Isaia
63 Ũyũ nũũ ũroka oimĩte Edomu,+
Oimĩte Bozira+ ehumbĩte nguo irĩ na marangi makengu,*
Ũyũ wĩkĩrĩte nguo cia gĩtĩo,
Ahiũhĩte na hinya wake mũingĩ?
“Nĩ niĩ, Ũrĩa waragia na ũthingu,
O we Ũrĩa ũrĩ hinya mũingĩ wa kũhonokania.”
2 Nĩ kĩĩ gĩtũmĩte nguo ciaku itunĩhe,
Na nĩ kĩĩ gĩtũmĩte nguo ciaku ihaane ta cia mũndũ ũrĩ kĩhihĩro-inĩ kĩa ndibei?+
3 “Nginyangĩte thabibũ kĩhihĩro-inĩ kĩa ndibei ndĩ wiki.
Gũtirĩ mũndũ kuuma harĩ ikundi cia andũ ũrarĩ hamwe na niĩ.
Ndĩramakinyangaga ndĩ na marakara,
Na ndĩraikara o ngĩmakinyangaga na mangʼũrĩ.+
Nguo ciakwa iraminjũkĩrũo nĩ thakame yao,
Na nguo ciakwa ciothe irĩ na marooro.
4 Nĩ gũkorũo mũthenya wa kũrĩhanĩria ũrĩ ngoro-inĩ yakwa,+
Naguo mwaka wa andũ akwa arĩa akũũre nĩ mũkinyu.
5 Ndĩrarorire, ĩndĩ gũtirarĩ na mũndũ wa kũndeithia;
Ndĩramaka tondũ gũtirĩ mũndũ ũrerutĩire kũndeithia.
6 Ndĩrarangĩrĩirie ikundi cia andũ na marakara makwa,
Ndĩratũma marĩĩo nĩ marakara makwa+
Na ndĩraita thakame yao thĩ.”
7 Nĩ ngũgweta ciĩko cia Jehova cia wendo mwĩhokeku,
Ciĩko cia kũgoocwo cia Jehova,
Nĩ ũndũ wa maũndũ mothe marĩa Jehova atwĩkĩire,+
Maũndũ mothe mega marĩa ekĩire nyũmba ya Isiraeli,
Kũringana na tha ciake na wendo wake mũnene na mwĩhokeku.
8 Nĩ gũkorũo ooigire atĩrĩ: “Aya nĩ andũ akwa, ariũ matakaaga wĩhokeku.”*+
Nĩ ũndũ ũcio agĩtuĩka Mũhonokia wao.+
9 Hĩndĩ ya mĩtangĩko yao yothe nĩ aatangĩkaga.+
Nake mũtũmwo wake we mwene* akĩmahonokia.+
Akĩmakũũra nĩ ũndũ wa wendo na tha ciake,+
Na akĩmoya na igũrũ na akĩmakuua matukũ-inĩ mothe ma tene.+
10 No magĩtuĩka aremi+ na makĩiguithia roho wake mũtheru ũũru.+
11 Na makĩririkana matukũ ma tene,
Matukũ ma Musa ndungata yake makĩũria atĩrĩ:
“Arĩ kũ Ũrĩa wamagereirie iria-inĩ+ na arĩithi a rũũru rwake?+
Arĩ kũ Ũrĩa wamũheire roho Wake mũtheru,+
12 Ũrĩa warekire guoko Gwake kũrĩ riri gũthiĩ hamwe na guoko kwa ũrĩo kwa Musa,+
Ũrĩa wagayanirie maĩ mbere yao+
Nĩguo egĩĩre na rĩĩtwa rĩa gũtũũra tene na tene,+
13 Ũrĩa watũmire matuĩkanĩrie maĩ-inĩ mariku,
Nĩgetha mathiĩ matekũhĩngĩka,
O ta mbarathi ĩrĩ bũrũri mwaraganu?*
14 O ta ũrĩa mahiũ mahurũkaga maikũrũka mũkuru-inĩ mwaraganu,
Roho wa Jehova nĩ watũmire magĩe na ũhurũko.”+
15 Rora ũrĩ kũu igũrũ wĩyonere
Ũrĩ kũu gwaku gũtũũgĩrĩte kũrĩ na ũtheru na riri.*
Nĩ igirĩrĩirio gũkinya harĩ niĩ.
16 Nĩ gũkorũo wee nĩwe Ithe witũ;+
O na gũtuĩka Iburahimu no akorũo atatũĩ,
Na Isiraeli no age gũtũmenya,
Wee Jehova, nĩwe Ithe witũ.
Rĩĩtwa rĩaku nĩ Mũkũũri witũ wa kuuma o tene.+
17 Wee Jehova-rĩ, wĩtĩkagĩra* tũũre njĩra-inĩ ciaku nĩkĩ?
Wĩtĩkagĩria* tũũmie ngoro citũ nĩkĩ, nginya tũkaga gũgwĩtigĩra?+
Coka nĩ ũndũ wa ndungata ciaku,
O acio mĩhĩrĩga ya igai rĩaku.+
18 Andũ aku arĩa athuure nĩ meegwatĩire kũndũ kũu ihinda inyinyi.
Thũ citũ nĩ irangĩrĩirie handũ haku harĩa hatheru.+
19 Ihinda iraya mũno tũhaanĩte ta andũ matarĩ maathwo nĩwe,
O ta andũ matarĩ metanio na rĩĩtwa rĩaku.