Samueli wa Mbere

9 Na rĩrĩ, nĩ kwarĩ mũndũ wa Benjamini wetagwo Kishu,+ mũrũ wa Abieli, mũrũ wa Zeroru mũrũ wa Bekorathu mũrũ wa Afia, Mũbenjamini+ warĩ mũndũ mũtongu mũno. 2 Nĩ aarĩ na mũriũ wetagwo Saulu,+ warĩ mũndũ mwĩthĩ na mũthaka—gũtiarĩ mũndũrũme ũngĩ gatagatĩ-inĩ ka Aisiraeli warĩ mũthaka kũmũkĩra⁠—na aarĩ mũraihu gũkĩra andũ arĩa angĩ othe kuuma ciande-inĩ nginya mũtwe.

3 Hĩndĩ ĩrĩa ndigiri* cia Kishu ithe wa Saulu ciorire, Kishu akĩra mũrũwe Saulu atĩrĩ: “Oya ndungata ĩmwe mũthiĩ mũgacarie ndigiri icio.” 4 Magĩtuĩkania gĩcigo kĩrĩa kĩrĩ irĩma kĩa Efiraimu na gĩcigo gĩa Shalisha, no matiacionire. Magĩthiĩ nginya gĩcigo gĩa Shaalimu, no ndigiri icio itiarĩ kũu. Magĩtuĩkania bũrũri wothe wa Abenjamini, no matiacionire.

5 Magĩkinya gĩcigo gĩa Zufi, na Saulu akĩra ndungata ĩyo yake maarĩ nayo ũũ: “Ũka, nĩ tũcoke, nĩguo baba ndakambĩrĩrie gũtangĩka nĩ ũndũ witũ handũ ha ndigiri icio.”+ 6 No ndungata ĩyo ĩkĩmwĩra ũũ: “Atĩrĩrĩ, nĩ kũrĩ mũndũ wa Ngai itũũra-inĩ rĩrĩ, mũndũ ũheetwo gĩtĩo. Ũndũ ũrĩa wothe oigaga nĩ ũhingaga.+ Nĩ tũthiĩ kuo o rĩu. Ahota gũtwĩra njĩra ĩrĩa tũkũgera.” 7 Saulu agĩkĩũria ndungata ĩyo yake atĩrĩ: “Twathiĩ-rĩ, tũgũtwarĩra mũndũ ũcio kĩĩ? Tũtirĩ na mũgate mondo-inĩ citũ; hatirĩ o na kĩ tũngĩtwarĩra mũndũ ũcio wa Ngai ũrĩa wa ma kĩrĩ kĩheo. Nĩ kĩĩ tũrĩ nakĩo?” 8 Ndungata ĩyo ĩgĩcokeria Saulu rĩngĩ ĩkĩmwĩra ũũ: “Atĩrĩrĩ, ndĩ na gĩcunjĩ kĩmwe harĩ inya gĩa cekeri* ya betha guoko-inĩ gwakwa. Nĩ ngũmĩneana kũrĩ mũndũ ũcio wa Ngai ũrĩa wa ma, na nĩ egũtwĩra njĩra ĩrĩa tũkũgera.” 9 (Tene thĩinĩ wa Isiraeli, mũndũ ooigaga ũũ agĩthiĩ gũtuĩria ũhoro kũrĩ Ngai: “Ũka, nĩ tũthiĩ kũrĩ muoni maũndũ.”+ Nĩ gũkorũo mũnabii wa mahinda maya, tene eetagwo muoni maũndũ.) 10 Nake Saulu akĩra ndungata yake atĩrĩ: “Nĩ woiga ũndũ mwega. Nĩ tũthiĩ.” Magĩgĩthiĩ itũũra-inĩ rĩu kũrĩa mũndũ ũcio wa Ngai ũrĩa wa ma aarĩ.

11 Na rĩrĩa maambataga mwambato merekeire itũũra rĩu, magĩcemania na airĩtu maathiaga gũtaha maĩ. Makĩmoria ũũ: “Hihi muoni maũndũ+ arĩ gũkũ?” 12 Makĩmacokeria atĩrĩ: “Arĩ gũkũ. Atĩrĩrĩ, arĩ na hau mbere yanyu. Mwĩhĩkei, nĩ gũkorũo ũmũthĩ nĩ okĩte itũũra-inĩ tondũ ũmũthĩ andũ nĩ mararuta igongona+ marĩ handũ harĩa hatũũgĩru.+ 13 Mwatonya itũũra-inĩ, nĩ mũkũmũkora atanambata handũ harĩa hatũũgĩru akarĩe. Andũ matingĩrĩa atakinyĩte, tondũ nĩwe ũrathimaga igongona. Arĩkia gwĩka ũguo, hĩndĩ ĩyo nĩrĩo arĩa manyitĩtwo ũgeni marĩaga. Nĩ ũndũ ũcio ambatai o rĩu, na nĩ mũkũmũkora.” 14 Magĩkĩambata itũũra-inĩ. Na marĩ hakuhĩ gũkinya gatagatĩ ga itũũra, makĩona Samueli okĩte kũmatũnga nĩguo mathiĩ handũ harĩa hatũũgĩru.

