũtungata mũtheru na kĩyo ũtukũ na mũthenya. Atĩrĩrĩ wee Mũthamaki, kĩĩrĩgĩrĩro kĩu nĩkĩo Ayahudi marathitangĩra.+
8 “Nĩ kĩĩ gĩtũmaga muone ũrĩ* ũndũ mũritũ gwĩtĩkia atĩ Ngai nĩ ariũkagia arĩa akuũ? 9 Niĩ kũrĩ hĩndĩ ndetĩkĩtie biũ atĩ ndagĩrĩirũo gwĩka ũrĩa wothe ingĩahotire gũkararia rĩĩtwa rĩa Jesu ũrĩa Mũnazarethi. 10 Na ũguo nĩguo ndekaga thĩinĩ wa Jerusalemu, na tondũ nĩ ndaheetwo rũtha nĩ anene a athĩnjĩri-Ngai,+ nĩ ndaikagia njera andũ aingĩ arĩa aamũre;+ na gwakinya hĩndĩ yao ya kũũragwo, nganyita ũndũ ũcio mbaru.* 11 Nĩ ndamaherithagia kaingĩ thĩinĩ wa thunagogi ciothe, ngageria mũno kũmahatĩrĩria matigane na wĩtĩkio wao; na tondũ nĩ ndarakaragio mũno nĩo, ndathiaga kũmanyarira nginya matũũra-inĩ ma kũngĩ.
12 “Hĩndĩ ĩmwe rĩrĩa ndathiaga Dameski gwĩka maũndũ macio heetwo wĩra na wathani nĩ anene a athĩnjĩri-Ngai, 13 ndĩ njĩra-inĩ thaa thita cia mũthenya wee Mũthamaki, ngĩona ũtheri mũnene ũkĩrĩte wa riũa ũkiuma igũrũ, ũkĩĩmũrĩka mĩena yothe na ũkĩmũrĩka arĩa twathiaga nao.+ 14 Tũkĩgwa thĩ ithuothe na ngĩigua mũgambo wanjĩĩra ũũ na Kĩhibirania: ‘Saulu, Saulu, ũraanyarira nĩkĩ? Wathiĩ na mbere kũhũũra mĩcengi* haati wee nĩwe ũkũgurara.’ 15 Ngĩũria atĩrĩ: ‘Nĩ we ũ, Mwathani?’ Nake akĩnjokeria: ‘Nĩ niĩ Jesu, ũrĩa ũranyarira.’ 16 No rũgama wĩhande na magũrũ maku. Ndakuumĩrĩra nĩguo ngũthuure ũtuĩke ndungata na mũira wa maũndũ marĩa wĩyoneire na marĩa ngũkuonia megiĩ ũhoro wakwa.+ 17 Na nĩ ngũkũhonokia kuuma harĩ andũ aya na kuuma harĩ andũ a ndũrĩrĩ, arĩa ndĩragũtũma kũrĩ o+ 18 ũkamahingũre maitho,+ ũmarute nduma-inĩ+ ũmarehe ũtheri-inĩ+ na ũmarute wathani-inĩ wa Shaitani+ ũmarehe harĩ Ngai, nĩguo moherũo mehia+ na maamũkĩre igai hamwe na arĩa matheretio nĩ wĩtĩkio wao harĩ niĩ.’
19 “Nĩ ũndũ ũcio, Mũthamaki Agiripa, ndiaregire gwathĩkĩra kĩoneki kĩu ndonire kuuma igũrũ, 20 ĩndĩ ndaheanire ndũmĩrĩri ngĩambĩrĩria na andũ a Dameski,+ ngĩcoka ngĩkinyĩria andũ a Jerusalemu,+ na bũrũri wothe wa Judea, na nginya kũrĩ ndũrĩrĩ ciothe ngĩmeera atĩ magĩrĩirũo kwĩrira na macokerere Ngai na njĩra ya gwĩka ciĩko ironania atĩ nĩ merirĩte.+ 21 Kĩu nĩkĩo gĩatũmire Ayahudi maanyite ndĩ thĩinĩ wa hekarũ na magerie kũnjũraga.+ 22 O na kũrĩ ũguo, tondũ nĩ nyamũkĩrĩte ũteithio ũrĩa uumaga kũrĩ Ngai-rĩ, thiĩte na mbere o nginya ũmũthĩ ũyũ kũruta ũira kũrĩ arĩa anini na arĩa anene, itekuongerera ũndũ o na ũmwe harĩ marĩa Anabii na Musa mooigĩte nĩ mangĩgekĩka+— 23 atĩ Kristo nĩ angĩkanyarirũo+ na atĩ arĩ we wa mbere kũriũkio kuuma kũrĩ arĩa akuũ,+ nĩ angĩkahunjia ũhoro wa ũtheri kũrĩ andũ aya na kũrĩ ndũrĩrĩ.”+
24 Na rĩrĩ, hĩndĩ ĩrĩa Paulo ooigaga maũndũ macio agĩĩtetera-rĩ, Fesito akiuga na mũgambo mũnene: “Paulo nĩ kũgũrũka ũgũrũkĩte! Gĩthomo kĩu gĩaku kĩingĩ nĩ kĩratũma ũgũrũke!” 25 No Paulo akiuga: “Mũgaathe Fesito niĩ ndigũrũkĩte, no ndĩraria ciugo cia ma na cia mũndũ ũrĩ na meciria mega. 26 Na ũrĩa kũrĩ nĩ atĩ, mũthamaki ũrĩa ndĩraria nake ndĩ na wĩyathi mũingĩ nĩ oĩ maũndũ macio; ndĩ na ma gũtirĩ ũndũ o na ũmwe wa macio atoĩ, tondũ gũtirĩ wĩkĩirũo hitho-inĩ.+ 27 Mũthamaki Agiripa, hihi wee nĩ wĩtĩkĩtie Anabii? Nĩ njũĩ atĩ nĩ wĩtĩkĩtie.” 28 No Agiripa akĩra Paulo: “Kahinda o kanini tu, wee wahota kũnjiguithia ũtũme nduĩke Mũkristiano.” 29 Hĩndĩ ĩyo Paulo akiuga: “Kana nĩ kahinda kanini kana nĩ karaya, ingĩhoya Ngai atĩ to wee wiki, ĩndĩ nginya arĩa othe maranjigua ũmũthĩ mahaanane na niĩ, o tiga cioho ici cia njera.”
30 Mũthamaki agĩcoka akĩrũgama, na ngavana na Berinike o nao, na arũme arĩa maaikarĩte thĩ hamwe nao. 31 No rĩrĩa mooimaga, makĩambĩrĩria kwĩrana o ene atĩrĩ: “Gũtirĩ ũndũ mũndũ ũyũ areka wa gũtũma oragwo kana ohwo njera.”+ 32 Agiripa agĩcoka akĩra Fesito: “Korũo mũndũ ũyũ ndaacokirie ciira riiko kũrĩ Kaisari,+ nĩ angĩarekererio.”