Ũhoro Mwega Ũrĩa Waandĩkirũo nĩ Mathayo
20 “Nĩ gũkorũo Ũthamaki wa igũrũ ũtariĩ ta mũndũ mwene mũciĩ ũrĩa woimagarire rũcinĩ tene agĩthiĩ kwandĩka andũ a kũruta wĩra mũgũnda-inĩ wake wa mĩthabibũ.+ 2 Thutha wa kũiguanĩra na aruti wĩra acio atĩ ekũmarĩha dinari* ĩmwe mũthenya, akĩmatũma mũgũnda-inĩ wake wa mĩthabibũ. 3 Ningĩ akiumagara ta thaa ithatũ cia rũcinĩ, akĩona andũ angĩ marũgamĩte thoko-inĩ matarĩ andĩke wĩra; 4 na akĩmeera atĩrĩ, ‘O na inyuĩ thiĩi mũgũnda-inĩ wa mĩthabibũ, na nĩ ngũmũrĩha kĩrĩa kĩmwagĩrĩire.’ 5 Nĩ ũndũ ũcio magĩthiĩ. Ningĩ agĩcoka akiumagara ta thaa thita cia mũthenya na ta thaa kenda cia mũthenya na agĩka o ta ũguo. 6 Mũthia-inĩ, akiumagara ta thaa ikũmi na ĩmwe, agĩkora andũ angĩ marũgamĩte, na akĩmoria atĩrĩ, ‘Mwatinda haha mũrũgamĩte mũthenya wothe mũtarĩ wĩra mũraruta nĩkĩ?’ 7 Makĩmũcokeria ũũ, ‘Nĩ tondũ gũtirĩ mũndũ ũtwandĩkire wĩra.’ Akĩmeera, ‘O na inyuĩ thiĩi mũgũnda-inĩ wa mĩthabibũ.’
8 “Rĩrĩa gwakinyire hwaĩ-inĩ, mwene mũgũnda ũcio wa mĩthabibũ akĩra mũndũ ũrĩa warũgamĩrĩire wĩra atĩrĩ, ‘Ĩta aruti a wĩra ũmarĩhe mũcara wao,+ wambĩrĩrie na arĩa mokire thutha na ũrigie na arĩa mokire mbere.’ 9 Rĩrĩa andũ arĩa mookĩte thaa ikũmi na ĩmwe maakinyire, makĩrĩhwo dinari* ĩmwe o mũndũ. 10 Kwoguo rĩrĩa arĩa mookĩte mbere maakinyire, magĩĩciria atĩ mekũrĩhwo makĩria, ĩndĩ o nao makĩrĩhwo dinari* ĩmwe o mũndũ. 11 Marĩkia kũrĩhwo, makĩambĩrĩria kũnugunĩra mwene mũciĩ 12 makiugaga atĩrĩ, ‘Aya mokire thutha maruta wĩra ithaa rĩmwe; na watũrĩha ũndũ ũmwe nao na ithuĩ twatinda na mĩnoga ya mũthenya mũgima tũkĩhĩa nĩ riũa!’ 13 No agĩcokeria ũmwe wao akĩmwĩra, ‘Mũndũ ũyũ, ndirĩ ũndũ mũũru ndagwĩka. Tũiguanĩire dinari* ĩmwe, kana tiguo?+ 14 Oya kĩrĩa gĩkwagĩrĩire na wĩthiĩre. Nĩ niĩ ndenda kũrĩha acio a thutha o ta ũrĩa ndakũrĩha. 15 Githĩ ndirĩ na kĩhooto gĩa gwĩka ũrĩa ngwenda na indo ciakwa? Kana riitho rĩaku rĩrĩ na ũiru tondũ ndĩ mwega?’*+ 16 Ũguo noguo arĩa a thutha magaatuĩka a mbere nao a mbere matuĩke a thutha.”+
