Ũhoro Mwega Ũrĩa Waandĩkirũo nĩ Luka
17 Agĩcoka akĩra arutwo ake atĩrĩ: “Gũka kwa maũndũ marĩa matũmaga andũ mahĩngĩke gũtingĩĩthemeka. Ĩndĩ kaĩ ũrĩa ũmarehaga arĩ na haaro-ĩ! 2 Nĩ kaba mũndũ ũcio angĩohererũo ihiga rĩa gĩthĩi ngingo aikio thĩinĩ wa iria handũ ha ahĩngithie ũmwe wa aya matariĩ ta twana.+ 3 Mwĩmenyagĩrĩrei. Mũrũ wa Ithe wanyu angĩhia, mũkaanie,+ na angĩĩrira, muohere.+ 4 O na angĩkwĩhĩria maita mũgwanja mũthenya ũmwe na oke kũrĩ wee maita mũgwanja, agĩkwĩraga, ‘nĩ ndahera,’ no mũhaka ũmuohere.”+
5 Na rĩrĩ, atũmwo makĩra Mwathani atĩrĩ: “Tuongerere wĩtĩkio.”+ 6 Nake Mwathani akĩmeera: “Mũngĩrĩ na wĩtĩkio ũigana mbegũ ya karatarĩ-rĩ,* no mwĩre mũtĩ ũyũ wa ndare, ‘Munyũka uume haha ũkehande iria-inĩ!’ naguo no ũmwathĩkĩre.+
7 “Nũũ gatagatĩ-inĩ kanyu ũrĩ na ngombo ĩrarĩma na mũraũ kana ĩrarĩithia ũngĩmĩra ũũ yoima mũgũnda, ‘Ũka haha o rĩu na ũikare metha-inĩ ũrĩe’? 8 Handũ ha ũguo-rĩ, na githĩ ndangĩmĩra, ‘Haarĩria irio ciakwa cia hwaĩ-inĩ, na wĩhotore ũndungatĩre nginya ndĩkie kũrĩa na kũnyua, na thutha ũcio no ũrĩe na ũnyue’? 9 Ndangĩcokeria ngombo ĩyo ngatho nĩ ũndũ wa gwĩka ũrĩa ĩgwathĩtwo, kana tiguo? 10 O ũndũ ũmwe na ũcio, thutha wa kũhingia maũndũ mothe marĩa mwathĩtwo, ugagai: ‘Ithuĩ tũrĩ ngombo itarĩ kĩene. Tweka o ũrĩa tũkwagĩrĩirũo nĩ gwĩka.’”+
11 Rĩrĩa aathiaga Jerusalemu, nĩ aatuĩkanĩirie Samaria na Galili. 12 Na rĩrĩa aaingĩraga gĩcagi kĩmwe, arũme ikũmi maarĩ na mangũ makĩmuona, no makĩrũgama haraya.+ 13 Makĩanĩrĩra na mũgambo mũnene makiuga: “Jesu, Mũrutani, tũiguĩre tha!” 14 Nake amona, akĩmeera atĩrĩ: “Thiĩi mũkeyonanie kũrĩ athĩnjĩri-Ngai.”+ Na marĩ njĩra-inĩ magĩthiĩ, magĩtherio.+ 15 Rĩrĩa ũmwe wao oonire atĩ nĩ ahonio, akĩhũndũka akĩgoocaga Ngai na mũgambo mũnene. 16 Akĩĩgũithia thĩ agĩturumithia ũthiũ wake magũrũ-inĩ ma Jesu, akĩmũcokagĩria ngatho. Makĩria ma ũguo, aarĩ Mũsamaria.+ 17 Nake Jesu akiuga: “Andũ othe ikũmi nĩ maatherio, kana tiguo? Hakĩrĩ ũguo-rĩ, acio angĩ kenda makĩrĩ kũ? 18 Hatirĩ ũngĩ wacoka kũgooca Ngai tiga o mũndũ ũyũ wa rũrĩrĩ rũngĩ?” 19 Agĩcoka akĩmwĩra atĩrĩ: “Ũkĩra wĩthiĩre; wĩtĩkio waku nĩ watũma ũhone.”+
20 Afarisai maamũria rĩrĩa Ũthamaki wa Ngai ũngĩgooka,+ aamacokeirie akĩmeera: “Ũthamaki wa Ngai ndũroka na njĩra ĩyumĩrĩtie; 21 o na andũ matikoiga, ‘Rora haha!’ kana, ‘Rora harĩa!’ Nĩ gũkorũo Ũthamaki wa Ngai ũrĩ gatagatĩ-inĩ kanyu.”+
22 Agĩcoka akĩra arutwo acio atĩrĩ: “Matukũ nĩ marĩũka rĩrĩa mũkeerirĩria kuona ũmwe wa mĩthenya ya Mũrũ wa mũndũ, ĩndĩ mũtikawona. 23 Na andũ nĩ makaamwĩra, ‘Rorai harĩa!’ kana, ‘Rorai haha!’ Mũtikanoime nja kana mũmarũmĩrĩre.+ 24 Nĩ gũkorũo o ta ũrĩa rũheni rũhenũkaga kuuma mwena ũmwe wa igũrũ nginya ũrĩa ũngĩ, noguo Mũrũ wa mũndũ+ agaakorũo hĩndĩ ya mũthenya wake.+ 25 O na kũrĩ ũguo, no mũhaka ambe acemanie na mĩnyamaro mĩingĩ na aregwo nĩ rũciaro rũrũ.+ 26 Ningĩ, o ta ũrĩa gwekĩkire matukũ-inĩ ma Nuhu,+ noguo gũgeekĩka matukũ-inĩ ma Mũrũ wa mũndũ:+ 27 maarĩaga, makanyua, makahikania, makahika nginya mũthenya ũrĩa Nuhu aaingĩrire thabina,+ naguo Mũiyũro ũgĩũka na ũkĩmaniina othe.+ 28 Ningĩ o ta ũrĩa gwekĩkire matukũ-inĩ ma Loti:+ maarĩaga, makanyua, makagũra, makendia, makahanda na magaka. 29 No mũthenya ũrĩa Loti ooimire Sodomu, gũkiura mwaki na ũbiriti kuuma igũrũ ũkĩmaniina othe.+ 30 Ũguo noguo gũgaakorũo mũthenya ũrĩa Mũrũ wa mũndũ akaaguũrio.+
31 “Mũthenya ũcio-rĩ, mũndũ ũrĩa ũgaakorũo nyũmba igũrũ no indo ciake ikorũo nyũmba thĩinĩ, ndakanaikũrũke gũcioya, nake ũrĩa ũgaakorũo mũgũnda ndakanacoke kũrĩ indo iria irĩ thutha. 32 Ririkanai mũtumia wa Loti.+ 33 Mũndũ o wothe ũgeragia kũhonokia muoyo* wake nĩ akoorũo nĩguo, nake mũndũ o wothe ũkũrũo nĩguo nĩ akaaũtũũria.+ 34 Ngũmwĩra atĩrĩ, ũtukũ ũcio andũ erĩ nĩ magaakorũo ũrĩrĩ ũmwe; ũmwe wao oywo, no ũcio ũngĩ nĩ agaatigwo.+ 35 Atumia erĩ nĩ magaakorũo magĩthĩa gĩthĩi-inĩ kĩmwe; ũmwe wao oywo, no ũcio ũngĩ nĩ agaatigwo.” 36 *—— 37 Nao makĩmũũria ũũ: “Nĩ kũ kũu Mwathani?” Akĩmacokeria: “Harĩa mwĩrĩ ũrĩ, hau nĩho nderi ikaagomana.”+