Isaia
13 Ĩno nĩ ndũmĩrĩri nditũ ĩrĩa Isaia+ mũrũ wa Amozu oonire kũgerera kĩoneki ĩkoniĩ Babuloni:+
2 “Handai kĩmenyithia*+ kĩrĩma-inĩ kĩrĩ na mahiga matheri.
Maanĩrĩrei, mũmahenerie na guoko,
Nĩguo matonyere ihingo-inĩ cia arĩa marĩ igweta.
3 Nĩ njathĩte andũ arĩa nyamũrĩte.+
Nĩ njĩtĩte njamba ciakwa cia ita nĩguo cionanie marakara makwa,
Icio ikenaga irĩ na mwĩtĩo.
4 Ta thikĩrĩriai! Mũigue kĩrĩndĩ kĩrĩ irĩma-inĩ;
Kĩraiguĩka ta arĩ kĩrĩndĩ kĩa andũ aingĩ!
Ta thikĩrĩriai! Inegene rĩa ngũĩ rĩa mothamaki,
Rĩa ndũrĩrĩ irũrũnganĩte hamwe!+
Nĩ Jehova mũnene wa ita ũracokanĩrĩria mbũtũ nĩ ũndũ wa mbaara.+
5 Marooka moimĩte bũrũri wa kũraya,+
Kuuma ituri-inĩ cia kũrĩa igũrũ,
Jehova na matharaita ma marakara make,
Nĩguo arehe mwanangĩko thĩinĩ wa thĩ yothe.+
6 Rĩrai, nĩ gũkorũo mũthenya wa Jehova ũrĩ hakuhĩ!
Ũgooka ũtariĩ ta mwanangĩko kuuma kũrĩ Mwene-Hinya-Wothe.+
7 Nĩkĩo moko mothe makoorũo nĩ hinya,
Na ngoro ya mũndũ wothe ĩtweke nĩ ũndũ wa guoya.+
8 Andũ nĩ mamakĩte mũno.+
Maretugutania marĩ na ruo,
O ta mũtumia ũragĩa mwana.
Makarorana marĩ na kĩmako kĩnene,
Na mothiũ magĩakanaga nĩ ũndũ wa kĩeha.
9 Na rĩrĩ, mũthenya wa Jehova nĩ ũroka,
Ũũke ũtarĩ na tha na ũrĩ na mangʼũrĩ o hamwe na marakara mahiũ,
Nĩguo ũtũme bũrũri ũtuĩke kĩndũ gĩa kũguoyohia,+
Na ũniine ehia mathire thĩinĩ waguo.
10 Nĩ gũkorũo njata cia igũrũ o na ikundi ciacio*+
Itikaruta ũtheri wacio;
Riũa rĩkĩratha rĩgaakorũo rĩrĩ na nduma,
Naguo mweri ndũkaaruta ũtheri waguo.
11 Nĩ ngaaciirithia thĩ ĩrĩa ĩikaragwo nĩ ũndũ wa ũũru wayo,+
Na andũ arĩa aganu nĩ ũndũ wa mahĩtia mao.
Nĩ ngaanina mwĩtĩo wa arĩa metũũgagĩria,
Na nyihie mwĩtĩo wa arĩa matarĩ tha.+
12 Nĩ ngaatũma ũkorũo ũrĩ ũndũ mũritũ kuona mũndũ gũkĩra kuona thahabu therie,+
Na ũkorũo ũrĩ ũndũ mũritũ kuona andũ gũkĩra kuona thahabu ya Ofiri.+
13 Nĩkĩo ngaatũma igũrũ rĩinaine,
Nayo thĩ ĩthingithe yehere harĩa ĩkoragwo+
Nĩ ũndũ wa mangʼũrĩ ma Jehova mũnene wa ita mũthenya wa marakara make mahiũ.
14 O ta thiya ĩraahĩtwo na o ta rũũru rũtarĩ na mũndũ wa kũrũcokanĩrĩria,
Noguo o mũndũ agaacoka kũrĩ andũ ao;
O mũndũ akoora acoke bũrũri wao.+
15 Mũndũ wothe ũkooneka agaathecwo atũrĩkanio,
Na ũrĩa wothe ũkaanyitwo akooragwo na rũhiũ rwa njora.+
16 Ciana ciao ikaabacanio ituĩke icunjĩ makĩĩyonagĩra,+
Na indo cia nyũmba ciao ciiywo,
Na atumia ao manyitwo kĩa hinya.
17 Nĩ ngaarahũra Amedi nĩguo mamokĩrĩre,+
O acio matonaga betha ta arĩ kĩndũ
Na matakenagio nĩ thahabu.
19 Na itũũra rĩa Babuloni, rĩrĩa rĩrĩ riri* mũno gũkĩra mothamaki marĩa mangĩ,+
O rĩo ũthaka na mwĩraho wa Akalidei,+
Rĩgaatuĩka o ta Sodomu na Gomora rĩrĩa Ngai aacingʼaũranirie.+
Gũtirĩ Mũarabu ũkaamba hema yake kuo,
O na gũtirĩ arĩithi makaahurũkia ndũũru ciao kuo.
21 Nyamũ cia werũ-inĩ nĩcio igaakomaga kuo;
Nacio nyũmba ciao ikaaiyũra ndundu.
22 Nyamũ iria igambaga ikaarĩragĩra nyũmba-inĩ ciakuo iria ndaya,
Nacio ngui cia gĩthaka nyũmba-inĩ ciakuo iria njega cia athamaki.
Ihinda rĩa itũũra rĩu nĩ rĩkuhĩrĩirie, na matukũ ma rĩo matikongererũo.”+