Ũhoro Mwega Ũrĩa Waandĩkirũo nĩ Mariko
1 Kĩambĩrĩria kĩa ũhoro ũrĩa mwega wĩgiĩ Jesu Kristo, Mũrũ wa Ngai: 2 O ta ũrĩa kwandĩkĩtwo ũũ nĩ mũnabii Isaia: “(Atĩrĩrĩ, nĩ ngũtũma mũtũmwo wakwa mbere yaku,* ũrĩa ũgũkũhaarĩrĩria njĩra.)+ 3 Harĩ mũgambo wa mũndũ ũranĩrĩra werũ-inĩ ũkoiga: ‘Haarĩriai njĩra ya Jehova!* Rũngai barabara ciake.’”+ 4 Johana Mũbatithania aarĩ werũ-inĩ akĩhunjia atĩ andũ mabatithio ĩrĩ njĩra ya kuonania kwĩrira nĩguo moherũo mehia.+ 5 Na gĩcigo gĩothe kĩa Judea na aikari othe a Jerusalemu nĩ maathiaga kũrĩ we, na makabatithio* nĩwe Rũũĩ-inĩ rwa Jorodani, makiumbũraga mehia mao matekũhithĩrĩra.+ 6 Na rĩrĩ, Johana eehumbaga nguo cia guoya wa ngamĩra na akeyoha mũcibi wa rũũa njohero,+ na aarĩaga ngigĩ na ũũkĩ wa gĩthaka.+ 7 Na aahunjagia akiugaga atĩrĩ: “Nĩ harĩ mũndũ ũrĩ na hinya kũngĩra ũroka thutha wakwa, na ndirĩ mwagĩrĩru wa kũinamĩrĩra njohore rũrigi rwa iratũ ciake.+ 8 Niĩ ndĩmũbatithagia na maĩ, ĩndĩ ũcio akaamũbatithagia na roho mũtheru.”+
9 Matukũ-inĩ macio, Jesu akiuma Nazarethi ya Galili na agĩthiĩ akĩbatithio nĩ Johana Rũũĩ-inĩ rwa Jorodani.+ 10 Na o rĩmwe arĩkia kuumĩra maĩ-inĩ, akĩona igũrũ rĩkĩhingũka, na roho wa Ngai ũgĩikũrũka ũhaana ta ndutura ũgĩũka igũrũ rĩake.+ 11 Na mũgambo ũkiuma igũrũ ũkiuga atĩrĩ: “Wee nĩwe Mũrũ wakwa, ũrĩa nyendete; nĩ ngwĩtĩkĩrĩte.”+
12 Na o hĩndĩ ĩyo agĩtindĩkwo nĩ roho gũthiĩ werũ-inĩ. 13 Agĩikara kũu werũ-inĩ thikũ 40, akĩgeragio nĩ Shaitani.+ Na aarĩ hamwe na nyamũ cia gĩthaka, ĩndĩ araika nĩ maamũtungatagĩra.+
14 Thutha wa Johana kũnyitwo, Jesu agĩthiĩ Galili,+ akĩhunjagia ũhoro ũrĩa mwega wa Ngai+ 15 akiugaga: “Ihinda rĩrĩa rĩtuĩtwo nĩ ikinyu, naguo Ũthamaki wa Ngai nĩ ũkuhĩrĩirie. Mwĩrirei,+ na mũgĩe na wĩtĩkio harĩ ũhoro ũrĩa mwega.”
16 Na rĩrĩa aathiagĩra rũteere-inĩ rwa Iria rĩa Galili, akĩona Simoni na mũrũ wa nyina Andrea+ magĩikia neti ciao iria-inĩ,+ nĩ gũkorũo maarĩ ategi a thamaki.+ 17 Nĩ ũndũ ũcio Jesu akĩmeera ũũ: “Nũmĩrĩrai, na nĩ ngũmũtua ategi a andũ.”+ 18 Na o hĩndĩ ĩyo magĩtiga neti ciao, makĩmũrũmĩrĩra.+ 19 Athiathia hanini, akĩona Jakubu mũrũ wa Zebedi na Johana mũrũ wa nyina, marĩ thĩinĩ wa gatarũ kao magĩtuma neti ciao,+ 20 na ategũte mahinda akĩmeta. Nĩ ũndũ ũcio, magĩtiga ithe wao Zebedi hau gatarũ-inĩ arĩ na andũ a wĩra na makĩmũrũmĩrĩra. 21 Na magĩthiĩ Kaperinaumu.
