Ũhoro Mwega Ũrĩa Waandĩkirũo nĩ Mariko
3 Jesu akĩingĩra thĩinĩ wa thunagogi o rĩngĩ, na kũu nĩ kwarĩ mũndũ warĩ muonju guoko.*+ 2 Nao nĩ maamũroraga mũno mone kana nĩ ekũhonia mũndũ ũcio mũthenya wa Thabatũ, nĩguo mone ũndũ wa kũmũthitangĩra. 3 Akĩra mũndũ ũcio warĩ muonju guoko* atĩrĩ: “Rũgama na ũũke haha gatagatĩ.” 4 Agĩcoka akĩmoria atĩrĩ: “Nĩ ũndũ ũrĩkũ mwĩtĩkĩrĩku mũthenya wa Thabatũ, nĩ gwĩka wega-ĩ kana nĩ gwĩka ũũru, nĩ kũhonokia muoyo-ĩ kana nĩ kũũraga?”+ No magĩkira. 5 Thutha wa kũmarora arakarĩte na aiguĩte ũũru mũno nĩ ũndũ wa ũrĩa moomĩtie ngoro,+ akĩra mũndũ ũcio ũũ: “Tambũrũkia guoko gwaku.” Nake agĩgũtambũrũkia, nakuo gũkĩhona. 6 Afarisai mona ũguo makiuma nja na o hĩndĩ ĩyo makĩambĩrĩria kũbanga njama ya kũmũũkĩrĩra marĩ na arũmĩrĩri a kĩama kĩa Herode,+ nĩguo mamũũrage.
7 No Jesu agĩthiĩ iria-inĩ marĩ na arutwo ake, na kĩrĩndĩ kĩnene mũno kuuma Galili na kuuma Judea gĩkĩmũrũmĩrĩra.+ 8 O na kuuma Jerusalemu, na Idumea, na mũrĩmo wa Jorodani, na kuuma Turo na Sidoni, kĩrĩndĩ kĩnene gĩgĩthiĩ kũrĩ we rĩrĩa kĩaiguire maũndũ maingĩ marĩa eekaga. 9 Nake akĩra arutwo ake mamũhaarĩrĩrie gatarũ kanini nĩguo kĩrĩndĩ gĩtikae kũmũhatĩka. 10 Tondũ nĩ aahonirie andũ aingĩ, arĩa othe maarĩ na mĩrimũ mĩũru nĩ maahatĩkanagĩra harĩ we nĩguo mamũhutie.+ 11 Nginya maroho moru+ maamuonaga makamũinamĩrĩra makĩanagĩrĩra ũũ: “Wee nĩwe Mũrũ wa Ngai.”+ 12 No nĩ aamaheaga mũkaana mũrũmu maita maingĩ matikamũmenyithanie kũrĩ andũ.+
13 Agĩcoka akĩambata kĩrĩma-inĩ na agĩta arĩa eendaga,+ nao magĩthiĩ harĩ we.+ 14 Na agĩthondeka* gĩkundi kĩa andũ 12 arĩa ningĩ eetire atũmwo, na nĩo maarĩ matwaranage nake na amatũmage makahunjie, 15 na magĩe na wathani wa kũingata ndaimono.+
16 Nao arĩa maarĩ gĩkundi-inĩ kĩu aathondekire* kĩa andũ 12+ maarĩ Simoni, ũrĩa ningĩ aatuire Petero,+ 17 Jakubu mũrũ wa Zebedi, na Johana mũrũ wa nyina na Jakubu (arĩa ningĩ aatuire Boanerigesi, ũguo nĩ kuuga “Ariũ a Marurumĩ”),+ 18 Andrea, Filipu, Batholomayo, Mathayo, Toma, Jakubu mũrũ wa Alufayo, Thadayo, Simoni ũrĩa Mũkananayo,* 19 na Judasi Mũisikariota ũrĩa wacokire kũmũkunyanĩra.
Jesu agĩcoka agĩthiĩ agĩtonya nyũmba, 20 na kĩrĩndĩ gĩkĩũngana o rĩngĩ nginya makĩaga mweke wa kũrĩa irio. 21 No rĩrĩa andũ a famĩlĩ yao maaiguire maũndũ macio, magĩthiĩ kũmũnyita, nĩ gũkorũo mooigaga ũũ: “Nĩ agũrũkĩte.”+ 22 Ningĩ andĩki-watho arĩa mookire kuuma Jerusalemu mooigaga atĩrĩ: “Arĩ na Beelizebubu,* na aingataga ndaimono na hinya wa mũnene wa ndaimono.”+ 23 Nĩ ũndũ ũcio, akĩmeta harĩ we na akĩmaarĩria na njĩra ya ngerekano, akĩmoria: “Shaitani angĩingata Shaitani atĩa? 24 Ũthamaki ũngĩgayũkana, ndũngĩrũgama;+ 25 na nyũmba ĩngĩgayũkana, nyũmba ĩyo ndĩngĩrũgama. 26 Ningĩ angĩkorũo Shaitani nĩ areyũkĩrĩra we mwene na nĩ agayũkanĩte-rĩ, ndangĩrũgama, no nĩ gũthira egũthira. 27 Ũrĩa kũrĩ nĩ atĩ, gũtirĩ mũndũ ũingĩraga nyũmba ya mũndũ ũrĩ hinya na akahota kũiya indo ciake tiga ambire kũmuoha. Hĩndĩ ĩyo norĩo angĩhota gũtaha indo iria irĩ nyũmba yake. 28 Ngũmwĩra atĩrĩ na ma, andũ nĩ makooherũo maũndũ mothe, gũtekũmakania nĩ mehia marĩkũ manehia na irumi iria manarumana. 29 No mũndũ o wothe ũrumaga roho mũtheru gũtirĩ hĩndĩ akooherũo+ ĩndĩ mehia make megũtũũra tene na tene.”+ 30 Aameerire ũguo tondũ mooigaga atĩrĩ: “Arĩ na roho mũũru.”+
31 Na rĩrĩ, nyina hamwe na ariũ a nyina+ magĩũka na makĩrũgama hau nja, magĩtũma mũndũ atonye akamwĩte.+ 32 Na tondũ kĩrĩndĩ gĩaikarĩte thĩ kĩmũthiũrũrũkĩirie-rĩ, makĩmwĩra ũũ: “Atĩrĩrĩ, maitũguo na ariũ a maitũguo marĩ nja na nĩ maragwĩta.”+ 33 No akĩmoria atĩrĩ: “Maitũ na ariũ a maitũ nĩa?” 34 Agĩcoka akĩrora andũ arĩa maaikarĩte thĩ mamũthiũrũrũkĩirie akiuga ũũ: “Ta rora, aya nĩo maitũ na ariũ a maitũ!+ 35 Mũndũ o wothe wĩkaga wendi wa Ngai, ũcio nĩwe mũrũ wa maitũ na mwarĩ wa maitũ o na maitũ.”+