Isaia
39 Hĩndĩ ĩyo mũthamaki wa Babuloni, Merodaku-baladani mũrũ wa Baladani agĩtũma marũa na kĩheo kũrĩ Hezekia,+ tondũ nĩ aaiguĩte atĩ nĩ aarwarĩte na akahona.+ 2 Hezekia akĩamũkĩra* andũ acio maatũmĩtwo na akĩmonia nyũmba yake ya kũiga mũthithũ+—betha, thahabu, maguta ma balisamu na maguta mangĩ ma goro, kũrĩa indo ciake ciothe cia mbaara ciaigagwo, na kĩrĩa gĩothe kĩarĩ igĩna-inĩ ciake. Gũtirĩ kĩndũ o na kĩmwe Hezekia ataamonirie thĩinĩ wa nyũmba yake* na thĩinĩ wa wathani wake wothe.
3 Thutha ũcio mũnabii Isaia agĩũka kũrĩ Mũthamaki Hezekia akĩmũũria atĩrĩ: “Andũ acio moigire atĩa, na mekuumĩte kũ?” Nake Hezekia akĩmũcokeria ũũ: “Mekuumĩte bũrũri wa kũraya, bũrũri wa Babuloni.+ 4 Agĩcoka akĩmũũria ũũ: “Nĩ kĩĩ monire thĩinĩ wa nyũmba yaku?”* Hezekia akĩmũcokeria atĩrĩ: “Monire indo ciothe thĩinĩ wa nyũmba yakwa.* Gũtirĩ kĩndũ o na kĩmwe itanamonia thĩinĩ wa igĩna ciakwa.”
5 Isaia agĩkĩra Hezekia ũũ: “Thikĩrĩria kiugo kĩa Jehova mũnene wa ita, 6 ‘Atĩrĩrĩ, matukũ nĩ maroka, rĩrĩa indo iria ciothe irĩ thĩinĩ wa nyũmba yaku,* o hamwe na iria ciothe maithe maku ma tene matũũrĩte maigĩte nginya ũmũthĩ igaakuuo itwarũo Babuloni. Gũtirĩ kĩndũ o na kĩmwe gĩgaatigara,’+ ũguo nĩguo Jehova ekuuga.+ 7 ‘Na ariũ amwe aku mwene arĩa ũgaaciara nĩ magaakuuo na nĩ magaatuĩka anene a kwa mũthamaki thĩinĩ wa nyũmba ya mũthamaki wa Babuloni.’”+
8 Hĩndĩ ĩyo Hezekia akĩra Isaia atĩrĩ: “Kiugo kĩu kĩa Jehova waria nĩ kĩega.” Agĩcoka akiuga ũũ: “Tondũ ũtũũro-inĩ wakwa* gũgũkorũo kũrĩ na thayũ na kwĩhandĩte wega.”*+