Ezekieli

39 “Atĩrĩrĩ mũrũ wa mũndũ, ratha ũhoro wa gũũkĩrĩra Gogu+ ũmwĩre ũũ, ‘Jehova Mwathani Ũrĩa Mũnene oigĩte atĩrĩ: “Nĩ ngaagũũkĩrĩra, wee Gogu, mũtongoria ũrĩa mũnene wa Mesheki na Tubali.+ 2 Nĩ ngaakũhũgũra na ngũtongorie ndũme uume kũndũ kũraya mũno mwena wa rũgongo+ na ngũtware irĩma-inĩ cia Isiraeli. 3 Nĩ ngaagũtha ũta waku ũgwe kuuma guoko-inĩ gwaku kwa ũmotho na ndũme mĩguĩ yaku ĩgwe kuuma guoko-inĩ gwaku kwa ũrĩo. 4 Ũkaagwa irĩma-inĩ cia Isiraeli,+ wee na thigari ciaku ciothe na ikundi cia andũ iria igaakorũo hamwe nawe. Nĩ ngaakũneana kũrĩ nyoni cia mĩthemba yothe iria irĩaga nyama na kũrĩ nyamũ cia gĩthaka ũtuĩke irio ciacio.”’+

5 “‘Ũkaagwa werũ-inĩ,+ nĩ gũkorũo niĩ mwene nĩ njarĩtie,’ ũguo nĩguo Jehova Mwathani Ũrĩa Mũnene oigĩte.

6 “‘Na nĩ ngaarehithĩria Magogu mwaki o hamwe na arĩa othe maikaraga icigĩrĩra-inĩ marĩ na thayũ,+ na nĩ makaamenya atĩ niĩ nĩ niĩ Jehova. 7 Ningĩ nĩ ngaatũma rĩĩtwa rĩakwa itheru rĩmenyeke gatagatĩ-inĩ ka andũ akwa Isiraeli, na ndikaareka rĩĩtwa rĩakwa itheru rĩthahio rĩngĩ; nacio ndũrĩrĩ nĩ ikaamenya atĩ niĩ nĩ niĩ Jehova,+ Ũrĩa Mũtheru thĩinĩ wa Isiraeli.’+

8 “‘Atĩrĩrĩ, ũndũ ũcio nĩ ũroka, na nĩ ũkaahinga,’ ũguo nĩguo Jehova Mwathani Ũrĩa Mũnene oigĩte. ‘Ũcio nĩguo mũthenya ũrĩa njarĩtie ũhoro waguo. 9 Aikari a matũũra ma Isiraeli nĩ makoimagara na maakie mwaki makĩhũthĩra matharaita, mahũthĩre ngo nene na nini, ũta na mĩguĩ, njũgũma na matimũ. Makaahũthĩra indo icio gwakia mwaki+ ihinda rĩa mĩaka mũgwanja. 10 Matikabatara kũngania ngũ werũ-inĩ kana mĩtitũ-inĩ nĩ gũkorũo makaahũthĩra matharaita macio gwakia mwaki.’

“‘Nĩ magaataha indo kuuma kũrĩ arĩa maamatahĩte na matunye arĩa maamatunyĩte,’ ũguo nĩguo Jehova Mwathani Ũrĩa Mũnene oigĩte.

11 “‘Mũthenya ũcio nĩ ngaahe Gogu+ handũ ha gũthikwo kũu thĩinĩ wa Isiraeli, mũkuru-inĩ ũrĩa ũgeragwo nĩ andũ arĩa mathiaga mwena wa irathĩro wa iria, nayo njĩra ya arĩa matuĩkanagĩria kuo ĩhingwo. Kũu nĩkuo magaathika Gogu na irĩndĩ ciake ciothe, na magaagwĩta Mũkuru wa Hamoni-Gogu.*+ 12 Andũ a nyũmba ya Isiraeli makaahũthĩra mĩeri mũgwanja kũmathika nĩgetha matherie bũrũri ũcio.+ 13 Andũ othe a bũrũri ũcio nĩ makaanyitanĩra kũmathika, na ũndũ ũcio nĩ ũgaatũma magĩe ngumo mũthenya ũrĩa ngeegoocithia,’+ ũguo nĩguo Jehova Mwathani Ũrĩa Mũnene oigĩte.

