Maũndũ Marĩa Meekirũo nĩ Atũmwo
20 Rĩrĩa ngũĩ yathirire, Paulo agĩtũmanĩra arutwo, na thutha wa kũmekĩra ngoro na kũmoigĩra ũhoro, akĩambĩrĩria rũgendo rwa gũthiĩ Makedonia. 2 Na thutha wa gũtuĩkanĩria icigo-inĩ icio ciothe akĩheaga arĩa maaikaraga kũu ciugo nyingĩ cia kũmekĩra ngoro, agĩkinya Ngiriki. 3 Agĩikara kuo mĩeri ĩtatũ, no tondũ Ayahudi nĩ maabangaga njama ya kũmũũkĩrĩra+ rĩrĩa aarĩ hakuhĩ gũtonya meri athiĩ Siria, agĩtua itua rĩa gũcoka agereire Makedonia. 4 Maathiire na Sopatiro mũrũ wa Piro wa kuuma Beroia, Arisitariko+ na Sekundo a kuuma Thesalonike, Gayo wa kuuma Deribe, Timotheo,+ o hamwe na Tikiko+ na Terofimo+ a kuuma gĩcigo kĩa Asia. 5 Andũ acio magĩthiĩ mbere itũ magĩtweterera Teroa; 6 no thikũ cia Mĩgate Ĩtarĩ Mĩimbie+ ciathira, tũkiuma Filipi na meri, na thutha wa thikũ ithano tũkĩmakora Teroa, na tũgĩikara kũu thikũ mũgwanja.
7 Na rĩrĩ, hĩndĩ ĩrĩa twacemanĩtie nĩguo tũrĩe irio mũthenya wa mbere wa kiumia, Paulo akĩambĩrĩria kwarĩria arĩa maacemanĩtie kũu tondũ nĩ aatanyĩte gũthiĩ mũthenya ũyũ ũngĩ; na agĩthiĩ na mbere kwaria o nginya ũtukũ gatagatĩ. 8 Na kũu twacemanĩtie nyũmba ya igũrũ nĩ kwarĩ na matawa maingĩ. 9 Hĩndĩ ĩrĩa Paulo aathiire o na mbere kwaria, mwanake ũmwe wetagwo Eutiko waikarĩte ndirica-inĩ akĩnyitwo nĩ toro mũritũ, na rĩrĩa aatooririo nĩguo, akĩgwa kuuma ngoroba ya gatatũ na akĩoywo arĩ mũkuũ. 10 No Paulo agĩikũrũka, akĩmũkomera na akĩmũhĩmbĩria,+ akiuga: “Tigai kũnegena, nĩ gũkorũo arĩ muoyo.”+ 11 Agĩcoka akĩambata na akĩambĩrĩria kwenyũranga mũgate na akĩrĩa. Na rĩrĩ, agĩthiĩ na mbere kũmahe ũhoro ihinda iraya nginya gũgĩkĩa, thutha ũcio akiumagara. 12 Nao makĩinũkia mwanake ũcio arĩ muoyo na makĩũmĩrĩrio mũno.
13 Tũkĩingĩra meri tũkĩamba gũthiĩ Aso, kũu nĩkuo twarĩ tuoe Paulo o ta ũrĩa aatwĩrĩte, tondũ eendaga gũthiĩ kuo magũrũ. 14 Hĩndĩ ĩrĩa aatũkorire kũu Aso, tũkĩmũkuua na meri tũgĩthiĩ Mitilene. 15 Na mũthenya ũyũ ũngĩ tũkĩhaica meri tũkiuma kũu, tũgĩthiĩ tũgĩkinya mũrĩmo ũrĩa ũngĩ wa Kio, no mũthenya ũrĩa warũmĩrĩire, tũkĩrũgama Samo, naguo mũthenya ũcio ũngĩ tũgĩkinya Mileto. 16 Paulo nĩ aatuĩte kwaga kũingĩra Efeso+ nĩguo ndakahũthĩre mahinda gĩcigo-inĩ kĩu kĩa Asia, tondũ nĩ eehĩkaga nĩguo kũngĩahotekire, akinye Jerusalemu+ mũthenya wa Gĩathĩ kĩa Pentekoste.
