Ũhoro Mwega Ũrĩa Waandĩkirũo nĩ Luka
20 Mũthenya ũmwe rĩrĩa aarutanaga na akahunjia ũhoro ũrĩa mwega thĩinĩ wa hekarũ, anene a athĩnjĩri-Ngai na andĩki-watho hamwe na athuri magĩthiĩ kũrĩ we 2 makĩmũũria: “Ta twĩre atĩrĩ, wĩkaga maũndũ maya na wathani ũrĩkũ? Kana nũũ ũkũheete wathani ũyũ?”+ 3 Nake akĩmacokeria atĩrĩ: “O na niĩ nĩ ngũmũũria kĩũria, na inyuĩ mũnjokerie: 4 Ũbatithio wa Johana woimĩte igũrũ kana woimĩte kũrĩ andũ?”* 5 Nao makĩĩrana atĩrĩ: “Tũngiuga, ‘Woimĩte igũrũ,’ egũtũũria, ‘Mwakĩagire kũmwĩtĩkia nĩkĩ?’ 6 No tũngiuga, ‘Woimĩte kũrĩ andũ,’ andũ othe nĩ megũtũhũũra na mahiga, nĩ gũkorũo metĩkĩtie atĩ Johana aarĩ mũnabii.”+ 7 Nĩ ũndũ ũcio makĩmũcokeria atĩ matiũĩ kũrĩa aarutĩte. 8 Jesu akĩmeera: “O na niĩ ndikũmwĩra njĩkaga maũndũ maya na wathani ũrĩkũ.”
9 Agĩcoka akĩambĩrĩria kũhe andũ ngerekano ĩno: “Mũndũ ũmwe nĩ aahandire mĩthabibũ mũgũnda-inĩ,+ akĩũkomborithia arĩmi, na agĩthiĩ bũrũri wa kũraya gũikara kuo ihinda iraya.+ 10 Na rĩrĩa hĩndĩ ya magetha yakinyire-rĩ, agĩtũma ngombo kũrĩ arĩmi acio nĩguo mamĩnengere maciaro mamwe ma mũgũnda ũcio wa mĩthabibũ. No rĩrĩ, arĩmi acio makĩmĩhũũra na makĩmĩingata moko matheri.+ 11 No o rĩngĩ agĩtũma ngombo ĩngĩ. Ĩyo o nayo makĩmĩhũũra na makĩmĩconorithia* na makĩmĩingata moko matheri. 12 O rĩngĩ agĩtũma ya gatatũ; o nayo ĩyo makĩmĩtihangia na makĩmĩingata. 13 Mwene mũgũnda ũcio akiuga, ‘Ngwĩka atĩa rĩu? Ngũtũma mũrũ wakwa ũrĩa nyendete.+ No kũhoteke nĩ mekũmũhe gĩtĩo.’ 14 Rĩrĩa arĩmi acio maamuonire, makĩĩrana atĩrĩ, ‘Ũyũ nĩwe mũgai. Nĩ tũmũũragei nĩguo igai rĩtuĩke ritũ.’ 15 Kwoguo makĩmũrutũrũra nja ya mũgũnda ũcio wa mĩthabibũ na makĩmũũraga.+ Hakĩrĩ ũguo-rĩ, mwene mũgũnda ũcio wa mĩthabibũ ageeka arĩmi acio atĩa? 16 Agooka orage arĩmi acio, acoke akomborithie arĩmi angĩ mũgũnda ũcio wa mĩthabibũ.”
Maigua ũguo, makiuga: “Kũroaga gũkanekĩka ũguo!” 17 No we akĩmarora akiuga: “Kaĩ rĩandĩko rĩrĩ rĩkĩendaga kuuga atĩa: ‘Ihiga rĩrĩa aaki maaregire, nĩrĩo rĩtuĩkĩte ihiga rĩrĩa inene rĩa kona’?*+ 18 Mũndũ o wothe ũrĩa ũkaagwĩra ihiga rĩu nĩ akaahehenjwo.+ Nake ũrĩa wothe ũkaagwĩrũo nĩrĩo, nĩ rĩkaamũmemenda.”
19 Nĩ ũndũ ũcio, andĩki-watho na anene a athĩnjĩri-Ngai magĩcaria ũrĩa mangĩmũnyita o hĩndĩ ĩyo tondũ nĩ maamenyire atĩ aaheanire ngerekano ĩyo nĩ ũndũ wao, ĩndĩ nĩ meetigagĩra andũ.+ 20 Na thutha wa kũmũbaara mũno, magĩtũma andũ arĩa o maarĩhĩte na hitho magetue athingu nĩguo mamũtege na mĩario yake,+ nĩgetha mamũneane kũrĩ thirikari na kũrĩ wathani wa ngavana. 21 Nao makĩmwĩra atĩrĩ: “Mũrutani, nĩ tũĩ atĩ waragia ma na ũkarutana ũrĩa kũrĩ, ndũrĩ mũthutũkanio, ĩndĩ ũrutanaga njĩra ya Ngai kũringana na ũrĩa ma ĩtariĩ: 22 Hihi nĩ twagĩrĩire kũrĩha Kaisari magooti kana tũtiagĩrĩire?” 23 No akĩmenya wara wao na akĩmeera: 24 “Ta nyoniai dinari.* Mbica ĩno na maandĩko maya nĩ cia ũ?” Nao makĩmwĩra: “Nĩ cia Kaisari.” 25 Nake akĩmeera: “Nĩ ũndũ ũcio-rĩ, rĩhai Kaisari indo cia Kaisari+ no indo cia Ngai mũrĩhe Ngai.”+ 26 Nĩ ũndũ ũcio makĩremwo nĩ kũmũtega mĩario-inĩ yake mbere ya andũ, no magĩkira ki nĩ ũndũ wa kũgegio nĩ macokio make.