14 “‘Andũ nĩ makaaheo wĩra wa gũtuĩkanagĩria bũrũri ũcio hingo ciothe na gũthika mĩĩrĩ ĩrĩa ĩtigarĩte igũrũ rĩa thĩ, nĩgetha bũrũri ũcio ũtherio. Magaathiĩ na mbere gũcaria ihinda rĩa mĩeri mũgwanja. 15 Arĩa magaatuĩkanagĩria bũrũri mangĩkona ihĩndĩ rĩa mũndũ, makaaigaga rũũri hakuhĩ narĩo. Nao arĩa maheetwo wĩra wa gũthika makarĩthika Mũkuru-inĩ wa Hamoni-Gogu.+ 16 Ningĩ kũu nĩ gũgaakorũo na itũũra rĩtagwo Hamona.* Na nĩ magaatheria bũrũri ũcio.’+

17 “Nawe mũrũ wa mũndũ-rĩ, Jehova Mwathani Ũrĩa Mũnene oigĩte ũũ: ‘Ĩra nyoni cia mĩthemba yothe na nyamũ ciothe cia gĩthaka atĩrĩ, “Mwĩcokanĩrĩriei hamwe mũũke. Thiũrũrũkĩriai igongona rĩakwa rĩrĩa ndĩramũhaarĩrĩria, igongona inene mũno irĩma-inĩ cia Isiraeli.+ Mũkũrĩa nyama na mũnyue thakame.+ 18 Mũkũrĩa nyama cia andũ arĩa marĩ hinya na mũnyue thakame ya atongoria a thĩ, mũrĩe ndũrũme, tũgondu, mbũri, na ndegwa, nyamũ ciothe iria norie cia Bashani. 19 Mũkũrĩa maguta mũhũne na mũnyue thakame nginya mũrĩĩo nĩ ũndũ wa igongona rĩrĩa ndĩramũhaarĩrĩria.”’

20 “‘Metha-inĩ yakwa mũkũrĩa nginya mũhũne nyama cia mbarathi na cia arĩa matwarithagia ngaari cia mbarathi, arĩa marĩ hinya na njamba cia ita cia mĩthemba yothe,’+ ũguo nĩguo Jehova Mwathani Ũrĩa Mũnene oigĩte.

21 “‘Nĩ ngonania riri wakwa gatagatĩ-inĩ ka ndũrĩrĩ, na ndũrĩrĩ ciothe nĩ ikoona ituĩro rĩrĩa nduanĩire, na hinya ũrĩa* nyonanĩtie gatagatĩ-inĩ gacio.+ 22 Kuuma mũthenya ũcio gũthiĩ na mbere, andũ a nyũmba ya Isiraeli nĩ makaamenya atĩ niĩ nĩ niĩ Jehova Ngai wao. 23 Nacio ndũrĩrĩ nĩ ikaamenya atĩ andũ a nyũmba ya Isiraeli maatwarirũo ithamĩrio nĩ ũndũ wa mehia mao ene, tondũ matiarĩ ehokeku harĩ niĩ.+ Nĩ ũndũ ũcio ngĩmahitha ũthiũ wakwa+ na ngĩmaneana kũrĩ thũ ciao,+ na othe makĩhũũrũo na rũhiũ rwa njora. 24 Ndamekire maũndũ maringaine na thahu wao na mehia mao, na ngĩmahitha ũthiũ wakwa.’

25 “Nĩ ũndũ ũcio, Jehova Mwathani Ũrĩa Mũnene ekuuga ũũ: ‘Nĩ ngũcokereria andũ a Jakubu arĩa matahĩtwo+ na njiguĩre nyũmba yothe ya Isiraeli tha;+ na nĩ ngũrũĩrĩra na kĩyo* rĩĩtwa rĩakwa itheru.+ 26 Thutha wa gũconorithio nĩ ũndũ wa gũkorũo matarĩ ehokeku harĩ niĩ,+ nĩ magaaikara na thayũ bũrũri-inĩ wao, gũtarĩ mũndũ ũgũtũma maigue guoya.+ 27 Rĩrĩa ngaamaruta ikundi-inĩ cia andũ na ndĩmacokanĩrĩrie kuuma mabũrũri-inĩ ma thũ ciao,+ ningĩ nĩ ngeyonania harĩ o ũrĩa ndĩ mũtheru ndũrĩrĩ nyingĩ ikĩĩyonagĩra.’+

28 “‘Nĩ makaamenya atĩ niĩ nĩ niĩ Jehova Ngai wao rĩrĩa ngaamacokia bũrũri-inĩ wao kuuma ndũrĩrĩ-inĩ iria maatwarĩtwo ithamĩrio, na gũtirĩ o na ũmwe wao ngaatiga.+ 29 Ndikaamahitha ũthiũ wakwa rĩngĩ,+ nĩ gũkorũo nĩ ngaaitĩrĩria nyũmba ya Isiraeli roho wakwa,’+ ũguo nĩguo Jehova Mwathani Ũrĩa Mũnene oigĩte.”