Samueli wa Mbere
30 Na rĩrĩ, rĩrĩa Daudi na arũme ake maakinyire itũũra rĩa Zikilagi+ mũthenya wa gatatũ, Aamaleki+ nĩ maakoretwo mahobanĩirie mwena wa mũhuro* o hamwe na Zikilagi, magatharĩkĩra Zikilagi na makarĩcina na mwaki. 2 Maatahĩte atumia+ o hamwe na arĩa othe maarĩ itũũra-inĩ rĩu, kuuma ũrĩa mũnini nginya ũrĩa mũnene. Gũtirĩ mũndũ o na ũmwe mooragĩte, ĩndĩ maamakuuĩte na magethiĩra. 3 Rĩrĩa Daudi na arũme ake maakinyire itũũra-inĩ rĩu, magĩkora rĩcinĩtwo, na atumia ao na ariũ ao na aarĩ ao magatahwo. 4 Nĩ ũndũ ũcio Daudi na arũme acio maarĩ nake makĩambĩrĩria kũrĩra maanĩrĩire nginya magĩthirũo nĩ hinya wa kũrĩra. 5 O na atumia erĩ a Daudi nĩ maatahĩtwo, Ahinoamu wa kuuma Jezireeli na Abigaili ũrĩa warĩ mũtumia wa ndigwa wa Nabali Mũkarimeli.+ 6 Daudi nĩ aatangĩkire mũno, tondũ arũme acio mooigaga nĩ mekũmũhũũra na mahiga, nĩ gũkorũo arũme acio nĩ maarakarĩte mũno nĩ ũndũ wa kũũrũo nĩ ariũ ao na aarĩ ao. No Daudi akĩĩhe hinya kũgerera Jehova Ngai wake.+
7 Thutha ũcio Daudi akĩra Abiatharu+ mũthĩnjĩri-Ngai mũrũ wa Ahimeleku ũũ: “Ndagũthaitha ũndehere ebodi haha.”+ Nĩ ũndũ ũcio Abiatharu agĩtwarĩra Daudi ebodi. 8 Daudi agĩtuĩria ũhoro harĩ Jehova akĩũria ũũ:+ “Ndengʼerie gĩkundi kĩu kĩa atunyani? Hihi nĩ ngũmakinyĩra?” Nake akĩmwĩra atĩrĩ: “Thiĩ ũkamathingate, nĩ gũkorũo hatarĩ nganja nĩ ũkũhonokia kĩrĩa gĩothe gĩtahĩtwo.”+
9 O rĩo Daudi akiumagara marĩ na arũme 600+ arĩa maarĩ hamwe nake, na magĩthiĩ o nginya Mũkuru-inĩ wa Besori kũrĩa arũme amwe maatigirũo. 10 Daudi agĩthiĩ o na mbere kũmatengʼeria marĩ hamwe na arũme 400, ĩndĩ arũme 200 arĩa maaremirũo kũringa Mũkuru wa Besori nĩ ũndũ wa kũnoga mũno nĩ maatigirũo.+
11 Magĩkora Mũmisiri ũmwe werũ-inĩ na makĩmũtwara kũrĩ Daudi. Makĩmũhe irio cia kũrĩa na maĩ ma kũnyua, 12 o hamwe na kĩenyũ gĩa keki ya ngũyũ hihe na keki igĩrĩ cia thabibũ nyũmithie. Arĩkia kũrĩa, agĩcokwo nĩ hinya,* tondũ ndaakoretwo arĩte irio o na kana akanyua maĩ thikũ ithatũ ũtukũ na mũthenya. 13 Daudi agĩkĩmũũria atĩrĩ: “Wee ũrĩ wa ũ, na uumĩte kũ?” nake akiuga ũũ: “Niĩ ndĩ Mũmisiri, ngombo ya Mũamaleki, no mwathi wakwa nĩ aandigire tondũ nĩ ndarwarire thikũ ithatũ hĩtũku. 14 Twatharĩkĩire mwena wa mũhuro wa* Akerethi+ na gĩcigo kĩa Juda na mwena wa mũhuro wa* Kalebu,+ na tũgĩcina Zikilagi na mwaki.” 15 Hĩndĩ ĩyo Daudi akĩmũũria ũũ: “Hihi nĩ ũkũnjikũrũkia ũndware kũrĩ gĩkundi kĩu kĩa atunyani?” Nake akĩmwĩra atĩrĩ: “Angĩkorũo nĩ ũkwĩhĩta harĩ niĩ mbere ya Ngai atĩ ndũkũnjũraga na atĩ ndũkũũneana kũrĩ mwathi wakwa, nĩ ngũgũikũrũkia ngũtware kũrĩ gĩkundi kĩu kĩa atunyani.”
