Zekaria
4 Nake mũraika ũcio waaragia na niĩ agĩcoka na akĩnjũkĩria, ta ũrĩa mũndũ okĩragio kuuma toro. 2 Agĩcoka akĩnjũria atĩrĩ: “Nĩ kĩĩ ũrona?”
Na niĩ ngĩmũcokeria: “Atĩrĩrĩ, ndĩrona mũtĩ wa kũigĩrĩrũo matawa wa thahabu theri,+ na igũrũ rĩaguo ũrĩ na mbakũri. Ũrĩ na matawa mũgwanja igũrũ rĩaguo,+ ti itherũ nĩ mũgwanja, na matawa macio, marĩa marĩ igũrũ rĩaguo, marĩ na mĩberethi mũgwanja. 3 Na kũrigania naguo kũrĩ na mĩtĩ ĩĩrĩ ya mĩtamaiyũ,+ ũmwe mwena wa ũrĩo wa mbakũri ĩyo na ũcio ũngĩ mwena wa ũmotho.”
4 Ngĩcoka ngĩũria mũraika ũcio waaragia na niĩ atĩrĩ: “Mwathi wakwa, indo ici irũgamĩrĩire kĩĩ?” 5 Nake mũraika ũcio waaragia na niĩ akĩnjũria atĩrĩ: “Kaĩ ũtoĩ kĩrĩa indo icio irũgamĩrĩire?”
Na niĩ ngĩmũcokeria ngĩmwĩra: “Aca, ndiũĩ mwathi wakwa.”
6 Agĩcoka akĩnjĩra ũũ: “Gĩkĩ nĩkĩo kiugo kĩa Jehova kũrĩ Zerubabeli: ‘“Ti kũgerera mbũtũ ya mbaara, kana kũgerera hinya,+ no nĩ kũgerera roho wakwa,”+ ũguo nĩguo Jehova mũnene wa ita ekuuga. 7 Wee nĩwe ũ, kĩrĩma gĩkĩ kĩnene? Ũgaatuĩka kũndũ kwaraganu+ ũrĩ mbere ya Zerubabeli.+ Nake nĩ akaarehe ihiga rĩa kũigĩrĩrũo igũrũ gũkĩanagĩrĩrũo ũũ: “Kaĩ nĩ rĩthaka-ĩ! Kaĩ nĩ rĩthaka-ĩ!”’”
8 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 9 “Moko ma Zerubabeli nĩ makĩte mũthingi wa nyũmba ĩno,+ na moko make mwene nĩ makaamĩrĩkia.+ Na nĩ mũkaamenya atĩ Jehova mũnene wa ita nĩwe ũndũmĩte kũrĩ inyuĩ. 10 Tondũ rĩrĩ, nũũ ũnyararĩte mũthenya wa kĩambĩrĩria kĩnini?*+ Nĩ gũkorũo nĩ magaakena na mone kabirũ guoko-inĩ kwa Zerubabeli. Maya mũgwanja nĩ maitho ma Jehova, marĩa morũraga kũndũ guothe thĩinĩ wa thĩ.”+
11 Ngĩcoka ngĩmũũria atĩrĩ: “Mĩtĩ ĩno ĩĩrĩ ya mĩtamaiyũ ĩrĩ mwena wa ũrĩo na wa ũmotho wa mũtĩ wa kũigĩrĩrũo matawa ĩrũgamĩrĩire kĩĩ?”+ 12 Ngĩmũũria riita rĩa kerĩ atĩrĩ: “Honge* icio cia mĩtĩ ĩyo ĩĩrĩ ya mĩtamaiyũ iria iraitĩrĩra maguta ma thahabu kũgerera mĩberethi ĩyo ĩĩrĩ ya thahabu irũgamĩrĩire kĩĩ?”
13 Nake akĩnjũria atĩrĩ: “Kaĩ ũtoĩ kĩrĩa indo icio irũgamĩrĩire?”
Na niĩ ngĩmũcokeria ngĩmwĩra: “Aca, ndiũĩ mwathi wakwa.”
14 Nake akĩnjĩra atĩrĩ: “Indo icio irũgamĩrĩire arĩa erĩ aitĩrĩrie maguta, o acio marũgamĩte mwena-inĩ wa Mwathi wa thĩ yothe.”+