Zekaria

3 Ningĩ akĩnyonia Joshua+ mũthĩnjĩri-Ngai ũrĩa mũnene arũgamĩte mbere ya mũraika wa Jehova, na Shaitani+ aarũgamĩte guoko-inĩ gwake kwa ũrĩo nĩguo amũũkĩrĩre. 2 Nake mũraika wa Jehova akĩra Shaitani atĩrĩ: “Jehova arogũkũũma, wee Shaitani,+ ti itherũ, Jehova o ũcio ũthuurĩte Jerusalemu+ arogũkũũma! Githĩ mũndũ ũyũ ti rũtungu rũrakana rũguthĩtwo kuuma mwaki-inĩ?”

3 Na rĩrĩ, Joshua eehumbĩte nguo irĩ na gĩko na aarũgamĩte mbere ya mũraika ũcio. 4 Nake mũraika ũcio akĩra arĩa maarũgamĩte mbere yake atĩrĩ, “Mũrutei nguo icio ciake irĩ na gĩko.” Agĩcoka akĩmwĩra ũũ, “Atĩrĩrĩ, nĩ ndatũma mahĩtia* maku makweherere, na nĩ ũkũhumbwo nguo njega.”*+

5 Nĩ ũndũ ũcio ngiuga atĩrĩ: “Nĩ ekĩrũo kĩremba gĩtheru mũtwe.”+ Nao makĩmwĩkĩra kĩremba kĩu gĩtheru mũtwe na makĩmũhumba nguo; na mũraika wa Jehova aarũgamĩte hau hakuhĩ. 6 Mũraika ũcio wa Jehova agĩcoka akĩra Joshua atĩrĩ: 7 “Jehova mũnene wa ita ekuuga atĩrĩ, ‘Ũngĩrũmĩrĩra njĩra ciakwa na ũrute mawĩra maku mbere yakwa, nĩ ũgaatungataga ũrĩ mũtuanĩri ciira thĩinĩ wa nyũmba yakwa+ na ũmenyagĩrĩre* nja ciakwa; na nĩ ngaagwĩtĩkĩria ũtonyage hamwe na aya marũgamĩte haha.’

8 “‘Ta thikĩrĩria, wee Joshua Mũthĩnjĩri-Ngai Ũrĩa Mũnene, wee hamwe na athiritũ aku acio maikaraga thĩ mbere yaku, nĩ gũkorũo andũ aya nĩ kĩmenyithia; atĩrĩrĩ, nĩ ngũrehe ndungata yakwa+ ĩrĩa ĩtagwo Thuuna!+ 9 Ta rorai ihiga rĩrĩa njigĩte mbere ya Joshua! Igũrũ rĩa ihiga rĩmwe kũrĩ na maitho mũgwanja; na nĩ ngũconga maandĩko igũrũ rĩarĩo,’ ũguo nĩguo Jehova mũnene wa ita ekuuga, ‘na nĩ ngeeheria mahĩtia ma bũrũri ũcio na mũthenya ũmwe.’+

10 “Jehova mũnene wa ita ekuuga atĩrĩ, ‘mũthenya ũcio, o ũmwe wanyu nĩ ageeta mũndũ ũrĩa ũngĩ oke rungu rwa mũthabibũ wake na rungu rwa mũkũyũ wake.’”+