Athamaki wa Kerĩ

17 Mwaka-inĩ wa 12 wa Mũthamaki Ahazu wa Juda, Hoshea+ mũrũ wa Ela nĩ aatuĩkire mũthamaki wa Isiraeli thĩinĩ wa Samaria; aathanire mĩaka kenda. 2 Nake agĩthiĩ na mbere gwĩka maũndũ moru maitho-inĩ ma Jehova, no ti na gĩkĩro kĩa athamaki a Isiraeli arĩa maarĩ mbere yake. 3 Mũthamaki Shalimanesa wa Ashuri akĩambata nĩguo amũũkĩrĩre,+ na Hoshea agĩtuĩka ndungata yake na akĩambĩrĩria kũmũrĩha igooti.+ 4 No rĩrĩ, mũthamaki wa Ashuri akĩmenya atĩ Hoshea nĩ aanyitanĩire harĩ kũbanga njama, tondũ nĩ aatũmĩte atũmwo kũrĩ Mũthamaki So wa Misiri+ na ndaatwaraga igooti kũrĩ mũthamaki wa Ashuri ta mĩaka-inĩ ya hau kabere. Nĩ ũndũ ũcio, mũthamaki wa Ashuri akĩmũhingĩra na akĩmuoha njera.

5 Mũthamaki wa Ashuri agĩtharĩkĩra bũrũri ũcio wothe, na agĩkinya Samaria na akĩmĩrigicĩria ihinda rĩa mĩaka ĩtatũ. 6 Mwaka-inĩ wa kenda wa Hoshea, mũthamaki wa Ashuri agĩtaha Samaria.+ Agĩcoka agĩtwara andũ a Isiraeli ithamĩrio+ Ashuri na akĩmaiga Hala na Haboru rũũĩ-inĩ rwa Gozani+ o na matũũra-inĩ ma Amedi maikarage kuo.+

7 Ũndũ ũcio wekĩkire tondũ andũ a Isiraeli nĩ meehĩirie Jehova Ngai wao, o ũcio wamarutĩte bũrũri wa Misiri akĩmaruta rungu rwa wathani wa Firauni mũthamaki wa Misiri.+ Nao magĩthathaiya* ngai ingĩ,+ 8 makĩrũmĩrĩra mĩtugo ya ndũrĩrĩ iria Jehova aaingatĩte ciehere mbere ya Aisiraeli, na makĩrũmĩrĩra mĩtugo ĩrĩa yaambĩrĩirio nĩ athamaki a Isiraeli.

9 Aisiraeli maathingataga maũndũ marĩa mataagĩrĩire kũringana na Jehova Ngai wao. Magĩthiĩ na mbere gwaka kũndũ gũtũũgĩru matũũra-inĩ mao mothe,+ kuuma nyũmba-inĩ ndaya na igũrũ ya mũrangĩri o nginya itũũra-inĩ rĩrĩ na ũgitĩri.* 10 Maathire na mbere kwĩhandĩra itugĩ cia kũhoywo na mĩtĩ ya kũhoywo*+ igũrũ rĩa karĩma gothe gatũũgĩru na rungu rwa mũtĩ wothe mũruru;+ 11 ningĩ nĩ maarutaga ndogo ya magongona igũrũ rĩa kũndũ guothe gũtũũgĩru o ta ũrĩa ndũrĩrĩ iria Jehova aatwarĩte ithamĩrio ciehere mbere yao ciekaga.+ Magĩthiĩ na mbere gwĩka maũndũ ma waganu nĩguo marakarie Jehova.

12 Nao magĩthiĩ na mbere gũtungatĩra mĩhianano ĩrĩ magigi*+ ĩrĩa Jehova aameerĩte ũhoro wayo atĩrĩ: “Mũtikaneke ũguo!”+ 13 Jehova aaheaga Isiraeli na Juda mũkaana kũgerera anabii ake othe na oni cioneki othe+ akoiga atĩrĩ: “Garũrũkai mũtigane na mĩthiĩre yanyu ya waganu!+ Rũmagĩrĩrai maathani makwa na mawatho makwa kũringana na watho wothe ũrĩa ndathire maithe manyu ma tene na ũrĩa ndamũtũmĩire kũgerera ndungata ciakwa anabii.” 14 No matiathikĩrĩirie, na maathiire na mbere kũrema o ta* maithe mao ma tene arĩa matoonanĩtie wĩtĩkio harĩ Jehova Ngai wao.+ 15 Magĩgĩthiĩ na mbere kũrega mawatho make na kĩrĩkanĩro gĩake+ kĩrĩa aarĩkanĩire na maithe mao ma tene na iririkania ciake iria aaheanĩte nĩguo amahe mũkaana,+ na magĩthiĩ na mbere kũrũmĩrĩra mĩhianano ĩtarĩ kĩene+ na o ene magĩtuĩka kĩndũ gĩtarĩ kĩene,+ makĩĩgerekania na ndũrĩrĩ iria ciamathiũrũrũkĩirie kũndũ guothe, o icio Jehova aamaathĩte matikegerekanie nacio.+

