Samueli wa Kerĩ

6 O rĩngĩ Daudi agĩcokanĩrĩria thigari ciothe iria njega biũ thĩinĩ wa Isiraeli, arũme 30,000. 2 Thutha ũcio Daudi na arũme arĩa othe aarĩ nao makiumagara magĩthiĩ Baale-juda kũgĩĩra Ithandũkũ rĩa Ngai ũrĩa wa ma marĩambatie,+ o rĩo rĩu andũ mathiaga mbere yarĩo gũkaĩra rĩĩtwa rĩa Jehova mũnene wa ita,+ o we ũrĩa ũikarĩire gĩtĩ kĩa ũnene igũrũ rĩa* akerubi.+ 3 O na kũrĩ ũguo, makĩigĩrĩra Ithandũkũ rĩu rĩa Ngai ũrĩa wa ma gakaari-inĩ kerũ ga gũkururio+ nĩgetha marĩkuue kuuma nyũmba-inĩ ya Abinadabu,+ ĩrĩa yarĩ karĩma igũrũ; na Uza na Ahio, ariũ a Abinadabu, nĩo maatongoragia gakaari kau kerũ ga gũkururio.

4 Kwoguo magĩkuua Ithandũkũ rĩa Ngai ũrĩa wa ma kuuma nyũmba-inĩ ya Abinadabu ĩrĩa yarĩ karĩma igũrũ, na Ahio aathiaga arĩ mbere ya Ithandũkũ rĩu. 5 Daudi na nyũmba yothe ya Isiraeli no gũkũngũĩra maakũngũyagĩra mbere ya Jehova marĩ na inanda cia mĩthemba yothe cia mbaũ cia mũthengera, inanda cia mũgeeto, inanda ingĩ cia ndigi,+ manyanga,+ njingiri, na thani iria ihũũrithanagio.+ 6 No rĩrĩa maakinyire kĩhuuhĩro-inĩ kĩa Nakoni, Uza agĩtambũrũkia guoko gwake kwerekera Ithandũkũ rĩa Ngai ũrĩa wa ma na akĩrĩnyita,+ nĩ gũkorũo ngʼombe ciarĩ hakuhĩ kũrĩgũithia. 7 Nĩ ũndũ ũcio marakara ma Jehova makĩrĩrĩmbũkĩra Uza, na Ngai ũrĩa wa ma akĩmũũragĩra+ o hau nĩ ũndũ wa gĩĩko kĩu eekire gĩtagĩrĩire,+ na agĩkuĩra hau mwena-inĩ wa Ithandũkũ rĩa Ngai ũrĩa wa ma. 8 No Daudi akĩrakara nĩ ũndũ wa marakara ma Jehova kũrĩrĩmbũkĩra Uza; na handũ hau hetagwo Perezu-uza* nginyagia ũmũthĩ. 9 Nĩ ũndũ ũcio Daudi agĩĩtigĩra Jehova+ mũthenya ũcio na akĩũria atĩrĩ: “Ithandũkũ rĩa Jehova rĩngĩgĩũka atĩa kũrĩ niĩ?”+ 10 Daudi ndaarĩ na wendi wa gũtwara Ithandũkũ rĩa Jehova kũrĩa aarĩ thĩinĩ wa Itũũra rĩa Daudi.+ Ithenya rĩa ũguo, Daudi ooigire rĩtwarũo nyũmba-inĩ ya Obedi-edomu+ Mũgiiti.