Na rĩrĩa Thabatũ yaambĩrĩirie, o rĩo akĩingĩra thunagogi-inĩ na akĩambĩrĩria kũrutana.+ 22 Nao makĩgegio nĩ njĩra yake ya kũrutana, tondũ aamarutaga ta mũndũ warĩ na wathani, no ti ta andĩki-watho.+ 23 Kahinda-inĩ o ro kau kũu thunagogi-inĩ yao nĩ kwarĩ na mũndũ warĩ na roho mũũru, na akĩanĩrĩra akiuga atĩrĩ: 24 “Tũrorania kĩĩ nawe, Jesu Mũnazarethi?+ Hihi woka gũtũniina? Nĩ njũĩ wega wee ũrĩ ũ, wee nĩwe Ũrĩa Mũtheru wa Ngai!”+ 25 No Jesu agĩkũũma roho ũcio mũũru, akiuga ũũ: “Kira, na uume thĩinĩ wake!” 26 Na thutha wa roho ũcio mũũru gũtugutania mũndũ ũcio na gũkayũrũrũka na mũgambo waguo wothe, ũkiuma thĩinĩ wake. 27 Na rĩrĩ, andũ othe makĩgega mũno na makĩambĩrĩria kwĩrana atĩrĩ: “Ĩ nĩ atĩa ũũ? Ũyũ nĩ ũrutani mwerũ! Arĩ na hinya wa gwatha nginya maroho moru, na makamwathĩkĩra.” 28 Nĩ ũndũ ũcio ũhoro wake ũgĩtherema na ihenya mĩena yothe gĩcigo-inĩ kĩu gĩothe kĩa Galili.
29 Hĩndĩ ĩyo makiuma thunagogi-inĩ magĩthiĩ mũciĩ gwa Simoni na Andrea marĩ na Jakubu na Johana.+ 30 Na rĩrĩ, nyina wa mũtumia wa Simoni+ nĩ aakomete arĩ mũrwaru mũrimũ wa kũhiũha mwĩrĩ, na makĩmwĩra ũhoro wake o rĩo. 31 Nake agĩthiĩ harĩ we, akĩmũnyita guoko na akĩmũũkĩria. Agĩthirũo nĩ mũrimũ ũcio wa kũhiũha mwĩrĩ, na akĩambĩrĩria kũmatungatĩra.
32 Rĩrĩa gwakinyire hwaĩ-inĩ riũa rĩathũa, andũ makĩambĩrĩria kũmũrehera arĩa othe maarĩ arwaru na arĩa maarĩ na ndaimono;+ 33 na andũ othe a itũũra rĩu makĩgomana hau mũrango-inĩ. 34 Nĩ ũndũ ũcio akĩhonia andũ aingĩ arĩa maarĩ na mĩrimũ mĩthemba mĩingĩ,+ na akĩingata ndaimono nyingĩ, ĩndĩ ndeetĩkagĩria ndaimono icio kwaria, nĩ gũkorũo nĩ ciamenyaga atĩ nĩwe Kristo.*
35 Rũcinĩ tene kũrĩ o na nduma, agĩũkĩra na akiuma nja, agĩthiĩ kũndũ gũtaarĩ na andũ, na arĩ kũu akĩambĩrĩria kũhoya.+ 36 No rĩrĩ, Simoni na arĩa maarĩ nao makĩambĩrĩria kũmũcaria 37 na maamuona, makĩmwĩra ũũ: “Andũ othe nĩwe maracaria.” 38 No we akĩmeera atĩrĩ: “Nĩ tũthiĩi kũndũ kũngĩ, taũni-inĩ iria irĩ hakuhĩ, nĩguo ngahunjie kũu o nakuo, tondũ nĩkĩo gĩatũmire njũke.”+ 39 Na agĩthiĩ akĩhunjagia thunagogi-inĩ ciao kũu Galili guothe akĩingataga ndaimono.+
40 Ningĩ hagĩũka mũndũ warĩ na mangũ, akĩmũthaitha o na akĩmũturĩria maru, akĩmwĩra atĩrĩ: “Angĩkorũo no wende, theria.”+ 41 Nĩ ũndũ ũcio akĩringwo nĩ tha, agĩtambũrũkia guoko gwake na akĩmũhutia akĩmwĩra: “Nĩ ngwenda! Thera.”+ 42 Hĩndĩ o ĩyo mangũ macio magĩthira, na agĩthera. 43 Na o rĩo akĩmwĩra athiĩ na akĩmũhe mũkaana mũrũmu, 44 akĩmwĩra ũũ: “Ndũkere mũndũ o na ũrĩkũ, no thiĩ wĩyonanie kũrĩ mũthĩnjĩri-Ngai, na nĩ ũndũ wa gũtherio gwaku ũrute indo iria Musa aathanire,+ nĩguo magĩe na ũira.”+ 45 No thutha wa gũthiĩ, mũndũ ũcio akĩambĩrĩria kũmemerekia ũhoro ũcio na njĩra nene na kũũtheremia kũndũ guothe, nginya Jesu akĩremwo nĩ kũingĩraga matũũra-inĩ akĩonagwo nĩ andũ, no aathiaga kũndũ gũtaarĩ na andũ. Ĩndĩ andũ no maathiaga kũrĩ we moimĩte mĩena yothe.+