Athamaki wa Mbere

21 Thutha wa maũndũ macio, gũgĩkĩka ũndũ wakonainie na mũgũnda wa mĩthabibũ ũrĩa warĩ wa Nabothu Mũjezireeli; mũgũnda ũcio warĩ Jezireeli,+ ũrigainie na nyũmba* ya Ahabu mũthamaki wa Samaria. 2 Ahabu akĩra Nabothu atĩrĩ: “Nengera mũgũnda waku wa mĩthabibũ nĩgetha ndĩũtue mũgũnda wa kũhandaga nyeni, tondũ ũrĩ hakuhĩ na nyũmba yakwa. Na niĩ njoke ngũnengere mũgũnda ũngĩ wa mĩthabibũ mwega makĩria wa gũcenjania na ũcio. Kana ũngĩona arĩ wega, no ngũnengere mbeca ciganaine na thogora waguo.” 3 No Nabothu akĩra Ahabu ũũ: “Nĩ ũndũ ũtangĩtĩkĩrĩka maitho-inĩ ma Jehova harĩ niĩ gũkũnengera igai rĩa maithe maitũ ma tene.”+ 4 Nĩ ũndũ ũcio agĩthiĩ gwake mũciĩ, angʼathĩtie na arĩ na kĩeha nĩ ũndũ wa ũrĩa Nabothu Mũjezireeli aamũcokeirie rĩrĩa aamwĩrire atĩrĩ: “Ndigũkũnengera igai rĩa maithe maitũ ma tene.” Agĩcoka agĩkoma ũrĩrĩ-inĩ wake, na agĩikara ahũgũrĩte ũthiũ wake na kũngĩ, na akĩrega kũrĩa.

5 Mũtumia wake Jezebeli+ agĩtonya kũrĩ we akĩmũũria ũũ: “Nĩ kĩĩ gĩtũmĩte ũkorũo* na kĩeha ũguo nginya ũkarega kũrĩa?” 6 Ahabu akĩmũcokeria: “Nĩ tondũ njĩrire Nabothu Mũjezireeli atĩrĩ, ‘Nyenderia mũgũnda waku wa mĩthabibũ. Kana ũngĩona arĩ wega, ũreke ngũnengere mũgũnda ũngĩ wa mĩthabibũ wa gũcenjania na ũcio.’ Ĩndĩ oiga ũũ, ‘Ndigũkũnengera mũgũnda wakwa wa mĩthabibũ.’” 7 Mũtumia wake Jezebeli akĩmwĩra atĩrĩ: “Na githĩ tiwe ũrathana ũrĩ mũthamaki wa Isiraeli? Ũkĩra ũrĩe kĩndũ na ũreke ngoro yaku ĩcanjamũke. Nĩ ngũkũnengera mũgũnda wa mĩthabibũ wa Nabothu Mũjezireeli.”+ 8 Nĩ ũndũ ũcio Jezebeli akĩandĩka marũa na rĩĩtwa rĩa Ahabu na akĩmahũũra mũhũũri na mũhũũri wa Ahabu+ na agĩtũma marũa macio kũrĩ athuri*+ na andũ arĩa marĩ igweta arĩa maaikaraga itũũra rĩa Nabothu. 9 Ũũ nĩguo aandĩkire marũa-inĩ macio: “Anĩrĩrai atĩ andũ mehinge kũrĩa, na mwĩre Nabothu aikare thĩ mbere ya andũ. 10 Na mwĩre arũme erĩ matarĩ kĩene maikare thĩ mbere yake na marute ũira wa kũmũthitanga+ moige atĩrĩ, ‘Nĩ ũrumĩte Ngai o hamwe na mũthamaki!’+ Mũcoke mũmũrute nja mũmũhũũre na mahiga nginya akue.”+

11 Nĩ ũndũ ũcio arũme a itũũra rĩake, athuri* na andũ arĩa marĩ igweta arĩa maaikaraga itũũra-inĩ rĩake, magĩka o ta ũrĩa kwaandĩkĩtwo marũa-inĩ macio Jezebeli aamatũmĩire. 12 Makĩanĩrĩra atĩ andũ mehinge kũrĩa, na makĩra Nabothu aikare thĩ mbere ya andũ. 13 Nao arũme erĩ matarĩ kĩene makĩingĩra na magĩikara thĩ mbere yake na makĩambĩrĩria kũruta ũira wa gũthitanga Nabothu marĩ mbere ya andũ acio, makiuga atĩrĩ: “Nabothu nĩ arumĩte Ngai o hamwe na mũthamaki!”+ Thutha ũcio makĩmũruta nja ya itũũra makĩmũhũũra na mahiga nginya agĩkua.+ 14 Magĩcoka magĩtũma ndũmĩrĩri kũrĩ Jezebeli, makĩmwĩra ũũ: “Nabothu nĩ ahũũrũo na mahiga akua.”+

