Samueli wa Mbere

26 Thutha wa ihinda arume a Zifu+ magĩthiĩ Gibea kũrĩ Saulu+ makĩmwĩra ũũ: “Na githĩ Daudi ndehithĩte karĩma-inĩ ka Hakila karĩa kangʼetheire Jeshimoni?”*+ 2 Nĩ ũndũ ũcio Saulu agĩũkĩra na agĩikũrũka werũ-inĩ wa Zifu arĩ na arũme 3,000 mathuurĩtwo a Isiraeli nĩguo agacarie Daudi werũ-inĩ ũcio wa Zifu.+ 3 Saulu akĩamba hema karĩma-inĩ kau ka Hakila, karĩa kangʼetheire Jeshimoni, mũkĩra-inĩ wa barabara. Hĩndĩ ĩyo Daudi aaikaraga werũ-inĩ ũcio, na akĩmenya atĩ Saulu nĩ ookĩte werũ-inĩ ũcio kũmũcaria. 4 Kwoguo Daudi agĩtũma athigani magekĩre ũira atĩ nĩ ma Saulu nĩ ookĩte kuo. 5 Thutha-inĩ Daudi agĩthiĩ harĩa Saulu aambĩte hema, na Daudi akĩona harĩa Saulu na Abineri+ mũrũ wa Neri, mũnene wa mbũtũ yake maakomete; Saulu aakomete toro hau kambĩ ĩyo yarĩ athiũrũrũkĩirio mĩena yothe nĩ thigari. 6 Daudi agĩcoka akĩũria Ahimeleku Mũhiti+ na Abishai+ mũrũ wa Zeruia,+ mũrũ wa nyina na Joabu atĩrĩ: “Nũũ ũgũikũrũka hamwe na niĩ kambĩ-inĩ kũrĩ Saulu?” Abishai agĩcokia ũũ: “Nĩ ngũikũrũka hamwe nawe.” 7 Daudi na Abishai magĩgĩthiĩ nginya harĩ thigari icio ũtukũ, na magĩkora Saulu akomete toro hau kambĩ-inĩ itimũ rĩake rĩthecereirio thĩ hakuhĩ na mũtwe wake; Abineri na thigari icio maakomete mamũthiũrũrũkĩirie mĩena yothe.

8 Abishai akĩra Daudi atĩrĩ: “Ũmũthĩ Ngai nĩ aneana thũ yaku guoko-inĩ gwaku.+ Rĩu ndagũthaitha ũreke ndĩmĩthecererie thĩ na itimũ riita o rĩmwe, o na ndikũbatara gwĩka ũguo maita merĩ.” 9 No Daudi akĩra Abishai ũũ: “Ndũkamũgere ngero, nĩ ũndũ-rĩ, nũũ ũngĩoya guoko gwake na igũrũ okĩrĩre mũitĩrĩrie maguta wa Jehova+ na akorũo atarĩ na mahĩtia?”+ 10 Daudi agĩcoka akiuga ũũ: “O ta ũrĩa Jehova atũũraga muoyo, Jehova we mwene nĩ akaamũũraga,+ kana mũthenya wake ũkinye+ akue, kana aikũrũke mbaara-inĩ aniinwo.+ 11 Nĩ ũndũ ũtangĩtĩkĩrĩka maitho-inĩ ma Jehova kuoya guoko gwakwa na igũrũ njũkĩrĩre mũitĩrĩrie maguta wa Jehova!+ Rĩu oya itimũ rĩu rĩrĩ hakuhĩ na mũtwe wake na njagi ĩyo ya maĩ, twĩthiĩre.” 12 Daudi agĩkĩoya itimũ rĩu na njagi ĩyo ya maĩ yarĩ hakuhĩ na mũtwe wa Saulu, na magĩĩthiĩra. Gũtirĩ mũndũ wamonire+ kana akĩmaigua kana agĩũkĩra, nĩ gũkorũo othe maarĩ toro, tondũ nĩ maanyitĩtwo nĩ toro mũnene kuuma kũrĩ Jehova. 13 Daudi agĩcoka akĩringa mwena ũcio ũngĩ na akĩrũgama gacũmbĩrĩ-inĩ ga kĩrĩma handũ haraya kuuma hau, harĩ na itĩna rĩigana ũna gatagatĩ kao.