15 Mũthenya ũmwe mbere ya Saulu gũka, Jehova nĩ eerĩte* Samueli ũũ: 16 “Rũciũ ihinda-inĩ ta rĩrĩ, nĩ ngaatũma mũndũ kuuma bũrũri wa Benjamini oke kũrĩ wee.+ Nawe no mũhaka ũkaamũitĩrĩria maguta atuĩke mũtongoria wa andũ akwa Isiraeli,+ na nĩ akaahonokia andũ akwa kuuma guoko-inĩ kwa Afilisti. Nĩ gũkorũo nĩ nyonete mĩnyamaro ya andũ akwa, na kĩrĩro kĩao gĩkanginyĩra.”+ 17 Rĩrĩa Samueli oonire Saulu, Jehova akĩmwĩra atĩrĩ: “Ĩ ũyũ mũndũ ũrĩa ndĩrakwĩrire ũũ ũhoro-inĩ wake, ‘Ũyũ nĩwe ũgũtongoria andũ akwa.’”*+

18 Nake Saulu agĩthiĩ harĩ Samueli gatagatĩ ga kĩhingo akĩmũũria ũũ: “Ta njĩĩra atĩrĩrĩ, nyũmba ya muoni maũndũ ĩkoragwo ha?” 19 Samueli akĩra Saulu atĩrĩ: “Nĩ niĩ muoni maũndũ. Ndongoria twambate handũ harĩa hatũũgĩru, na tũrĩanĩre nawe ũmũthĩ.+ Rũciũ rũcinĩ nĩ ngaakũrekereria uumagare, na nĩ ngaakwĩra ũrĩa wothe ũrenda kũmenya.* 20 Ha ũhoro wa ndigiri iria ciorire thikũ ithatũ hĩtũku,+ ndũgatangĩke nĩ ũndũ wacio, nĩ gũkorũo nĩ nyoneku. Ningĩ-rĩ, kaĩ indo ciothe cia kwĩrirĩrio cia Isiraeli irĩ cia ũ? Na githĩ ti ciaku na cia nyũmba yothe ya thoguo?”+ 21 Nĩ ũndũ ũcio Saulu akĩmũcokeria atĩrĩ: “Na githĩ niĩ ndirĩ Mũbenjamini wa mũhĩrĩga ũrĩa mũnini mũno thĩinĩ wa Isiraeli,+ na famĩlĩ itũ nĩyo famĩlĩ ĩrĩa ĩtoĩkaine harĩ famĩlĩ ciothe cia mũhĩrĩga wa Benjamini? Kwoguo-rĩ, wanjĩĩra ũguo nĩkĩ?”

22 Samueli agĩcoka akĩoya Saulu na ndungata yake na akĩmatwara nyũmba-inĩ ya kũrĩĩra akĩmonia handũ harĩa megũikara hega gũkĩra ha arĩa angĩ maanyitĩtwo ũgeni; kwarĩ na arũme ta 30. 23 Samueli akĩra mũndũ ũrĩa warugaga ũũ: “Rehe gĩcunjĩ kĩrĩa ngũneire ndakwĩra atĩrĩ, ‘Kĩige mwanya.’” 24 Nĩ ũndũ ũcio mũndũ ũcio warugaga akĩoya kũgũrũ na kĩrĩa kwarĩ nakĩo, na agĩkũiga mbere ya Saulu. Nake Samueli akĩmwĩra ũũ: “Kĩrĩa gĩkũigĩtwo nĩ kĩarehwo mbere yaku. Rĩa, tondũ nĩwe mekũigĩire nĩ ũndũ wa ihinda rĩrĩ. Nĩ gũkorũo ngũmeerĩte atĩrĩ, ‘Nĩ njĩtĩte ageni.’” Saulu agĩkĩrĩanĩra na Samueli mũthenya ũcio. 25 Magĩcoka magĩikũrũka kuuma handũ hau hatũũgĩru+ magĩthiĩ itũũra-inĩ, na agĩthiĩ na mbere kwaria na Saulu marĩ nyũmba igũrũ. 26 Magĩũkĩra tene, na gwathererũka Samueli agĩta Saulu nyũmba igũrũ akĩmwĩra atĩrĩ: “Wĩhaarĩrie, nĩgetha ngũrekererie uumagare.” Nĩ ũndũ ũcio Saulu akĩĩhaarĩria na akiuma nja marĩ hamwe na Samueli. 27 Na rĩrĩa maikũrũkaga merekeire nja ya itũũra, Samueli akĩra Saulu atĩrĩ: “Ĩra ndungata ĩthiage,”+ nĩ ũndũ ũcio ĩgĩthiaga. “No wee amba ũrũgame, nĩguo ngũmenyithie uuge wa Ngai.”