15 Rĩrĩa Jezebeli aaiguire atĩ Nabothu nĩ ahũũrũo na mahiga akua, o rĩo akĩra Ahabu: “Ũkĩra wĩgwatĩre mũgũnda wa mĩthabibũ wa Nabothu Mũjezireeli,+ ũrĩa araregire gũkwenderia, nĩ gũkorũo Nabothu ndarĩ muoyo. Nĩ mũkuũ.” 16 Rĩrĩa Ahabu aaiguire atĩ Nabothu nĩ akuĩte, o rĩo Ahabu agĩũkĩra nĩguo aikũrũke mũgũnda-inĩ wa mĩthabibũ wa Nabothu Mũjezireeli nĩgetha akawĩgwatĩre.

17 No kiugo kĩa Jehova gĩgĩkinyĩra Elija+ Mũtishibi, akĩrũo ũũ: 18 “Ũkĩra ũikũrũke ũgacemanie na Ahabu mũthamaki wa Isiraeli, ũrĩa ũrĩ Samaria.+ Arĩ mũgũnda-inĩ wa mĩthabibũ wa Nabothu, kũrĩa athiĩte nĩgetha akawĩgwatĩre. 19 Wagĩrĩirũo kũmwĩra atĩrĩ, ‘Ũũ nĩguo Jehova oigĩte: “Hihi nĩ kũũraga woraga mũndũ+ na wacoka woya indo ciake?”’+ Ũcoke ũmwĩre atĩrĩ, ‘Ũũ nĩguo Jehova oigĩte: “Harĩa ngui icũnĩire thakame ya Nabothu, noho ngui igaacũnĩra thakame yaku mwene.”’”+

20 Ahabu akĩra Elija ũũ: “Kwoguo nĩ wangora, wee thũ yakwa!”+ Nake akĩmũcokeria atĩrĩ: “Ĩĩ nĩ ndagũkora. ‘Tondũ nĩ wĩhotorete* gwĩka maũndũ moru maitho-inĩ ma Jehova,+ 21 nĩ ngũkũrehera mwanangĩko, na thutha waku haate biũ na niine mũndũrũme o wothe* wa Ahabu,+ nginya arĩa matarĩ na ũteithio na arĩa matarĩ hinya thĩinĩ wa Isiraeli.+ 22 Na ngaatũma nyũmba yaku ĩhaane o ta nyũmba ya Jeroboamu+ mũrũ wa Nebati na o ta nyũmba ya Baasha+ mũrũ wa Ahija, nĩ gũkorũo nĩ ũndakarĩtie na ũgatũma andũ a Isiraeli mehie.’ 23 Naho ha ũhoro wĩgiĩ Jezebeli, Jehova oigĩte ũũ: ‘Ngui ikaarĩĩra Jezebeli mũgũnda-inĩ wa itũũra rĩa Jezireeli.+ 24 Mũndũ o wothe wa Ahabu ũgaakuĩra itũũra-inĩ akaarĩo nĩ ngui, na mũndũ o wothe ũgaakuĩra werũ-inĩ, akaarĩo nĩ nyoni cia rĩera-inĩ.+ 25 Na rĩrĩ, gũtirĩ kwagĩa mũndũ ũngĩ ũhaana Ahabu,+ ũrĩa wehotorete biũ* gwĩka maũndũ moru maitho-inĩ ma Jehova, agĩcogerũo nĩ mũtumia wake Jezebeli.+ 26 Eekire maũndũ marĩa marĩ magigi biũ na njĩra ya kũrũmĩrĩra mĩhianano ĩrĩ magigi,* o ta ũrĩa Aamori othe meekaga, arĩa Jehova aaingatire mehere mbere ya Aisiraeli.’”+

27 Rĩrĩa Ahabu aaiguire ciugo icio, o rĩo agĩtembũra nguo ciake na akĩĩhumba nguo ya ikũnia; na akĩĩhinga kũrĩa na agĩikara akomete ehumbĩte nguo ya ikũnia na aathiaga ethikĩire. 28 Thutha ũcio kiugo kĩa Jehova gĩgĩkinyĩra Elija Mũtishibi akĩrũo ũũ: 29 “Hihi nĩ wonete ũrĩa Ahabu enyihĩtie nĩ ũndũ wakwa?+ Tondũ nĩ enyihĩtie mbere yakwa, ndikũrehe mwanangĩko ũcio matukũ-inĩ make. Ngaarehera nyũmba yake mwanangĩko ũcio matukũ-inĩ ma mũrũwe.”+