14 Daudi akĩanĩrĩra thigari icio na Abineri+ mũrũ wa Neri akiuga atĩrĩ: “Abineri, ndũgwĩtĩka?” Abineri agĩcokia ũũ: “Nĩ wee ũ ũreta mũthamaki?” 15 Daudi akĩra Abineri atĩrĩ: “Na githĩ wee ndũrĩ mũndũrũme? Na nũũ ũtariĩ tawe thĩinĩ wa Isiraeli? Nĩ kĩĩ gĩgĩtũmire wage kũrangĩra mwathi waku mũthamaki? Nĩ gũkorũo ũmwe wa thigari nĩ egũkĩte kũũraga mwathi waku mũthamaki.+ 16 Ũguo weka ti wega. O ta ũrĩa Jehova atũũraga muoyo, wagĩrĩirũo kũũragwo, tondũ ndũnarangĩra mwathi waku, o we mũitĩrĩrie maguta wa Jehova.+ Rĩu ta rora hau ũrĩ! Itimũ rĩa mũthamaki na njagi ya maĩ+ iria ciuma hakuhĩ na mũtwe wake irĩ kũ?”

17 Saulu akĩmenya mũgambo wa Daudi akĩũria atĩrĩ: “Ũcio nĩ mũgambo waku, mũrũ wakwa Daudi?”+ Daudi agĩcokia ũũ: “Ĩĩ nĩ mũgambo wakwa, mwathi wakwa mũthamaki.” 18 Agĩcoka akĩũria ũũ: “Mwathi wakwa aratengʼeria ndungata yake nĩkĩ,+ nĩ atĩa njĩkĩte, na nĩ ihĩtia rĩrĩkũ njĩkĩte?+ 19 Ndagũthaitha, mwathi wakwa mũthamaki nĩ athikĩrĩrie ciugo cia ndungata yake: Angĩkorũo Jehova nĩwe ũkwĩrĩte ũnjũkĩrĩre, aroamũkĩra* igongona rĩakwa rĩa mũtu. No angĩkorũo andũ nĩo makwĩrĩte,+ maronyitwo nĩ kĩrumi mbere ya Jehova, tondũ ũmũthĩ nĩ manyingatĩte makandigithũkania na igai rĩa Jehova,+ makoiga atĩrĩ, ‘Thiĩ ũtungatĩre ngai ingĩ!’ 20 Na rĩrĩ, ndũkareke thakame yakwa ĩitĩke thĩ kũraihu na Jehova, nĩ gũkorũo mũthamaki wa Isiraeli oimagarĩte agacarie thuya ĩmwe tu,+ ta arĩ gũtengʼeria aratengʼeria ngware irĩma-inĩ.”

21 Nake Saulu akiuga ũũ: “Nĩ njĩhĩtie.+ Coka mũrũ wakwa Daudi, nĩ gũkorũo ndigũgwĩka ũndũ mũũru rĩngĩ, tondũ ũmũthĩ nĩ wona muoyo* wakwa ũrĩ wa bata.+ Nĩ njĩkĩte ũndũ wa ũrimũ na ngahĩtia mũno.” 22 Daudi agĩcokia atĩrĩ: “Ĩ rĩrĩ itimũ rĩa mũthamaki. Reke mwanake ũmwe oke arĩoe. 23 Jehova nĩwe ũkaarĩha mũndũ nĩ ũndũ wa ũthingu wake+ na wĩhokeku wake, nĩ gũkorũo ũmũthĩ Jehova nĩ akũneanire guoko-inĩ gwakwa, no ndinenda kuoya guoko gwakwa na igũrũ njũkĩrĩre mũitĩrĩrie maguta wa Jehova.+ 24 Atĩrĩrĩ, o ta ũrĩa ũmũthĩ ndona muoyo* waku ũrĩ wa bata, muoyo* wakwa o naguo ũrokorũo ũrĩ wa bata maitho-inĩ ma Jehova, na arohonokia mĩtangĩko-inĩ yothe.”+ 25 Saulu agĩcokeria Daudi atĩrĩ: “Ũrorathimwo mũrũ wakwa Daudi. Hatarĩ nganja nĩ ũgwĩka maũndũ manene, na hatarĩ nganja nĩ ũkũhootana.”+ Thutha ũcio Daudi agĩĩthiĩra, nake Saulu agĩcoka gwake.+