Ezekieli

10 Na rĩrĩa ndarorire, ngĩona kĩndũ gĩatariĩ ta ihiga rĩa safia igũrũ rĩa mũtambũrũko ũrĩa warĩ igũrũ rĩa mĩtwe ya akerubi acio, na mũhianĩre wakĩo wahaanaga ta gĩtĩ kĩa ũnene.+ 2 Nake akĩra mũndũ ũcio wehumbĩte nguo ya gatani atĩrĩ:+ “Tonya gatagatĩ-inĩ ka magũrũ macio marathiũrũrũka,+ rungu rwa akerubi, ũiyũrie moko maku makara marakana+ kuuma gatagatĩ-inĩ ka akerubi acio, ũcoke ũmaikie igũrũ rĩa itũũra rĩu.”+ Nĩ ũndũ ũcio, agĩtonya o ndĩroreire.

3 Nao akerubi acio maarũgamĩte mwena wa ũrĩo wa nyũmba hĩndĩ ĩrĩa mũndũ ũcio aatonyire, na itu rĩkĩiyũra nja ĩrĩa nini. 4 Naguo riri wa Jehova+ ũkĩambata kuuma harĩ akerubi acio ũgĩthiĩ mũrango-inĩ wa nyũmba ĩyo, na o kahora nyũmba ĩyo ĩkĩiyũra itu,+ nayo nja ĩkĩiyũra ũtheri wa riri wa Jehova. 5 Na mũgambo wa mathagu ma akerubi nĩ waiguĩkaga nja ĩrĩa nene, o ta mũgambo wa Ngai Mwene-Hinya-Wothe hĩndĩ ĩrĩa ekwaria.+

6 Agĩcoka agĩatha mũndũ ũcio wehumbĩte nguo ya gatani akĩmwĩra ũũ: “Oya mwaki kuuma gatagatĩ-inĩ ka magũrũ macio marathiũrũrũka, kuuma gatagatĩ-inĩ ka akerubi,” nake agĩtonya na akĩrũgama hakuhĩ na kũgũrũ kũmwe kwa macio. 7 Kerubi ũmwe wa acio agĩtambũrũkia guoko mwaki-inĩ ũrĩa warĩ gatagatĩ-inĩ ka akerubi acio.+ Agĩtahia mwaki na akĩwĩkĩra moko-inĩ meerĩ ma mũndũ ũcio wehumbĩte nguo ya gatani,+ nake akĩwoya na akiuma. 8 Akerubi acio maarĩ na kĩndũ kĩarĩ na mũhianĩre ta wa moko ma andũ rungu rwa mathagu mao.+

9 Na rĩrĩa ndarorire, ngĩona magũrũ mana ma ngaari mwena-inĩ wa akerubi acio, kũgũrũ kũmwe mwena-inĩ wa o kerubi, na magũrũ macio moonekaga makĩhenia ta ihiga rĩa krisolito.+ 10 Na ha ũhoro wa mũhianĩre wamo, mothe mana nĩ maahaanaine, na moonekaga ta o kũgũrũ kwaharũkĩte thĩinĩ wa kũngĩ. 11 Na magĩthiĩ, maathiaga mwena o wothe harĩ mĩena yothe ĩna matekũgarũrũka, tondũ maathiaga na kũrĩa mũtwe warora matekũgarũrũka. 12 Mĩĩrĩ yao yothe, mĩgongo yao, moko mao, mathagu mao, na magũrũ, o macio maarĩ mĩena-inĩ yao othe ana, maaiyũire maitho kũndũ guothe.+ 13 Na ha ũhoro wa magũrũ macio-rĩ, ngĩigua mũgambo wanĩrĩra ũkĩmeera ũũ, “Magũrũ marĩa marathiũrũrũka, ambatai!”

14 O ũmwe wao* aarĩ na mothiũ mana. Ũthiũ wa mbere warĩ ũthiũ wa kerubi, wa kerĩ warĩ ũthiũ wa mũndũ, wa gatatũ warĩ ũthiũ wa mũrũthi, na wa kana warĩ ũthiũ wa nderi.+

15 Na akerubi acio nĩ maambataga na igũrũ—na no o ciũmbe irĩ muoyo* iria ndonete rĩrĩa ndarĩ rũũĩ-inĩ rwa Kebari+— 16 na akerubi acio mathiĩ, magũrũ macio maatwaranaga nao; na akerubi acio maambararia mathagu mombũke na igũrũ, magũrũ macio matiagarũrũkaga kana makoima mĩena-inĩ yao.+ 17 Hĩndĩ ĩrĩa maarũgama, o namo makarũgama; na rĩrĩa maambata na igũrũ, o namo makambata hamwe nao, tondũ roho ũrĩa watongoragia ciũmbe icio irĩ muoyo* warĩ thĩinĩ wamo.

18 Naguo riri wa Jehova+ ũkĩehera mũrango-inĩ wa nyũmba ĩyo na ũgĩthiĩ ũgĩikara igũrũ rĩa akerubi acio.+ 19 Nao akerubi acio makĩambararia mathagu mao makiuma thĩ makĩambata na igũrũ o ndĩroreire. Magũrũ macio o namo makĩambata hamwe nao hĩndĩ ĩyo maathiaga. Magĩthiĩ makĩrũgama mũromo-inĩ wa kĩhingo kĩa mwena wa irathĩro kĩa nyũmba ya Jehova, naguo riri wa Ngai wa Isiraeli warĩ igũrũ rĩao.+

20 Ciũmbe icio irĩ muoyo nocio* ndonete rungu rwa Ngai wa Isiraeli rĩrĩa ndarĩ rũũĩ-inĩ rwa Kebari,+ na kwoguo ngĩmenya atĩ maarĩ akerubi. 21 Othe ana maarĩ na mothiũ mana, mathagu mana, na kĩndũ kĩarĩ na mũhianĩre ta wa moko ma andũ rungu rwa mathagu mao.+ 22 Na mũhianĩre wa mothiũ mao watariĩ ta mothiũ marĩa ndonete rĩrĩa ndarĩ rũũĩ-inĩ rwa Kebari.+ O ũmwe wao aathiaga arũngĩrĩirie na mbere.+