Kũguũrĩrio kwa Johana
5 Na guoko-inĩ kwa ũrĩo kwa Ũcio waikarĩire gĩtĩ kĩu kĩa ũnene+ ngĩona gĩkũnjo kĩandĩke mĩena yerĩ,* kĩhingĩtwo biũ na mĩhũũri mũgwanja. 2 Na ngĩona mũraika ũrĩ na hinya akĩanĩrĩra na mũgambo mũnene ũũ: “Nũũ mwagĩrĩru wa kũhingũra gĩkũnjo kĩu na kũrutania mĩhũũri yakĩo?” 3 No gũtirĩ mũndũ kũu igũrũ kana gũkũ thĩ o na kana rungu rwa thĩ ũngĩahotire kũhingũra gĩkũnjo kĩu kana gũkĩrora thĩinĩ. 4 Na niĩ ngĩrĩra mũno tondũ gũtionekire mũndũ mwagĩrĩru wa kũhingũra gĩkũnjo kĩu kana gũkĩrora thĩinĩ. 5 No ũmwe wa athuri acio akĩnjĩra atĩrĩ: “Tiga kũrĩra. Atĩrĩrĩ, Mũrũthi ũrĩa wa mũhĩrĩga wa Juda,+ ũcio mũri+ wa Daudi+ nĩ ahootanĩte,+ nĩguo ahingũre gĩkũnjo kĩu na mĩhũũri yakĩo mũgwanja.”
6 Na gatagatĩ ga gĩtĩ kĩu kĩa ũnene na ciũmbe iria inya irĩ muoyo na gatagatĩ ka athuri acio+ ngĩona gatũrũme+ koonekaga ta karĩ gathĩnje,+ karĩ na hĩa mũgwanja na maitho mũgwanja, na maitho macio marũgamĩrĩire maroho marĩa mũgwanja ma Ngai+ marĩa matũmĩtwo thĩinĩ wa thĩ yothe. 7 Nake akiumĩra o rĩmwe na agĩthiĩ agĩkĩoya kuuma guoko-inĩ kwa ũrĩo kwa Ũcio waikarĩire gĩtĩ kĩa ũnene.+ 8 Na rĩrĩa ooire gĩkũnjo kĩu, ciũmbe iria inya irĩ muoyo na athuri acio 24+ makĩĩgũithia thĩ mbere ya Gatũrũme, na o ũmwe wao aarĩ na kĩnanda kĩa mũgeeto na mbakũri cia thahabu ciyũrĩte ũbumba. (Ũbumba ũcio ũrũgamĩrĩire mahoya ma andũ arĩa aamũre.)+ 9 Na nĩ kũina maainaga rwĩmbo rwerũ,+ makoiga atĩrĩ: “Nĩ wagĩrĩire kuoya gĩkũnjo kĩu na ũhingũre mĩhũũri yakĩo, nĩ gũkorũo wee nĩ wathĩnjirũo na kũgerera thakame yaku ũkĩgũrĩra Ngai andũ+ kuuma mĩhĩrĩga-inĩ yothe na thiomi na ikundi cia andũ na ndũrĩrĩ,+ 10 na ũkĩmatua ũthamaki+ na athĩnjĩri-Ngai matungatagĩre Ngai witũ,+ na nĩo a gwathana marĩ athamaki+ igũrũ rĩa thĩ.”
11 Ngĩcoka ngĩona, na ngĩigua mũgambo wa araika aingĩ mathiũrũrũkĩirie gĩtĩ kĩu kĩa ũnene na ciũmbe iria irĩ muoyo na athuri acio, naguo mũigana wao warĩ ngiri makũmi maingĩ maita ngiri makũmi maingĩ na ngiri nyingĩ maita ngiri nyingĩ,+ 12 na maanagĩrĩra na mũgambo mũnene makoiga: “Gatũrũme o ũcio wathĩnjirũo+ nĩ agĩrĩire kwamũkĩra hinya na ũtonga na ũũgĩ na ũhoti na gĩtĩo na riri na kĩrathimo.”+
13 Na ngĩigua ciũmbe ciothe igũrũ na thĩinĩ wa thĩ+ na rungu rwa thĩ na thĩinĩ wa iria, na indo ciothe iria irĩ thĩinĩ wacio, ikiuga: “Ũrĩa ũikarĩire gĩtĩ kĩa ũnene+ o na Gatũrũme+ marogĩa na kĩrathimo na gĩtĩo+ na riri na ũhoti tene na tene.”+ 14 Ciũmbe icio inya irĩ muoyo cioigaga: “Ameni!” nao athuri acio makĩĩgũithia thĩ na magĩthathaiya.