Isaia
66 Ũũ nĩguo Jehova ekuuga:
“Igũrũ nĩrĩo gĩtĩ gĩakwa kĩa ũnene, nayo thĩ nĩyo gaturũa ka magũrũ makwa.+
2 “Guoko gwakwa mwene nĩkuo gwathondekire indo icio ciothe,
Na ũguo nĩguo gwathiire ciothe igĩkorũo kuo,” ũguo nĩguo Jehova ekuuga.+
“Mũndũ ũrĩa ngũcaria nĩ ũyũ,
Ũrĩa mwĩnyihia na ũrĩ na roho mũthuthĩku na ũinainaga* nĩ ũndũ wa kiugo gĩakwa.+
3 Mũndũ ũrĩa ũrathĩnja ndegwa ahaana o ta ũrĩa ũũragaga mũndũ.+
Nake ũrĩa ũraruta igongona rĩa ngʼondu ahaana o ta mũndũ ũroina ngui ngingo.+
Nake ũrĩa ũraruta kĩheo, ahaana ta araruta thakame ya ngũrũe!+
Nake ũrĩa ũraruta igongona rĩa ũbani+ rĩa kĩririkano, ahaana o ta mũndũ ũrarathima akĩhũthagĩra ciugo cia ũgo.*+
Nĩ methuurĩire njĩra ciao,
O na magakenio nĩ maũndũ marĩa marĩ magigi.
4 Nĩ ũndũ ũcio nĩ ngũthuura njĩra cia kũmaherithia,+
Na maũndũ marĩa makoragwo metigĩrĩte nĩmo ngaamarehera.
Tondũ rĩrĩa ndetanire, gũtirĩ mũndũ wetĩkire;
Rĩrĩa ndaririe, gũtirĩ mũndũ wathikĩrĩirie.+
Maathiire o na mbere gwĩka maũndũ moru maitho-inĩ makwa,
Na magĩthuura gwĩka maũndũ marĩa mataangenagia.”+
5 Iguai kiugo kĩa Jehova, inyuĩ mũinainaga* nĩ ũndũ wa kiugo gĩake:
“Ariũ a ithe wanyu arĩa mamũthũire na meyamũranagia na inyuĩ tondũ wa rĩĩtwa rĩakwa mooigire atĩrĩ, ‘Jehova arogoocwo!’+
No We nĩ akaamumĩrĩra na amũrehere gĩkeno,
Ĩndĩ o nĩo magaaconorithio.”+
6 Kũrĩ na mũgambo wa mbugĩrĩrio ũroima itũũra-inĩ, mũgambo ũroima hekarũ-inĩ!
Nĩ mũgambo wa Jehova akĩrĩha thũ ciake kĩrĩa gĩciagĩrĩire.
7 Mũtumia ũgwĩtwo Zayuni aaciarire o na atambĩrĩirie kũigua ruo rwa kũgĩa mwana.+
Agĩgĩciara mwana wa kahĩĩ o na atambĩrĩirie kũigua ruo rwa kũgĩa mwana.
8 Nũũ ũrĩ waigua ũndũ ta ũcio?
Nũũ ũrĩ wona maũndũ ta macio?
Hihi bũrũri no ũciarũo na mũthenya ũmwe?
Kana hihi rũrĩrĩ no rũciarũo ruothe o rĩmwe?
No rĩrĩa Zayuni aambĩrĩirie kũigua ruo rwa kũgĩa mwana, o hĩndĩ ĩyo norĩo aaciarire ariũ ake.
9 “Hihi no ndũme mwana akinyie ihinda rĩa gũciarũo na njage gũtũma aciarũo?” ũguo nĩguo Jehova ekũũria.
“Kana hihi no ndũme mwana ambĩrĩrie gũciarũo na njoke hinge nda?” ũguo nĩguo Ngai wanyu ekũũria.
10 Kenai hamwe na Jerusalemu na mũcanjamũke hamwe nake,+ inyuĩ inyuothe mũmwendete.+
Kenai mũno hamwe nake, inyuĩ inyuothe mũracakaya nĩ ũndũ wake,
11 Nĩ gũkorũo nĩ mũkoonga nyondo ciake cia kũhooreria nginya mũiganie,
Na mũnyue mũnyotoke na mũgĩe na gĩkeno nĩ ũndũ wa riri wake mũingĩ.
