Ũhoro Mwega Ũrĩa Waandĩkirũo nĩ Johana
10 “Ngũmwĩra atĩrĩ o ma o ma, mũndũ o wothe ũtonyaga kiugũ kĩa ngʼondu atagereire mũrango-inĩ no akahaica agatonyera handũ hangĩ, ũcio nĩ mũici na nĩ mũtunyani.+ 2 No ũrĩa ũtonyagĩra mũrango-inĩ nĩwe mũrĩithi wa ngʼondu.+ 3 Ũcio nĩ ahingũragĩrũo nĩ mũikaria wa mũrango,+ nacio ngʼondu nĩ ithikagĩrĩria mũgambo wake.+ Etaga ngʼondu ciake na marĩĩtwa agaciruta nja. 4 Rĩrĩa arĩkia gũciruta ciothe nja, athiaga mbere yacio, nacio ikamũrũmĩrĩra tondũ nĩ ciũĩ mũgambo wake. 5 Gũtirĩ hĩndĩ ingĩrũmĩrĩra mũgeni no nĩ kũmũũrĩra ingĩmũũrĩra, tondũ itiũĩ mũgambo wa ageni.” 6 Jesu aamaheire ngerekano ĩyo, no matiataũkĩirũo nĩ ũrĩa aameeraga.
7 Nĩ ũndũ ũcio Jesu akiuga o rĩngĩ: “Ngũmwĩra atĩrĩ o ma o ma, niĩ nĩ niĩ mũrango wa ngʼondu.+ 8 Arĩa othe mokĩte magĩĩtuaga atĩ nĩo niĩ nĩ aici na atunyani; no ngʼondu itimathikagĩrĩria. 9 Niĩ nĩ niĩ mũrango; mũndũ o wothe ũtonyagĩra harĩ niĩ nĩ akaahonokio, ũcio arĩtonyaga na akoima na akona gĩa kũrĩa.+ 10 Mũici okaga o kũiya, kũũraga na kwananga.+ Niĩ njũkĩte nĩguo ngʼondu igĩe na muoyo, na igĩe naguo kwa ũingĩ. 11 Niĩ nĩ niĩ mũrĩithi ũrĩa mwega;+ mũrĩithi ũrĩa mwega nĩ arutaga muoyo* wake nĩ ũndũ wa ngʼondu.+ 12 Mũndũ wa kũheo mũcara, na ti mũrĩithi, na tiwe mwene ngʼondu, onaga njũi ĩgĩũka agatiganĩria ngʼondu akora—nayo njũi ĩgacitharĩkĩra na ĩgacihurunja— 13 nĩ gũkorũo we nĩ wa kũheo mũcara na ndarũmbũyagia ngʼondu. 14 Niĩ nĩ niĩ mũrĩithi ũrĩa mwega. Nĩ njũĩ ngʼondu ciakwa nacio ngʼondu ciakwa nĩ cinjũĩ,+ 15 o ta ũrĩa Awa anjũĩ na niĩ nĩ njũĩ Awa;+ na nĩ ngũruta muoyo* wakwa nĩ ũndũ wa ngʼondu.+
16 “Na ndĩ na ngʼondu ingĩ, itarĩ cia kiugũ gĩkĩ;+ icio nacio no mũhaka ndĩcirehe, na nĩ igaathikagĩrĩria mũgambo wakwa, nacio nĩ igaatuĩka rũũru rũmwe, na ikorũo na mũrĩithi ũmwe.+ 17 Awa anyendete+ tondũ nĩ ngũruta muoyo* wakwa+ nĩguo njoke ngĩe naguo rĩngĩ. 18 Gũtirĩ mũndũ ũngĩndunya muoyo wakwa, no ndĩraũruta ndĩyendeire. Ndĩ na kĩhooto gĩa kũũruta, na ndĩ na kĩhooto gĩa kũgĩa naguo rĩngĩ.+ Rĩathani rĩu ndaheirũo nĩ Awa.”
19 Gũkĩgĩa na ngayũkano o rĩngĩ gatagatĩ-inĩ ka Ayahudi+ nĩ ũndũ wa ciugo icio. 20 Aingĩ ao mooigaga: “Arĩ na ndaimono na nĩ agũrũkĩte. Mũramũthikĩrĩria nĩkĩ?” 21 Angĩ nao makiuga: “Icio ti ciugo cia mũndũ ũrĩ na ndaimono. Kaĩ ndaimono ĩngĩhota kũhingũra maitho ma atumumu?”