16 Maathiire na mbere gũtiganĩria maathani mothe ma Jehova Ngai wao, magĩthondeka mĩhianano ya cuma* ya njaũ igĩrĩ+ na mũtĩ wa kũhoywo,*+ na makĩinamĩrĩra mbũtũ yothe ya igũrũ+ o na magĩtungatĩra Baali.+ 17 Ningĩ nĩ maahĩtũkĩirie ariũ na aarĩ ao mwaki-inĩ,+ magĩka maũndũ ma ũragũri+ na magĩcaria imenyithia cia ũragũri, na magĩthiĩ na mbere kwĩneana* harĩ gwĩka maũndũ moru maitho-inĩ ma Jehova nĩguo mamũrakarie.

18 Nĩ ũndũ ũcio Jehova akĩrakario mũno nĩ Isiraeli, nginya akĩmeheria maitho-inĩ make.+ Ndaarekire o na ũmwe wao atigare o tiga mũhĩrĩga wa Juda wiki.

19 O na andũ a Juda matiarũmĩrĩire maathani ma Jehova Ngai wao;+ o nao maarũmĩrĩire mĩtugo ĩrĩa Isiraeli maarũmĩrĩire.+ 20 Jehova agĩkĩrega njiarũa ciothe cia Isiraeli na akĩmaconorithia na akĩmaneana guoko-inĩ kwa atahani, nginya akĩmeheria mbere yake. 21 Agĩtembũra Isiraeli kuuma harĩ nyũmba ya Daudi, nao magĩtua Jeroboamu mũrũ wa Nebati mũthamaki.+ No Jeroboamu agĩtũma Isiraeli matige kũrũmĩrĩra Jehova, na agĩtũma mehie rĩhia inene. 22 Na andũ a Isiraeli magĩthiĩ na mbere kũrũmĩrĩra mehia mothe marĩa Jeroboamu eekĩte.+ Matiatiganire namo 23 nginya Jehova akĩeheria Isiraeli maitho-inĩ make, o ta ũrĩa ooigĩte kũgerera ndungata ciake ciothe anabii.+ Nĩ ũndũ ũcio Isiraeli magĩtwarũo ithamĩrio Ashuri makĩeherio bũrũri-inĩ wao,+ na kũu nĩkuo matũire nginya ũmũthĩ ũyũ.

24 Thutha ũcio mũthamaki wa Ashuri akĩrehe andũ kuuma Babuloni, Kuthi, Ava, Hamathu, na Sefarivaimu+ akĩmaiga matũũra-inĩ ma Samaria ithenya rĩa Aisiraeli; nao makĩĩgwatĩra Samaria na magĩtũũra matũũra-inĩ makuo. 25 Rĩrĩa maambĩrĩirie gũtũũra kuo, matietigĩrire* Jehova. Nĩ ũndũ ũcio Jehova agĩtũma mĩrũthi gatagatĩ-inĩ kao+ na ĩkĩũraga andũ amwe. 26 Mũthamaki wa Ashuri agĩtwarĩrũo ũhoro akĩrũo atĩrĩ: “Ndũrĩrĩ iria watwarire ithamĩrio ũgĩciga matũũra-inĩ ma Samaria itiũĩ ndini* ya Ngai wa bũrũri ũcio. Kwoguo aikaraga agĩtũmaga mĩrũthi gatagatĩ-inĩ kao, ĩrĩa ĩramoraga, tondũ gũtirĩ o na ũmwe wao ũĩ ndini ya Ngai wa bũrũri ũcio.”

