Hagai

1 Mwaka-inĩ wa kerĩ wa Mũthamaki Dario, mweri-inĩ wa gatandatũ, mũthenya wa mbere wa mweri ũcio, kiugo kĩa Jehova nĩ gĩokire kũgerera harĩ mũnabii Hagai*+ kũrĩ Zerubabeli+ mũrũ wa Shealitieli, ũrĩa warĩ ngavana wa Juda, na kũrĩ Joshua mũrũ wa Jehozadaku, mũthĩnjĩri-Ngai ũrĩa mũnene, makĩrũo atĩrĩ:

2 “Ũũ nĩguo Jehova mũnene wa ita ekuuga, ‘Andũ aya moigaga atĩrĩ, “Ihinda rĩa gwaka* nyũmba* ya Jehova ti ikinyu.”’”+

3 Na kiugo kĩa Jehova gĩgĩũka o rĩngĩ kũgerera harĩ mũnabii Hagai,+ gĩkiuga atĩrĩ: 4 “Hihi rĩrĩ nĩ ihinda rĩanyu rĩa gũikara nyũmba-inĩ cianyu igemetio na mbaũ, hĩndĩ ĩrĩa nyũmba ĩno yanangĩkĩte?+ 5 Rĩu-rĩ, ũũ nĩguo Jehova mũnene wa ita ekuuga, ‘Mwĩciriei mũno ũhoro wĩgiĩ njĩra cianyu. 6 Nĩ mũhandĩte mbeũ nyingĩ, no mũgethaga o tũnini.+ Nĩ mũrĩaga, no mũtihũnaga. Nĩ mũnyuaga, no mũtinyotokaga. Nĩ mwĩhumbaga nguo, no gũtirĩ mũndũ ũiguaga ũrugarĩ. Ũrĩa ũthũkũmaga aikagia mũcara wake mũhuko-inĩ ũiyũire marima.’”

7 “Ũũ nĩguo Jehova mũnene wa ita ekuuga, ‘Mwĩciriei mũno ũhoro wĩgiĩ njĩra cianyu.’

8 “Jehova oigĩte atĩrĩ, ‘Ambatai kĩrĩma-inĩ mũũke na mbaũ.+ Mwake nyũmba+ ĩno nĩgetha ngenagio nĩyo na ngoocithagio.’”+

9 “‘Inyuĩ mwerĩgagĩrĩra magetha maingĩ no mwaamũkagĩra manini; na rĩrĩa mwamatwara nyũmba-inĩ, nĩ kũhuuha ndamahuuhaga makehera.+ Nĩkĩ hihi? Tondũ nyũmba yakwa nĩ nyanangĩku, ĩndĩ o ũmwe wanyu ahangʼaga akĩrũmbũiya nyũmba yake,’ ũguo nĩguo Jehova mũnene wa ita ekuuga.+ 10 ‘Na kwoguo igũrũ rĩkĩrega gũita ime rĩarĩo, na thĩ ĩkĩrega kũruta maciaro mayo. 11 Ngĩgĩikara ngĩtũmaga bũrũri wanyu na irĩma ciage mbura, ũndũ ũrĩa watũmire kwage ngano,* ndibei njerũ,* maguta, na mĩmera. Inyuĩ nĩ mũrathĩnĩka o hamwe na mahiũ, na wĩra wanyu wothe mũritũ nĩ wa tũhũ.’”

12 Nake Zerubabeli+ mũrũ wa Shealitieli+ na Joshua mũrũ wa Jehozadaku,+ mũthĩnjĩri-Ngai ũrĩa mũnene, na andũ acio angĩ othe magĩthikĩrĩria mũgambo wa Jehova Ngai wao o na ciugo cia mũnabii Hagai, tondũ Jehova Ngai wao nĩwe wamũtũmĩte; nao andũ makĩambĩrĩria gwĩtigĩra nĩ ũndũ wa Jehova.

13 Nake Hagai, ũcio mũtũmwo wa Jehova, akĩhe andũ ndũmĩrĩri ĩno kũringana na ũrĩa eerĩtwo eke nĩ Jehova: “‘Niĩ ndĩ hamwe na inyuĩ andũ aya,’+ ũguo nĩguo Jehova ekuuga.”

14 Nĩ ũndũ ũcio Jehova akĩarahũra roho+ wa Zerubabeli mũrũ wa Shealitieli, ũrĩa warĩ ngavana wa Juda,+ na roho wa Joshua+ mũrũ wa Jehozadaku, mũthĩnjĩri-Ngai ũrĩa mũnene, na roho wa andũ acio angĩ othe; nao magĩũka na makĩambĩrĩria wĩra wa gwaka nyũmba ya Jehova mũnene wa ita, o we Ngai wao.+ 15 Ũndũ ũcio wekĩkire mũthenya wa 24 wa mweri wa gatandatũ mwaka-inĩ wa kerĩ wa Mũthamaki Dario.+