Samueli wa Mbere

31 Na rĩrĩ, Afilisti makĩrũa na Isiraeli.+ Nao arũme a Isiraeli makĩũrĩra Afilisti, na aingĩ ao makĩũragĩrũo Kĩrĩma-inĩ kĩa Giliboa.+ 2 Afilisti magĩgĩthiĩ o makuhĩrĩirie Saulu na ariũ ake, na Afilisti acio makĩũraga Jonathani,+ Abinadabu, na Maliki-shua, ariũ a Saulu.+ 3 Mbaara ĩyo ĩkĩneneha mũno ĩkĩhatĩrĩria Saulu, nao aikia a mĩguĩ makĩmuona, na aikia acio a mĩguĩ makĩmũguraria ũũru mũno.+ 4 Saulu agĩkĩra mũndũ ũrĩa wamũkuuagĩra indo cia mbaara atĩrĩ: “Comora rũhiũ rwaku rwa njora ũndũrĩkanie naruo, nĩgetha arũme aya matarĩ aruu+ matigoke mandũrĩkanie na maanyamarie.”* No mũndũ ũcio wamũkuuagĩra indo cia mbaara ndeendaga gwĩka ũguo, tondũ aarĩ na guoya mũno. Nĩ ũndũ ũcio Saulu akĩoya rũhiũ rwa njora na akĩrũgwĩra.+ 5 Rĩrĩa mũndũ ũcio wamũkuuagĩra indo cia mbaara oonire Saulu nĩ akua,+ o nake akĩgwĩra rũhiũ rwake rwa njora agĩkua hamwe nake. 6 Nĩ ũndũ ũcio Saulu, ariũ ake atatũ, mũndũ ũrĩa wamũkuuagĩra indo cia mbaara, na arũme ake othe magĩkua hamwe mũthenya ũcio.+ 7 Rĩrĩa andũ a Isiraeli arĩa maarĩ gĩcigo-inĩ kĩa mũkuru* na arĩa maarĩ gĩcigo-inĩ kĩa Jorodani moonire atĩ arũme a Isiraeli nĩ mora na atĩ Saulu na ariũ ake nĩ makua, magĩtiganĩria matũũra mao na makĩũra;+ nao Afilisti magĩthiĩ gũikaraga matũũra-inĩ macio.

8 Mũthenya ũyũ ũngĩ rĩrĩa Afilisti maathiire kũbora andũ acio mooragĩtwo, magĩkora Saulu na ariũ ake atatũ marĩ akuũ kũu Kĩrĩma-inĩ kĩa Giliboa.+ 9 Magĩkĩmũrenga mũtwe na makĩoya indo ciake cia mbaara, na magĩtũma ndũmĩrĩri bũrũri-inĩ wothe wa Afilisti atĩ ũhoro ũcio ũtheremio+ nyũmba-inĩ* cia mĩhianano yao+ na gatagatĩ-inĩ ka andũ. 10 Magĩcoka makĩiga indo icio ciake cia mbaara nyũmba-inĩ ya mĩhianano ya Ashitorethu na makĩoherera kĩimba gĩake rũthingo-inĩ rwa Bethi-shani.+ 11 Rĩrĩa aikari a Jabeshi-gileadi+ maaiguire ũrĩa Afilisti meekĩte Saulu, 12 njamba ciothe cia ita ikĩarahũka igĩthiĩ ũtukũ mũgima na ikĩruta mwĩrĩ wa Saulu na mĩĩrĩ ya ariũ ake rũthingo-inĩ rwa Bethi-shani. Na igĩcoka Jabeshi na ikĩmĩcinĩra kuo. 13 Magĩcoka makĩoya mahĩndĩ mao+ makĩmathika rungu rwa mũtĩ wa mũkarakaba kũu Jabeshi,+ na makĩĩhinga kũrĩa thikũ mũgwanja.