Athamaki wa Mbere
19 Thutha ũcio Ahabu+ akĩra Jezebeli+ maũndũ mothe marĩa Elija eekĩte na ũrĩa ooragĩte anabii othe na rũhiũ rwa njora.+ 2 Kwoguo Jezebeli agĩtũma mũtũmwo kũrĩ Elija akamwĩre atĩrĩ: “Nĩ ũndũ wa ũguo-rĩ, ngai irondũithia na ciĩke ũguo o na makĩria angĩkorũo gũkinyĩria rũciũ ihinda-inĩ ta rĩrĩ ndigaakorũo ngũtuĩte ta o ũmwe wao!” 3 Aigua ũguo agĩĩtigĩra, agĩũkĩra na akĩũra nĩguo athare muoyo* wake.+ Agĩthiĩ Biri-shiba+ ĩrĩa ya Juda,+ na agĩtiga ndungata yake kuo. 4 Agĩthiĩ rũgendo rwa mũthenya ũmwe nginya werũ-inĩ na akinya agĩikara thĩ rungu rwa mũtĩ wa mwethia, na akĩhoya akue. Akiuga ũũ: “Nĩ ũguo rĩu! Wee Jehova, rĩu nduta muoyo,*+ nĩ gũkorũo ndirĩ mwega gũkĩra maithe maitũ ma tene.”
5 Agĩcoka agĩkoma thĩ na akĩnyitwo nĩ toro hau rungu rwa mũtĩ ũcio wa mwethia. No o rĩmwe mũraika akĩmũhutia+ akĩmwĩra atĩrĩ: “Ũkĩra ũrĩe.”+ 6 Rĩrĩa aarorire, akĩona hau hakuhĩ na mũtwe wake harĩ na mũgate wa gĩthiũrũrĩ ũrĩ igũrũ rĩa mahiga mahiũ na njagi ya maĩ. Akĩrĩa na akĩnyua na agĩkoma o rĩngĩ. 7 Thutha-inĩ mũraika wa Jehova agĩcoka riita rĩa kerĩ na akĩmũhutia akĩmwĩra ũũ: “Ũkĩra ũrĩe, nĩ gũkorũo rũgendo nĩ rũgũkũritũhĩra mũno.” 8 Nĩ ũndũ ũcio agĩũkĩra na akĩrĩa na akĩnyua, na arĩ na hinya ũrĩa aagĩire arĩa irio icio, agĩthiĩ rũgendo rwa thikũ 40 ũtukũ na mũthenya nginya agĩkinya Horebu, kĩrĩma kĩa Ngai ũrĩa wa ma.+
9 Na arĩ kũu akĩingĩra ngurunga-inĩ+ na akĩraara kuo; na atĩrĩrĩ, kiugo kĩa Jehova gĩkĩmũkinyĩra akĩũrio atĩrĩ: “Elija, nĩ kĩĩ ũreka gũkũ?” 10 Nĩ ũndũ ũcio akiuga ũũ: “Ngoretwo na kĩyo biũ nĩ ũndũ wa Jehova Ngai mũnene wa ita;+ nĩ gũkorũo andũ a Isiraeli nĩ matiganĩirie kĩrĩkanĩro gĩaku,+ makamomora igongona ciaku, na makoraga anabii aku na rũhiũ rwa njora,+ na no niĩ tu ndigarĩte. Rĩu maracaria ũrĩa mekũnduta muoyo.”*+ 11 No Akiuga atĩrĩ: “Uma ũthiĩ ũrũgame kĩrĩma-inĩ mbere ya Jehova.” Na atĩrĩrĩ, Jehova nĩ kũhĩtũka aahĩtũkaga,+ na rũhuho rũnene rũrĩ na hinya rwamethũrangaga irĩma na rũgaatũranga ndũmba cia mahiga mbere ya Jehova,+ no Jehova ndaarĩ rũhuho-inĩ rũu. Thutha wa rũhuho gũkĩgĩa gĩthingithia,+ no Jehova ndaarĩ gĩthingithia-inĩ kĩu. 12 Thutha wa gĩthingithia kĩu gũkĩgĩa mwaki,+ no Jehova ndaarĩ mwaki-inĩ ũcio. Thutha wa mwaki ũcio, gũkĩiguĩka mũgambo mũnini mũhooreru.+ 13 Rĩrĩa Elija aaiguire mũgambo ũcio, o rĩo akĩĩhumbĩra ũthiũ na nguo yake,*+ akiuma nja na akĩrũgama mũromo-inĩ wa ngurunga ĩyo. Naguo mũgambo ũkĩmũũria atĩrĩ: “Elija, nĩ kĩĩ ũreka gũkũ?” 14 Nĩ ũndũ ũcio akiuga ũũ: “Ngoretwo na kĩyo biũ nĩ ũndũ wa Jehova Ngai mũnene wa ita; nĩ gũkorũo andũ a Isiraeli nĩ matiganĩirie kĩrĩkanĩro gĩaku,+ makamomora igongona ciaku, na makoraga anabii aku na rũhiũ rwa njora, na no niĩ tu ndigarĩte. Rĩu maracaria ũrĩa mekũnduta muoyo.”*+
15 Jehova akĩmwĩra atĩrĩ: “Coka, ũthiĩ werũ-inĩ wa Dameski. Wakinya kuo, ũitĩrĩrie Hazaeli+ maguta atuĩke mũthamaki wa Siria. 16 Na ũitĩrĩrie Jehu+ mũcũkũrũ wa* Nimushi maguta atuĩke mũthamaki wa Isiraeli, na ũitĩrĩrie Elisha* mũrũ wa Shafati wa kuuma Abeli-mehola maguta nĩgetha atuĩke mũnabii ithenya rĩaku.+ 17 Mũndũ o wothe ũgeethara kuuma harĩ rũhiũ rwa njora rwa Hazaeli,+ Jehu nĩ akaamũũraga;+ na mũndũ o wothe ũgeethara kuuma harĩ rũhiũ rwa njora rwa Jehu, Elisha nĩ akaamũũraga.+ 18 Na no ndigairie andũ 7,000 thĩinĩ wa Isiraeli,+ arĩa mataturĩirie Baali+ maru na matamũmumunyĩte na tũnua twao.”+
19 Agĩkiuma kũu agĩthiĩ na agĩkora Elisha mũrũ wa Shafati akĩrĩma na ikundi 12 cia ndegwa igĩrĩ igĩrĩ irĩ mbere yake, na we aarĩ na gĩkundi gĩa 12. Kwoguo Elija agĩthiĩ harĩ we na akĩmũikĩria nguo yake.*+ 20 Nĩ ũndũ ũcio agĩtiga ndegwa icio agĩtengʼera harĩ Elija akĩmwĩra atĩrĩ: “Ndagũthaitha ũreke ngamumunye baba na maitũ. Thutha ũcio nĩ ngũkũrũmĩrĩra.” Nake akĩmũcokeria ũũ: “Thiĩ, coka, nĩ ũndũ-rĩ, nĩ atĩa njĩkĩte wa gũkũgiria?” 21 Agĩgĩcoka na akĩoya ndegwa igĩrĩ na agĩciruta igongona, na akĩhũthĩra mũraũ gũtherũkia nyama ya ndegwa icio na akĩhe andũ makĩrĩa. Thutha ũcio agĩũkĩra na akĩrũmĩrĩra Elija na akĩambĩrĩria kũmũtungatĩra.+