Isaia
58 “Atĩrĩrĩ, anĩrĩra biũ ũhingũrĩte mũmero wothe; ndũkegirĩrĩrie!
Anĩrĩra na mũgambo mũnene o ta wa coro.
Ĩra andũ akwa ũhoro wa ũremi wao,+
Wĩre nyũmba ya Jakubu ũhoro wa mehia mao.
2 Manjethaga mũthenya o mũthenya,
Na makoneka makĩenda kũmenya njĩra ciakwa,
Ta marĩ rũrĩrĩ rwĩkaga maũndũ ma ũthingu
Na rũtatiganĩirie kĩhooto kĩa Ngai wao.+
Manjĩraga ndĩmatuĩre matuĩro ma ũthingu,
Ta marakenera gũkuhĩrĩria Ngai:+
3 ‘Nĩ kĩĩ gĩtũmaga wage kuona rĩrĩa twĩhingĩte kũrĩa?+
Na nĩ kĩĩ gĩtũmaga wage kuona rĩrĩa tweima?’+
Nĩ tondũ mũthenya ũrĩa mwĩhingĩte, mũkoragwo mũgĩthingata maũndũ manyu* ene,
Na mũkahinyĩrĩria arĩa mamũrutagĩra wĩra.+
4 Kwĩhinga kwanyu kũrĩkagĩrĩria na ngũĩ na haaro,
Na mũkagũthana ngundi njũru mũno.
Mũtingĩĩhinga ũrĩa mwĩhingaga ũmũthĩ na mũgambo wanyu ũiguo kũrĩa igũrũ.
5 Hihi kwĩhinga ta kũu nĩkuo thuuraga,
Mũndũ kũhũthĩra mũthenya tu nĩguo eime,
Akainamia mũtwe wake o ta rũnyeki rũraihu,
Na akaara ũrĩrĩ wake nguo-inĩ cia makũnia na mũhu?
Hihi kũu nĩkuo mũreta kwĩhinga na mũkoiga nĩ mũthenya wa gũkenia Jehova?
6 Aca, kwĩhinga kũrĩa thuurĩte nĩ gũkũ:
Kweheria bĩngũ cia waganu,
Kuohora tũmĩkwa twa icoki,+
Kũrekereria arĩa mahinyĩrĩirio,+
Na kuunanga na gatagatĩ macoki mothe;
7 Kũgayana mũgate waku na ũrĩa mũhũtu,+
Na kũrehe ũrĩa mũthĩni na ũrĩa ũtarĩ gwa gũikara gwaku mũciĩ,
Kũhumba mũndũ ũtarĩ nguo wamuona,+
Na kwaga kũhũgũkĩra mũndũ wanyu.
8 Hĩndĩ ĩyo ũtheri waku ũngĩara o ta rũcinĩ,+
Nakuo kũhonio gwaku gũũke o na ihenya.
Ũthingu waku ũthiage ũrĩ mbere yaku,
Naguo riri wa Jehova ũgakoragwo ũkuumĩte thutha ũkũgitĩire.+
9 Hĩndĩ ĩyo nĩ ũgeetana, na Jehova nĩ agaagũcokeria;
Nĩ ũgaakaya ũkĩenda ũteithio, nake akoiga ũũ, ‘Ndĩ haha!’
Ũngĩeheria icoki gatagatĩ-inĩ gaku
Na ũtige kuorotana na kwaria ndeto cia rũmena,+
10 Ũngĩhe ũrĩa mũhũtu kĩrĩa wee wĩriragĩria,+
Nao arĩa ahinyĩrĩrie ũmahingĩrie mabataro mao,
Hĩndĩ ĩyo ũtheri waku ũngĩara nginya nduma-inĩ,
Nayo nduma yaku ĩtuĩke o ta mũthenya gatagatĩ.+
11 Jehova nĩ arĩgũtongoragia hingo ciothe
Na agakũhingĩria mabataro maku nginya rĩrĩa ũrĩ bũrũri-inĩ mũngʼaru;+
Nĩ arĩkĩraga mahĩndĩ maku hinya,
Nawe ũkahaana ta mũgũnda ũrĩ na maĩ maingĩ,+
O ta itherũkĩro rĩtahũaga maĩ.
12 Nĩ ũndũ waku, kũrĩa kwaanangĩtwo o tene nĩ gũgaakwo rĩngĩ,+
Na nĩ ũgaacokia mĩthingi ya njiarũa iria ihĩtũkĩte.+
Nĩ ũgeetwo mũthondeki wa thingo iria njatũkangu,*+
Mũthondeki rĩngĩ wa barabara cia kũndũ gwa gũikarũo.
13 Angĩkorũo tondũ wa Thabatũ nĩ ũgwĩthema* gũthingataga maũndũ maku mwene mũthenya wakwa ũrĩa mwamũre+
Na ũtue Thabatũ gĩkeno gĩaku kĩrĩa kĩnene, mũthenya mwamũre wa Jehova, mũthenya wa gũtũũgĩrio,+
Na ũmĩtũũgĩrie handũ ha gũthingataga maũndũ maku mwene na kwaria ciugo cia tũhũ,
14 Hĩndĩ ĩyo nĩ ũkaagĩaga na gĩkeno kĩnene nĩ ũndũ wa Jehova,
Na nĩ ngaatũmaga ũtooranie kũndũ kũrĩa kũrĩ igũrũ mũno thĩinĩ wa thĩ.+