Marũa Kũrĩ Akolosai

4 Inyuĩ athani, ĩkagĩrai ngombo cianyu maũndũ na njĩra ya ũthingu na ya kĩhooto, mũkĩmenyaga atĩ o na inyuĩ nĩ mũrĩ na Mwathani kũrĩa igũrũ.+

2 Hoyagai mũtegũtigithĩria,+ na mũikarage mwĩiguĩte ũhoro-inĩ ũcio mũgĩcokagia ngatho.+ 3 Ningĩ-rĩ, tũhoyagĩrei o na ithuĩ,+ nĩgetha Ngai ahingũre mũrango nĩ ũndũ wa kiugo nĩguo tũhunjie ũhoro wa hitho ĩrĩa theru ĩgiĩ Kristo, o ĩrĩa ĩtũmĩte njohwo,+ 4 na atĩ hunjie ũhoro wayo na njĩra njega o ta ũrĩa njagĩrĩirũo.

5 Thiagai na mĩthiĩre ya ũũgĩ kwerekera arĩa marĩ nja, mũkĩhũthagĩra mahinda manyu wega biũ.*+ 6 Rekei ciugo cianyu ikoragwo irĩ cia ũtugi hingo ciothe, ta ciĩkĩrĩtwo cumbĩ,+ nĩgetha mũmenyage ũrĩa mwagĩrĩirũo gũcokeria o mũndũ.+

7 Mũrũ wa Ithe witũ Tikiko,+ ũrĩa nyendete na ũtungataga arĩ mwĩhokeku, o we tũtungataga nake thĩinĩ wa Mwathani nĩ ekũmũhe ũhoro wakwa wothe. 8 Ndĩramũtũma kũrĩ inyuĩ nĩguo mũmenye ũrĩa ithuĩ tũtariĩ na nĩguo omĩrĩrie ngoro cianyu. 9 Nĩ megũka na Onesimo,+ mũrũ wa Ithe witũ mwĩhokeku o we nyendete na uumĩte gatagatĩ-inĩ kanyu; nĩ mekũmwĩra maũndũ mothe marĩa marekĩka gũkũ.

10 Nĩ mwageithio nĩ Aristariko+ ũrĩa tuohetwo hamwe nake, o na Mariko+ ũrĩa mũihwa wa* Baranaba (ũrĩa mwerirũo atĩ angĩgooka kũrĩ inyuĩ mũkaamũnyita ũgeni),+ 11 na Jesu ũrĩa wĩtagwo Jusito, o acio a itari rĩa arĩa maruĩte. Acio oiki nĩo arutithania wĩra hamwe na niĩ nĩ ũndũ wa Ũthamaki wa Ngai, na nĩ makoretwo makĩnyũmĩrĩria mũno.* 12 Nĩ mwageithio nĩ Epafara,+ o we ngombo ya Kristo Jesu yumĩte gatagatĩ-inĩ kanyu. Hingo ciothe nĩ erutanagĩria nĩ ũndũ wanyu mahoya-inĩ make, nĩguo marigĩrĩrio-inĩ mũgaakorũo mwĩhandĩte biũ na mũkorũo na ũũma mũrũmu harĩ wendi wothe wa Ngai. 13 Tondũ niĩ ndĩ mũira atĩ nĩ erutanagĩria mũno nĩ ũndũ wanyu na nĩ ũndũ wa arĩa marĩ Laodikia na Hierapoli.

14 Nĩ mwageithio nĩ Luka+ ũrĩa ndagĩtarĩ, o ũcio twendete, Dema+ o nake nĩ amũgeithia. 15 Ngeithĩriai ariũ a Ithe witũ a Laodikia na mũgeithie Numifa na kĩũngano kĩrĩa gĩcemanagia gwake mũciĩ.+ 16 Na rĩrĩa mũgaakorũo mũthomeirũo marũa maya, bangai mathomerũo+ kĩũngano kĩa Alaodikia na inyuĩ mũthome marũa ma kuuma Laodikia. 17 Ningĩ mwĩre Arikipo+ ũũ: “Menyagĩrĩra ũtungata ũrĩa wetĩkĩrire thĩinĩ wa Mwathani, nĩguo ũũhingie.”

18 Ici nĩ ngeithi ciakwa niĩ Paulo, ndamwandĩkĩra na guoko gwakwa mwene.+ Ririkanagai cioho ciakwa.+ Ũtugi mũnene ũroikara hamwe na inyuĩ.