Samueli wa Mbere

24 Na rĩrĩ, o hĩndĩ ĩyo Saulu acoka kuuma kũingatithia Afilisti, makĩmwĩra ũũ: “Atĩrĩrĩ, Daudi arĩ werũ-inĩ wa Eni-gedi.”+

2 Nĩ ũndũ ũcio Saulu akĩoya arũme 3,000 mathuurĩtwo kuuma Isiraeli guothe na agĩthiĩ gũcaria Daudi na arũme ake iharũrũka-inĩ cia mahiga cia mbũri cia irĩma-inĩ. 3 Saulu agĩkinya ciugũ-inĩ cia mahiga cia ngʼondu hakuhĩ na barabara, handũ haarĩ na ngurunga, na akĩingĩra gwĩteithia* na hĩndĩ ĩyo Daudi na arũme ake maaikarĩte thĩ mĩĩgitio-inĩ mwena wa thutha wa ngurunga ĩyo.+ 4 Arũme a Daudi makĩmwĩra atĩrĩ: “Ũyũ nĩguo mũthenya ũrĩa Jehova arakwĩra ũũ, ‘Atĩrĩrĩ, nĩ neanĩte thũ yaku guoko-inĩ gwaku,+ na no ũmĩke ũrĩa wothe ũkuona arĩ wega.’” Nĩ ũndũ ũcio Daudi akĩarahũka agĩthiĩ na akĩrenga gĩcũrĩ gĩa kagooti gatarĩ moko ga Saulu na hitho. 5 No thutha-inĩ ngoro* ya Daudi ĩgĩikara ĩkĩmũthecaga+ nĩ ũndũ wa kũrenga gĩcũrĩ gĩa kagooti kau gatarĩ moko ga Saulu. 6 Akĩra arũme ake ũũ: “Nĩ ũndũ ũtangĩtĩkĩrĩka maitho-inĩ ma Jehova atĩ no njĩke mwathi wakwa ũndũ ta ũcio, o we mũitĩrĩrie maguta wa Jehova, na njĩra ya kuoya guoko gwakwa na igũrũ ndĩmũũkĩrĩre, nĩ gũkorũo nĩ mũitĩrĩrie maguta wa Jehova.”+ 7 Nĩ ũndũ ũcio Daudi akĩgirĩrĩria* arũme ake na ciugo icio, na ndaametĩkĩririe matharĩkĩre Saulu. Saulu agĩgĩũkĩra na akiuma ngurunga-inĩ ĩyo agĩĩthiĩra.

8 Nake Daudi agĩũkĩra na akiuma ngurunga-inĩ ĩyo agĩta Saulu anĩrĩire akiuga ũũ: “Mwathi wakwa mũthamaki!”+ Rĩrĩa Saulu eehũgũrire, Daudi akĩinamĩrĩra agĩturumithia ũthiũ wake thĩ aturĩtie maru. 9 Daudi akĩra Saulu atĩrĩ: “Nĩ kĩĩ kĩratũma ũthikĩrĩrie ciugo cia arũme arĩa marakwĩra ũũ, ‘Atĩrĩrĩ, Daudi nĩ aracaria ũrĩa egũkũgera ngero’?+ 10 Mũthenya ũyũ wa ũmũthĩ wee mwene nĩ weyonera na maitho maku ũrĩa Jehova akũneana guoko-inĩ gwakwa ngurunga-inĩ ĩno. No rĩrĩa mũndũ anjĩrire ngũũrage,+ ndakũiguĩra tha na ndoiga atĩrĩ, ‘Ndikuoya guoko gwakwa na igũrũ njũkĩrĩre mwathi wakwa, nĩ gũkorũo nĩ mũitĩrĩrie maguta wa Jehova.’+ 11 Na rĩu baba rora, ĩni, wone gĩcũrĩ gĩkĩ nyitĩte na guoko gĩa kagooti gaku gatarĩ moko; nĩ gũkorũo rĩrĩa nengire gĩcũrĩ gĩa kagooti kau gaku gatarĩ moko, ndinakũũraga. Rĩu kĩone na ũtaũkĩrũo atĩ ndirĩ na muoroto wa gũkũgera ngero kana gũkũremera, na ndikwĩhĩirie,+ no wee no kũnjaria ũranjaria nĩguo ũndute muoyo.*+ 12 Jehova arotua ciira gatagatĩ-inĩ gakwa nawe,+ na Jehova arondĩhĩria harĩ wee,+ no guoko gwakwa gũtigũgũũkĩrĩra.+ 13 O ta ũrĩa thimo ya tene yugaga ũũ, ‘Waganu uumaga harĩ mũndũ mwaganu,’ no guoko gwakwa gũtigũgũũkĩrĩra. 14 Hihi mũthamaki wa Isiraeli okĩte gũũkĩrĩra ũ? Nũũ ũratengʼeria? Ngui nguũ? Thuya ĩmwe?+ 15 Jehova arotuĩka mũtuanĩri ciira, na nĩ egũtua ciira gatagatĩ-inĩ gakwa nawe, na nĩ ekuona na andetere ciira-inĩ wakwa+ anduĩre na aahonokie kuuma guoko-inĩ gwaku.”

16 Na rĩrĩa Daudi aarĩkirie kũmwĩra ciugo icio, Saulu akĩmũũria: “Ũcio nĩ mũgambo waku, mũrũ wakwa Daudi?”+ Saulu agĩkĩambĩrĩria kũrĩra anĩrĩire. 17 Akĩra Daudi ũũ: “Wee ũrĩ mũthingu kũngĩra, tondũ nĩ ũnjĩkĩte maũndũ mega no niĩ ngakũrĩha na maũndũ moru.+ 18 Ũmũthĩ nĩ wamenyithia ũndũ mwega ũcio ũnjĩkĩte wa kwaga kũnjũraga rĩrĩa Jehova aneanire guoko-inĩ gwaku.+ 19 Tondũ rĩrĩ, nĩ mũndũ ũrĩkũ ũkoraga thũ yake na akareka ĩthiĩ atekũmĩgera ngero? Jehova nĩ egũkũrathima agwĩke maũndũ mega+ nĩ ũndũ wa ũrĩa ũnjĩkĩire ũmũthĩ. 20 Na rĩrĩ, nĩ njũĩ atĩ hatarĩ nganja nĩ ũgwathana ũrĩ mũthamaki+ na atĩ ũthamaki wa Isiraeli nĩ ũgũtũũra ũrĩ guoko-inĩ gwaku. 21 Rĩu wĩhĩte harĩ niĩ ũrĩ mbere ya Jehova+ atĩ ndũkaniina njiarũa ciakwa* iria igooka thutha wakwa na atĩ ndũkaniina rĩĩtwa rĩakwa kuuma nyũmba-inĩ ya baba.”+ 22 Kwoguo Daudi akĩĩhĩta harĩ Saulu, na thutha ũcio Saulu akĩinũka gwake mũciĩ.+ No Daudi na arũme ake magĩthiĩ mwĩgitio-inĩ.+