16 Kwoguo akĩmũikũrũkia nginya kũrĩa maarĩ megangarĩte bũrũri-inĩ wothe, makĩrĩaga na makĩnyuaga na magĩkũngũyagĩra nĩ ũndũ wa indo ciothe iria maatahĩte nyingĩ mũno bũrũri-inĩ wa Afilisti na bũrũri-inĩ wa Juda. 17 Nake Daudi akĩmoraga kuuma rũcinĩ kũrĩ na nduma o nginya hwaĩ-inĩ wa mũthenya ũyũ ũngĩ; gũtirĩ mũndũ o na ũmwe wetharire+ tiga arũme 400 arĩa maahaicire ngamĩra makĩũra. 18 Daudi akĩhonokia kĩrĩa gĩothe gĩatahĩtwo nĩ Aamaleki,+ na Daudi akĩhonokia atumia ake eerĩ. 19 Gũtirĩ kĩndũ o na kĩrĩkũ kĩao kĩaagire, kuuma kĩrĩa kĩnini o nginya kĩrĩa kĩnene. Maahonokirie ariũ na aarĩ ao o hamwe na indo iria ciatahĩtwo;+ Daudi aahonokirie kĩrĩa gĩothe mooete. 20 Nĩ ũndũ ũcio Daudi akĩoya ndũũru ciothe cia mbũri na ngʼondu na ndũũru ciothe cia ngʼombe, iria maatwarire mbere ya mahiũ mao. Makiuga ũũ: “Ici nĩcio indo iria Daudi atahĩte.”
21 Daudi agĩgĩcoka kũrĩ arũme arĩa 200 maanogete mũno makaremwo nĩ gũthiĩ hamwe na Daudi o acio maatigĩtwo Mũkuru-inĩ wa Besori,+ na magĩũka gũtũnga Daudi hamwe na andũ arĩa maarĩ nake. Rĩrĩa Daudi aakuhĩrĩirie arũme acio, akĩmoria ũhoro wao. 22 No rĩrĩ, mũndũ wothe mũũru na ũtarĩ kĩene gatagatĩ-inĩ ka arĩa maathiĩte na Daudi akiuga ũũ: “Tondũ matinathiĩ hamwe na ithuĩ, gũtirĩ kĩndũ o na kĩ tũkũmahe harĩ indo iria iratahĩtwo tũhonoketie o tiga mũndũ eyoere mũtumia wake na ciana ciake na ethiĩre.” 23 No Daudi akiuga ũũ: “Ariũ a ithe witũ, mũtiagĩrĩirũo gwĩka ũguo na kĩrĩa Jehova atũheete. Nĩ aratũgitĩrire, nakĩo gĩkundi kĩa atunyani kĩrĩa gĩatũũkĩrĩire arakĩneana guoko-inĩ gwitũ.+ 24 Nũũ ũngĩtĩkania na inyuĩ ũndũ-inĩ ũcio? Igai rĩa ũrĩa ũraikũrũkire mbaara-inĩ rĩgũkorũo rĩiganaine na igai rĩa ũrĩa ũratigirũo aikarĩtie mĩrigo.+ Othe megũkorũo na igai hamwe.”+ 25 Na kuuma mũthenya ũcio gũthiĩ na mbere, akĩiga ũndũ ũcio ũrũmagĩrĩrũo na ũgĩtuĩka watho thĩinĩ wa Isiraeli nginyagia ũmũthĩ.
26 Rĩrĩa Daudi aacokire Zikilagi, akĩneana indo imwe iria aatahĩte itwarĩrũo athuri* a Juda arĩa maarĩ arata ake, akiuga ũũ: “Gĩkĩ nĩ kĩheo* kĩanyu kuuma indo-inĩ iria itahĩtwo harĩ thũ cia Jehova.” 27 Aacineanire kũrĩ arĩa maarĩ Betheli,+ kũrĩ arĩa maarĩ Ramothu ya Negebu,* kũrĩ arĩa maarĩ Jatiru,+ 28 kũrĩ arĩa maarĩ Aroeru, kũrĩ arĩa maarĩ Sifimothu, kũrĩ arĩa maarĩ Eshitemoa,+ 29 kũrĩ arĩa maarĩ Rakali, kũrĩ arĩa maarĩ matũũra-inĩ ma Ajerameeli,+ kũrĩ arĩa maarĩ matũũra-inĩ ma Akeni,+ 30 kũrĩ arĩa maarĩ Horoma,+ kũrĩ arĩa maarĩ Borashani, kũrĩ arĩa maarĩ Athaki, 31 kũrĩ arĩa maarĩ Hebironi,+ na kũrĩa guothe Daudi na arũme ake maathiaga kaingĩ.