27 No rĩrĩ, Asadukai amwe, arĩa moigaga atĩ andũ matikaariũkio,+ magĩthiĩ kũrĩ we makĩmũũria atĩrĩ:+ 28 “Mũrutani, Musa aatwandĩkĩire atĩrĩ, ‘Mũrũ wa nyina na mũndũ angĩkua, atige mũtumia no akorũo ndararĩ na mwana, mũrũ wa nyina na mũndũ ũcio agĩrĩire kũhikia mũtumia ũcio nĩguo aciarĩre mũrũ wa nyina ciana.’*+ 29 Rĩu-rĩ, kwarĩ na ariũ mũgwanja a nyina ũmwe. Wa mbere akĩhikania no agĩkua atagĩĩte mwana. 30 O na wa kerĩ 31 akĩhikia mũtumia o ũcio, o na wa gatatũ. Na noguo gwathiire harĩ othe mũgwanja; magĩkua matagĩĩte ciana. 32 Mũthia-inĩ mũtumia ũcio o nake agĩkua. 33 Nĩ ũndũ ũcio-rĩ, hĩndĩ ĩrĩa andũ makaariũkio-rĩ, agaatuĩka mũtumia wa ũ? Nĩ gũkorũo nĩ aatuĩkĩte mũtumia wao othe mũgwanja.”
34 Nake Jesu akĩmeera atĩrĩ: “Ciana cia mũtabarĩre ũyũ wa maũndũ* nĩ ihikanagia na ikahika, 35 no andũ arĩa agĩrĩru gũgaatonya mũtabarĩre-inĩ ũcio na kũriũkio kuuma kũrĩ arĩa akuũ matikahikanagia kana makahika.+ 36 O na gũtirĩ hĩndĩ magaakua rĩngĩ, tondũ magaakorũo matariĩ ta araika, na magaakorũo marĩ ciana cia Ngai na njĩra ya gũkorũo marĩ ciana cia ũriũkio. 37 No ha ũhoro wa kũriũkio kwa arĩa akuũ, o na Musa nĩ aaũmenyithanirie ũhoro-inĩ wĩgiĩ kĩhinga kĩrĩa kĩa mĩigua, rĩrĩa eetire Jehova* ‘Ngai wa Iburahimu na Ngai wa Isaaka na Ngai wa Jakubu.’+ 38 We ti Ngai wa arĩa makuĩte, no nĩ wa arĩa marĩ muoyo, nĩ gũkorũo harĩ we* othe marĩ muoyo.”+ 39 Nao andĩki-watho amwe makĩmũcokeria makĩmwĩra: “Mũrutani, nĩ woiga wega.” 40 Nĩ gũkorũo matiarĩ na ũmĩrĩru rĩngĩ wa kũmũũria kĩũria o na kĩmwe.
41 Nake akĩmoria atĩrĩ: “Nĩ kĩĩ gĩtũmaga andũ moige atĩ Kristo nĩ mũrũ wa Daudi?+ 42 Nĩ gũkorũo Daudi we mwene oigĩte ũũ thĩinĩ wa ibuku rĩa Thaburi, ‘Jehova* nĩ eerire Mwathani wakwa ũũ: “Ikara thĩ guoko-inĩ gwakwa kwa ũrĩo 43 nginya rĩrĩa ngaatũma thũ ciaku ituĩke gaturũa ka magũrũ maku.”’+ 44 Kwoguo-rĩ, Daudi amwĩtĩte Mwathani; akĩrĩ mũrũ wake atĩa?”
45 Na hĩndĩ ĩyo andũ othe maamũthikagĩrĩria, akĩra arutwo ake ũũ: 46 “Mwĩmenyagĩrĩrei andĩki-watho arĩa mendete gũthiĩ mehumbĩte kanjũ na mendete kũgeithio nĩ andũ thoko-inĩ na gũikarĩra itĩ cia mbere* thunagogi-inĩ na gũikara handũ harĩa hatĩĩku makĩria maruga-inĩ ma hwaĩ-inĩ,+ 47 na nĩo manyamaragia mĩciĩ ya* atumia a ndigwa, na makahoya mahoya maraihu nĩguo meyonanie. Acio nĩ magaatuĩrũo ituĩro inene makĩria.*