17 Rĩrĩa maambataga merekeire Jerusalemu, Jesu agĩtwara arutwo acio 12 keheri-inĩ akĩmeera ũũ marĩ njĩra-inĩ:+ 18 “Atĩrĩrĩ, twambatĩte twerekeire Jerusalemu, na Mũrũ wa mũndũ nĩ ekũneanwo kũrĩ anene a athĩnjĩri-Ngai na andĩki-watho. Nao nĩ mekũmũtuĩra oragwo+ 19 na mamũneane kũrĩ andũ a ndũrĩrĩ mamũnyũrũrie na mamũhũũre iboko na mamũũragĩre mũtĩ-inĩ;+ na mũthenya wa gatatũ nĩ akaariũkio.”+
20 Na rĩrĩ, nyina wa ariũ a Zebedi+ agĩthiĩ na ariũ ake harĩ Jesu, akĩmũinamĩrĩra akĩenda kũhoya ũndũ mũna kuuma kũrĩ we.+ 21 Nake akĩmũũria: “Ũkwenda atĩa?” Mũtumia ũcio akĩmũcokeria atĩrĩ: “Athana atĩ ariũ aya akwa erĩ magaaikara ũmwe guoko-inĩ gwaku kwa ũrĩo na ũcio ũngĩ kwa ũmotho Ũthamaki-inĩ waku.”+ 22 Jesu agĩcokia ũũ: “Inyuĩ mũtiũĩ kĩrĩa mũrahoya. Hihi no mũhote kũnyuĩra gĩkombe kĩrĩa ngũnyuĩra?”+ Makĩmũcokeria atĩrĩ: “Ĩĩ no tũhote.” 23 Nake akĩmeera atĩrĩ: “Kũnyuĩra nĩ mũkũnyuĩra gĩkombe gĩakwa,+ no ha ũhoro wa gũikara guoko-inĩ gwakwa kwa ũrĩo na kwa ũmotho ti niĩ heanaga, ĩndĩ nĩ wa arĩa mahaarĩrĩirio nĩ Awa.”+
24 Rĩrĩa acio angĩ ikũmi maaiguire ũhoro ũcio, makĩrakarĩra ariũ acio erĩ a nyina ũmwe.+ 25 No rĩrĩ, Jesu akĩmeta harĩ we, akĩmeera: “Inyuĩ nĩ mũĩ atĩ atongoria a ndũrĩrĩ metũũgagĩria igũrũ rĩa andũ nao arĩa marĩ na ũnene mahũthagĩra hinya gwathana igũrũ rĩao.+ 26 Ũguo tiguo kwagĩrĩire gũkorũo gatagatĩ-inĩ kanyu;+ ĩndĩ ũrĩa ũkwenda gũtuĩka mũnene gatagatĩ-inĩ kanyu no mũhaka atuĩke ndungata yanyu,+ 27 nake ũrĩa ũkwenda gũtuĩka wa mbere gatagatĩ-inĩ kanyu no mũhaka atuĩke ngombo yanyu.+ 28 O ta ũrĩa Mũrũ wa mũndũ atookire gũtungatĩrũo, ĩndĩ ookire nĩguo atungate,+ na arute muoyo* wake ũtuĩke ũkũũri nĩ ũndũ wa gũkũũra andũ aingĩ.”+
29 Rĩrĩa mooimaga Jeriko, kĩrĩndĩ kĩnene gĩkĩmũrũmĩrĩra. 30 Na rĩrĩ, andũ erĩ atumumu maaikarĩte thĩ mũkĩra-inĩ wa njĩra makĩigua atĩ Jesu nĩ arahĩtũka, makĩanĩrĩra ũũ: “Mwathani, tũiguĩre tha, Mũrũ wa Daudi!”+ 31 No kĩrĩndĩ gĩkĩmakaania gĩkĩmeera makire; ĩndĩ makĩanĩrĩra makĩria, makiugaga: “Mwathani, tũiguĩre tha, Mũrũ wa Daudi!” 32 Nĩ ũndũ ũcio Jesu akĩrũgama, akĩmeta, na akĩmoria ũũ: “Mũkwenda ndĩmwĩkĩre atĩa?” 33 Makĩmwĩra atĩrĩ: “Mwathani, tũrahoya maitho maitũ mahingũrũo.” 34 Jesu akĩringwo nĩ tha, akĩhutia maitho mao,+ na o hĩndĩ ĩyo makĩhota kuona rĩngĩ, na makĩmũrũmĩrĩra.