22 Hĩndĩ ĩyo gũgĩkorũo na Gĩathĩ gĩa Kwamũrũo thĩinĩ wa Jerusalemu. Kwarĩ hĩndĩ ya heho, 23 na Jesu nĩ gũthianga aathiangaga kũu thĩinĩ wa hekarũ gĩthaku-inĩ gĩa Suleimani.+ 24 Nao Ayahudi makĩmũthiũrũrũkĩria na makĩambĩrĩria kũmwĩra atĩrĩ: “Ũgũtũiga nduma-inĩ nginya rĩ? Akorũo wee nĩwe Kristo-rĩ, tũhe ũhoro cara-rũkũ.” 25 Nake Jesu akĩmacokeria: “Nĩ ndĩmwĩrĩte, no mũtiretĩkia. Maũndũ marĩa njĩkaga na rĩĩtwa rĩa Awa, nĩ marutaga ũira igũrũ rĩakwa.+ 26 No mwagaga gwĩtĩkia tondũ inyuĩ mũtirĩ ngʼondu ciakwa.+ 27 Ngʼondu ciakwa ithikagĩrĩria mũgambo wakwa, na nĩ ndĩciũĩ, nacio nĩ cinũmagĩrĩra.+ 28 Nĩ ndĩciheaga muoyo wa tene na tene,+ na gũtirĩ hĩndĩ ikaaniinwo o rĩ o rĩ, na gũtirĩ mũndũ ũgaacihuria kuuma guoko-inĩ gwakwa.+ 29 Arĩa heetwo nĩ Awa nĩ a bata gũkĩra kĩndũ kĩngĩ o gĩothe, na gũtirĩ mũndũ ũngĩmahuria kuuma guoko-inĩ kwa Awa.+ 30 Niĩ na Awa tũrĩ kĩndũ kĩmwe.”*+
31 Ayahudi makĩoya mahiga o rĩngĩ nĩguo mamũhũũre namo. 32 Nake Jesu akĩmeera atĩrĩ: “Nĩ ndĩmuonetie maũndũ maingĩ mega kuuma kũrĩ Awa. Nĩ ũndũ ũrĩkũ wamo ũratũma mũũhũũre na mahiga?” 33 Ayahudi nao makĩmũcokeria: “Tũtirakũhũũra na mahiga tondũ wa ũndũ mwega, no nĩ tondũ wa kũruma Ngai;+ nĩ gũkorũo o na gũtuĩka ũrĩ mũndũ, nĩ ũretua ngai.” 34 Jesu akĩmeera: “Na githĩ thĩinĩ wa Watho wanyu gũtiandĩkĩtwo ũũ, ‘Niĩ njugĩte atĩrĩ: “Inyuĩ mũrĩ ngai”’?*+ 35 Angĩkorũo arĩa maamenereirio nĩ kiugo kĩa Ngai aameetire ‘ngai-rĩ,’+—na rĩandĩko rĩu rĩtingĩgarũrũo— 36 nĩ kĩĩ kĩragĩtũma mũnjĩre o niĩ Awa aatheririe na akĩndũma gũkũ thĩ atĩ, ‘Nĩ waruma Ngai,’ tondũ atĩ nĩ ndoiga, ‘Ndĩ Mũrũ wa Ngai’?+ 37 Angĩkorũo maũndũ marĩa ndĩreka ti ma Awa, mũtikanjĩtĩkie. 38 No angĩkorũo nĩmo ndĩreka, o na mwaga kũnjĩtĩkia, ĩtĩkiai maũndũ macio,+ nĩguo mũmenye na mũthiĩ na mbere kũmenya atĩ Awa arĩ na ũiguano hamwe na niĩ na niĩ ndĩ na ũiguano hamwe na Awa.”+ 39 Nĩ ũndũ ũcio, makĩgeria o rĩngĩ kũmũnyita, no we akĩũra akĩmeherera.
40 Na akĩringa mũrĩmo ũrĩa ũngĩ wa Jorodani o rĩngĩ agĩthiĩ kũrĩa Johana aabatithanagĩria mbere,+ agĩikara kuo. 41 Na andũ aingĩ magĩthiĩ kũrĩ we na makĩambĩrĩria kuuga atĩrĩ: “Johana ndaaringire kĩama o na kĩmwe, no maũndũ marĩa mothe Johana ooigire megiĩ mũndũ ũyũ maarĩ ma ma.”+ 42 Na andũ aingĩ kũu makĩgĩa na wĩtĩkio harĩ we.