17 O na kũrĩ ũguo, arĩ Mileto agĩtũmana ndũmĩrĩri Efeso agĩta athuri a kĩũngano. 18 Nao maathiĩ kũrĩ we, akĩmeera atĩrĩ: “Inyuĩ nĩ mũĩ wega ũrĩa ndatũũraga hamwe na inyuĩ kuuma mũthenya wa mbere ũrĩa ndokire gĩcigo gĩkĩ kĩa Asia,+ 19 ũrĩa ndatungatagĩra Mwathani ndĩ na wĩnyihia*+ mũingĩ na ndĩ na maithori na magerio nĩ ũndũ wa njama iria Ayahudi maabangaga cia kũnjũkĩrĩra, 20 na inyuĩ ndiagire kũmwĩra maũndũ o mothe marĩa mangĩamũgunire kana ngĩaga kũmũruta, mũingĩ-inĩ+ na nyũmba kwa nyũmba.+ 21 No ndarutaga ũira kĩhinyio kũrĩ Ayahudi na Angiriki atĩ merire,+ macokerere Ngai na magĩe na wĩtĩkio thĩinĩ wa Mwathani witũ Jesu.+ 22 Rĩu-rĩ, thiĩte Jerusalemu nĩ ũndũ wa gwathĩkĩra* roho, o na gũtuĩka ndiũĩ maũndũ marĩa ngũkorana namo kũu, 23 o tiga atĩ roho mũtheru nĩ ũnjĩraga maita maingĩ ndĩ matũũra-inĩ mothe atĩ njera na mathĩna nĩcio injetereire.+ 24 No rĩrĩ, ndionaga muoyo* wakwa mwene ũrĩ wa bata harĩ niĩ, ũndũ ũrĩa wa bata nĩ atĩ ndĩkie ihenya rĩakwa+ na ũtungata ũrĩa ndaheirũo nĩ Mwathani Jesu, wa kũruta ũira kĩhinyio wĩgiĩ ũhoro ũrĩa mwega wa ũtugi mũnene wa Ngai.
25 “Na atĩrĩ, nĩ njũĩ atĩ gũtirĩ o na ũmwe gatagatĩ-inĩ kanyu ndahunjĩirie ũhoro wa Ũthamaki ũkoona ũthiũ wakwa rĩngĩ. 26 Kwoguo ndĩmwĩtĩte nĩguo mũtuĩke aira ũmũthĩ ũyũ atĩ niĩ ndikoorio* thakame ya mũndũ o na ũmwe,+ 27 nĩ gũkorũo ndirĩ ndaga kũmwĩra maũndũ mothe megiĩ wendi* wa Ngai.+ 28 Mwĩmenyererei inyuĩ ene+ na mũmenyerere rũũru ruothe, rũrĩa roho mũtheru ũmwamũrĩte inyuĩ mũtuĩke arori a ruo,+ nĩguo mũrĩithagie kĩũngano kĩa Ngai,+ kĩrĩa aagũrire na thakame ya Mũrũ wake mwene.+ 29 Nĩ njũĩ atĩ ndarĩkia gũthiĩ, njũi ndĩani nĩ ikaaingĩra gatagatĩ-inĩ kanyu+ na itikaiguĩra rũũru tha, 30 na gatagatĩ-inĩ kanyu inyuĩ ene nĩ gũkaagĩa andũ makaaragia maũndũ mahĩtanu nĩguo magucĩrĩrie arutwo mamarũmĩrĩre.+
31 “Nĩ ũndũ ũcio-rĩ, ikaragai mwĩiguĩte, na mũtikanariganĩrũo atĩ ihinda-inĩ rĩa mĩaka ĩtatũ+ ũtukũ na mũthenya, ndiatigire gũtaara o ũmwe wanyu ndĩ na maithori. 32 Rĩu-rĩ, ndamũneana kũrĩ Ngai na kũrĩ kiugo kĩa ũtugi wake mũnene, kĩrĩa kĩngĩmwĩkĩra hinya na kĩmũhe igai gatagatĩ-inĩ ka arĩa othe atheru.+ 33 Ndirĩ nderirĩria betha kana thahabu kana nguo ya mũndũ o na ũmwe.+ 34 Inyuĩ ene nĩ mũĩ atĩ ndatũire ndutaga wĩra na moko maya nĩguo hingie mabataro makwa+ o hamwe na ma arĩa makoretwo na niĩ. 35 Nĩ ndĩmuonereirie maũndũ-inĩ mothe atĩ no mũhaka mũrute wĩra na kĩyo+ nĩguo mũteithagie arĩa matarĩ na hinya na no mũhaka mũririkanage ciugo cia Mwathani Jesu, hĩndĩ ĩrĩa we mwene ooigire ũũ: ‘Kũheana nĩ kũrĩ gĩkeno kĩnene+ gũkĩra kwamũkĩra.’”
36 Arĩkia kuuga maũndũ macio, agĩturia maru hamwe nao othe na akĩhoya. 37 Na rĩrĩ, othe makĩrĩra mũno, makĩhĩmbĩria Paulo* na makĩmũmumunya na wendo mũingĩ,* 38 nĩ gũkorũo nĩ maanyitĩtwo nĩ kĩeha nĩ ũrĩa aameerĩte atĩ matingĩkona ũthiũ wake rĩngĩ.+ Magĩcoka makĩmuumagaria nginya meri-inĩ.