27 Nake mũthamaki wa Ashuri agĩathana akiuga: “Reke mũthĩnjĩri-Ngai ũmwe wa arĩa mwarehire ithamĩrio kuuma kuo acoke nĩguo atũũre kuo na amarute ndini ya Ngai wa bũrũri ũcio.” 28 Nĩ ũndũ ũcio mũthĩnjĩri-Ngai ũmwe wa arĩa maatwarĩtwo ithamĩrio kuuma Samaria agĩcoka nĩguo atũũre Betheli,+ na akĩambĩrĩria kũmaruta ũrĩa magĩrĩirũo gwĩtigĩra* Jehova.+

29 O na kũrĩ ũguo, o rũrĩrĩ rũgĩĩthondekera ngai yaruo,* ngai iria maaigire nyũmba-inĩ cia ũthathaiya kũndũ kũrĩa gũtũũgĩru gwathondeketwo nĩ Asamaria; o rũrĩrĩ rwekire ũguo matũũra-inĩ mao kũrĩa maaikaraga. 30 Kwoguo andũ a Babuloni magĩthondeka mũhianano wa Sukothu-benothu, andũ a Kuthi magĩthondeka Nerigali, andũ a Hamathu+ magĩthondeka Ashima, 31 nao andũ a Ava magĩthondeka Nibihazu na Tarataka. Andũ a Sefarivaimu maacinaga ariũ ao na mwaki makamarutĩra Adarameleku na Anameleku, ngai cia Sefarivaimu.+ 32 O na gũtuĩka nĩ meetigĩrĩte Jehova, nĩ maathuurire athĩnjĩri-ngai kuuma kũrĩ andũ arĩa angĩ nĩ ũndũ wa kũndũ kũrĩa gũtũũgĩru, na acio nĩo maatungataga nĩ ũndũ wao nyũmba-inĩ cia ũthathaiya kũndũ kũu gũtũũgĩru.+ 33 Kwoguo nĩ meetigĩrĩte Jehova, no maathathayagia ngai ciao ene kũringana na ndini* ya ndũrĩrĩ iria mooimĩte.+

34 Nginya ũmũthĩ ũyũ marũmagĩrĩra ndini ciao cia tene.* Gũtirĩ o na ũmwe wao ũthathayagia* Jehova, na gũtirĩ ũrũmagĩrĩra mawatho make, matuĩro make, Watho, na rĩathani rĩrĩa Jehova aaheire ariũ a Jakubu, o ũcio aagarũrire rĩĩtwa akĩmwĩta Isiraeli.+ 35 Rĩrĩa Jehova aarĩkanĩire kĩrĩkanĩro nao,+ aamaathire akĩmeera atĩrĩ: “Mũtikanetigĩre ngai ingĩ, na mũtikanacinamĩrĩre kana mũcitungatĩre kana mũcirutĩre magongona.+ 36 Ĩndĩ Jehova, o ũcio wamũrutire bũrũri wa Misiri kũgerera hinya mũnene na guoko gũtambũrũkie,+ Nĩwe mwagĩrĩirũo gwĩtigĩra,+ na nĩwe mwagĩrĩirũo kũinamĩrĩra, na nĩwe mwagĩrĩirũo kũrutĩra magongona. 37 Namo mawatho, matuĩro, Watho, na rĩathani, o icio aandĩkire nĩ ũndũ wanyu,+ mwagĩrĩirũo gũcirũmagĩrĩra na kinyi hĩndĩ ciothe, na mũtikanetigĩre ngai ingĩ. 38 Na mũtikanariganĩrũo nĩ kĩrĩkanĩro kĩrĩa ndarĩkanĩire na inyuĩ,+ na mũtikanetigĩre ngai ingĩ. 39 Ĩndĩ Jehova Ngai wanyu nĩwe mwagĩrĩirũo gwĩtigĩra, tondũ nĩwe ũrĩmũhonokagia kuuma guoko-inĩ gwa thũ cianyu ciothe.”

40 No matiathĩkire, na maarũmĩrĩire ndini yao ya tene.*+ 41 Nĩ ũndũ ũcio ndũrĩrĩ icio igĩĩtigĩra Jehova,+ ĩndĩ no maatungatagĩra mĩhianano yao ene ya gwacũhio. Ariũ ao na ariũ a ariũ ao matũire mekaga o ta ũrĩa maithe mao ma tene meekaga, nginya ũmũthĩ ũyũ.