Marũa ma Mbere Kũrĩ Athesalonike

1 Nĩ niĩ Paulo, tũrĩ na Silvano,*+ na Timotheo,+ kũrĩ kĩũngano kĩa Athesalonike, o kĩu kĩrĩ na ũiguano na Ngai Ithe witũ, na Mwathani Jesu Kristo:

Mũrogĩa na ũtugi mũnene na thayũ.

2 Nĩ tũcokagĩria Ngai ngatho hĩndĩ ciothe rĩrĩa tũkũmũgweta inyuothe mahoya-inĩ maitũ,+ 3 nĩ gũkorũo nĩ tũririkanaga hingo ciothe wĩra wanyu wa wĩhokeku, wĩra wanyu mũritũ wa wendo, na ũkirĩrĩria wanyu nĩ ũndũ wa kĩĩrĩgĩrĩro kĩanyu+ thĩinĩ wa Mwathani witũ Jesu Kristo tũrĩ mbere ya Ngai o we Ithe witũ. 4 Nĩ gũkorũo inyuĩ ariũ a Ithe witũ mwendetwo nĩ Ngai, nĩ tũĩ atĩ nĩwe wamũthuurire, 5 tondũ ũhoro mwega ũrĩa tũhunjagia ndwakinyire kũrĩ inyuĩ na ciugo theri no wamũkinyĩire ũrĩ na hinya, na roho mũtheru, na ũũma mũrũmu, o ta ũrĩa mũĩ twatuĩkire andũ a mũthemba ũrĩkũ tũrĩ gatagatĩ-inĩ kanyu nĩ ũndũ wanyu. 6 Na mũgĩtuĩka a kwĩgerekania na ithuĩ+ na a kwĩgerekania na Mwathani,+ kuona atĩ nĩ mwetĩkĩrire kiugo rungu rwa mathĩna maingĩ+ mũrĩ na gĩkeno kĩa roho mũtheru, 7 na kwoguo mũgĩtuĩka kĩonereria harĩ arĩa othe metĩkĩtie thĩinĩ wa Makedonia na Akaia.

8 Ma nĩ atĩ, to kũmenyithania mũmenyithanĩtie kiugo kĩa Jehova* Makedonia na Akaia, ĩndĩ o na wĩtĩkio wanyu harĩ Ngai nĩ ũmenyekete kũndũ guothe,+ ũũ atĩ tũtirabatara kuuga ũndũ o na ũrĩkũ. 9 Nĩ gũkorũo o ene maikaraga makiugaga ũhoro wĩgiĩ rĩrĩa twacemanirie na inyuĩ riita rĩa mbere na ũrĩa mwatiganire na mĩhianano yanyu+ nĩguo mũtuĩke ngombo cia Ngai ũrĩa wa ma ũtũũraga muoyo, 10 na nĩguo mwetagĩrĩre Mũrũwe kuuma igũrũ,+ ũrĩa aariũkirie kuuma kũrĩ arĩa akuũ, nĩwe Jesu, o we ũtũhonokagia kuuma harĩ mangʼũrĩ marĩa maroka.+