12 Nĩ gũkorũo ũũ nĩguo Jehova ekuuga:
Nĩ mũkoonga na mũkuuo na mũgongo,
Na mũcũgacũgĩrio maru-inĩ.
13 O ta ũrĩa mũtumia omagĩrĩria mũrũwe,
Noguo ngaaikara ngĩmũmagĩrĩria;+
Na nĩ mũkoomĩrĩrio igũrũ rĩgiĩ Jerusalemu.+
14 Nĩ mũkoona ũndũ ũcio, nacio ngoro cianyu icanjamũke,
Mahĩndĩ manyu makaarirũka o ta nyeki nduru.
15 “Nĩ gũkorũo Jehova agooka o ta mwaki,+
Na ngaari ciake cia mbarathi itariĩ o ta rũhuho rũnene,+
Nĩguo arĩhane na marakara manene,
Na akũũmane akĩhũthĩra nĩnĩmbĩ cia mwaki.+
16 Tondũ Jehova akaarehe ituĩro arĩ na mwaki,
Okĩrĩre andũ othe, arĩ na rũhiũ rwake rwa njora;
Na arĩa makooragwo nĩ Jehova magaakorũo marĩ aingĩ.
17 “Arĩa meyamũrĩte na magetheria nĩguo matonye mĩgũnda-inĩ*+ marũmĩrĩire ũrĩa ũrĩ gatagatĩ, arĩa marĩaga nyama cia ngũrũe+ na indo irĩ magigi na mbĩa,+ othe magaathira hamwe,” ũguo nĩguo Jehova oigĩte. 18 “Tondũ nĩ njũĩ ciĩko ciao na methugunda mao, nĩ ngũka gũcokanĩrĩria andũ a ndũrĩrĩ ciothe na thiomi, na nĩ magooka mone riri wakwa.”
19 “Na nĩ ngeekĩra kĩmenyithia gatagatĩ-inĩ kao, na nĩ ngaatũma amwe a arĩa makaahonoka mathiĩ kũrĩ ndũrĩrĩ, mathiĩ Tarishishi,+ Puli, na Ludu,+ arĩa mahũthagĩra ũta, na mathiĩ Tubali na Javani,+ o na icigĩrĩra-inĩ iria irĩ kũraya iria itarĩ ciaigua ũhoro wakwa o na kana ikona riri wakwa; na nĩ makaahunjia ũhoro wa riri wakwa gatagatĩ-inĩ ka ndũrĩrĩ.+ 20 Nĩ makaarehe ariũ a ithe wanyu othe kuuma mabũrũri mothe+ marĩ kĩheo kũrĩ Jehova, makĩhũthĩra mbarathi, ngaari cia mbarathi, tũkaari twa gũkururio tũkunĩkanie, nyũmbũ, ngamĩra irĩ na ihenya, mambatio Jerusalemu kĩrĩma-inĩ gĩakwa kĩamũre, o ta ũrĩa andũ a Isiraeli marehaga kĩheo kĩao nyũmba-inĩ ya Jehova magĩkuuĩte na kĩndũ gĩtheru,” ũguo nĩguo Jehova ekuuga.
21 “Ningĩ nĩ ngoya amwe matuĩke athĩnjĩri-Ngai na angĩ Alawii,” ũguo nĩguo Jehova ekuuga.
22 “Tondũ o ta ũrĩa igũrũ rĩerũ na thĩ njerũ+ iria ndĩrathondeka igũtũũra ciĩhandĩte mbere yakwa, noguo mbeũ yaku* na rĩĩtwa rĩaku igũtũũra,”+ ũguo nĩguo Jehova ekuuga.
23 “Na kuuma karũgamo ka mweri nginya karũgamo kau kangĩ ka mweri na kuuma thabatũ nginya thabatũ ĩyo ĩngĩ,
Andũ othe nĩ magooka kũinamĩrĩra* mbere yakwa,”+ ũguo nĩguo Jehova ekuuga.
24 “Nao nĩ makooima merorere ciimba cia andũ arĩa maanemeire;
Tondũ igunyũ cia andũ acio itigaakua,
Na mwaki wa kũmaniina ndũkaahorio,+
Nao magaatuĩka kĩndũ kĩrĩ magigi harĩ andũ othe.”