11 Ithandũkũ rĩu rĩa Jehova rĩgĩikara nyũmba-inĩ ya Obedi-edomu Mũgiiti mĩeri ĩtatũ, na Jehova agĩthiĩ o na mbere kũrathima Obedi-edomu na andũ othe a nyũmba yake.+ 12 Mũthamaki Daudi agĩgĩkinyĩrio ndũmĩrĩri ĩno: “Jehova nĩ arathimĩte nyũmba ya Obedi-edomu na kĩrĩa gĩothe arĩ nakĩo tondũ wa Ithandũkũ rĩa Ngai ũrĩa wa ma.” Nĩ ũndũ ũcio Daudi akĩgĩĩra Ithandũkũ rĩu rĩa Ngai ũrĩa wa ma kuuma nyũmba-inĩ ya Obedi-edomu akĩrĩambatia Itũũra-inĩ rĩa Daudi arĩ na gĩkeno kĩnene.+ 13 Rĩrĩa arĩa maakuuĩte+ Ithandũkũ rĩa Jehova maakinyũkirie makinya matandatũ, Daudi akĩruta igongona rĩa ndegwa na nyamũ norie.

14 Daudi no gũthũngũtha aathũngũthaga agĩthiũrũrũkaga arĩ mbere ya Jehova na hinya wake wothe; na hĩndĩ ĩyo yothe Daudi eehumbĩte* ebodi ya gatani.+ 15 Daudi na nyũmba yothe ya Isiraeli maarehaga Ithandũkũ+ rĩa Jehova makiugagĩrĩria makenete+ makĩhuuhaga coro.+ 16 No rĩrĩa Ithandũkũ rĩa Jehova rĩakinyire Itũũra-inĩ rĩa Daudi, Mikali mwarĩ wa Saulu+ agĩcũthĩrĩria thĩ ndirica-inĩ akĩona Mũthamaki Daudi akĩrũgarũga na agĩthũngũtha agĩthiũrũrũkaga mbere ya Jehova; na akĩambĩrĩria kũmũnyarara ngoro-inĩ yake.+ 17 Magĩgĩkinyia Ithandũkũ rĩu rĩa Jehova na makĩrĩiga handũ harĩo thĩinĩ wa hema ĩrĩa Daudi aambĩte nĩ ũndũ warĩo.+ Daudi agĩcoka akĩruta magongona ma njino+ o hamwe na magongona ma ũiguano+ mbere ya Jehova.+ 18 Rĩrĩa Daudi aarĩkirie kũruta magongona ma njino na magongona ma ũiguano, akĩrathima andũ thĩinĩ wa rĩĩtwa rĩa Jehova mũnene wa ita. 19 Makĩria ma ũguo, akĩheana mũgate wa gĩthiũrũrĩ,* keki ya matunda ma mĩtende, na keki ya thabibũ nyũmithie kũrĩ andũ othe, kĩrĩndĩ gĩothe kĩa Isiraeli, o mũndũrũme na o mũtumia, na thutha ũcio andũ othe magĩthiĩ, o mũndũ agĩthiĩ gwake mũciĩ.

20 Rĩrĩa Daudi aahũndũkire nĩguo akarathime andũ a nyũmba yake, Mikali mwarĩ wa Saulu+ akiuma nĩguo akamũtũnge. Akĩmwĩra atĩrĩ: “Kaĩ mũthamaki wa Isiraeli nĩ etũũgĩririe rĩrĩa eguũririe nguo ũmũthĩ mbere ya maitho ma ngombo cia airĩtu cia ndungata ciake o ta ũrĩa mũndũ mũriitu eguũragia nguo mbere ya andũ-ĩ!”+ 21 Nĩ ũndũ ũcio Daudi akĩra Mikali atĩrĩ: “Niĩ nĩ gũkũngũĩra ngũkũngũyagĩra mbere ya Jehova, o we ũrĩa wathuurire ithenya rĩa thoguo na andũ othe a nyũmba yake na o we ũrĩa wanyamũrire nduĩke mũtongoria wa gũtongoragia andũ a Jehova, nĩo Isiraeli.+ Kwoguo no ngũkũngũĩra ndĩ mbere ya Jehova, 22 na ndĩnyihie o na makĩria ma ũguo na nyihe nginya maitho-inĩ makwa. Ĩndĩ ngombo cia airĩtu icio wagweta, no ikũndũgĩria.” 23 Nĩ ũndũ ũcio Mikali mwarĩ wa Saulu+ ndaagĩire ciana nginyagia mũthenya ũrĩa aakuire.