Maũndũ Marĩa Meekirũo nĩ Atũmwo
18 Thutha wa maũndũ macio, akiuma Athene agĩthiĩ Korintho. 2 Agĩkora Mũyahudi wetagwo Akila,+ ũrĩa waciarĩirũo Ponto, na aakoretwo athaamĩra kũu kuuma Italia marĩ na mũtumia wake Pirisila, tondũ Kilaudio nĩ aathanĩte atĩ Ayahudi othe moime Roma. Nĩ ũndũ ũcio agĩthiĩ kũrĩ o, 3 na tondũ aarutaga wĩra o ta wao, agĩikara kwao mũciĩ akĩrutithania wĩra nao,+ nĩ gũkorũo maarutaga wĩra wa gũthondeka hema. 4 Na nĩ aaheanaga mĩario* thabatũ ciothe+ thĩinĩ wa thunagogi+ na akaiguithia Ayahudi na Angiriki.
5 Na rĩrĩa Sila+ na Timotheo+ maaikũrũkire makiuma Makedonia, Paulo akĩambĩrĩria kũhunjia kiugo mũno, akahunjĩria Ayahudi akamonia atĩ Jesu nĩwe Kristo.+ 6 No thutha wa gũikara makĩmũkararagia na makĩmũrumaga, akĩribariba nguo ciake+ na akĩmeera atĩrĩ: “Thakame yanyu ĩrokorũo igũrũ rĩa mĩtwe yanyu.+ Niĩ ndikoorio.*+ Kuuma rĩu ngũthiĩ kũrĩ andũ a ndũrĩrĩ.”+ 7 Kwoguo akiuma kũu* agĩthiĩ nyũmba ya mũndũ wetagwo Titio Jusito, ũrĩa warĩ mũthathaiya wa Ngai, na nyũmba yake yarigainie na thunagogi. 8 No Kirisipo,+ ũrĩa warĩ mũrũgamĩrĩri wa thunagogi, agĩtĩkia Mwathani, marĩ hamwe na andũ othe a nyũmba yake. Na andũ aingĩ a Korintho arĩa maaiguire ũhoro ũrĩa mwega makĩambĩrĩria gwĩtĩkia na makĩbatithio. 9 Ningĩ kũrĩ ũtukũ Mwathani akĩra Paulo kũgerera kĩoneki atĩrĩ: “Ndũgetigĩre, no thiĩ na mbere kwaria na ndũgakire, 10 tondũ ndĩ hamwe nawe+ na gũtirĩ mũndũ ũgũgũtharĩkĩra akũgere ngero; nĩ gũkorũo ndĩ na andũ aingĩ thĩinĩ wa itũũra rĩrĩ.” 11 Kwoguo agĩikara kũu mwaka na mĩeri ĩtandatũ, akĩrutanaga kiugo kĩa Ngai gatagatĩ-inĩ kao.
12 Hĩndĩ ĩrĩa Galio aarĩ mũtongoria* wa Akaia, Ayahudi marĩ hamwe magĩũkĩrĩra Paulo na makĩmũtwara gĩtĩ-inĩ gĩa ciira, 13 makiugaga: “Mũndũ ũyũ araringĩrĩria andũ mathathaiye Ngai na njĩra ĩtetĩkĩrĩtio nĩ watho.” 14 No o hĩndĩ ĩrĩa Paulo aarĩ hakuhĩ kwaria, Galio akĩra Ayahudi atĩrĩ: “Korũo nĩ ũndũ mũũru ekĩte kana wĩki-naĩ, nĩ ingiuma na gĩtũmi gĩa kũmũthikĩrĩria itegũthethũka inyuĩ Ayahudi. 15 No angĩkorũo nĩ ngarari ciĩgiĩ ciugo, marĩĩtwa, na watho wanyu-rĩ,+ arĩrĩriai ũndũ ũcio arĩ inyuĩ. Ndikwenda gũtuithania maũndũ macio.” 16 Oiga ũguo, akĩmeera mehere gĩtĩ-inĩ gĩa ciira. 17 Nĩ ũndũ ũcio, marĩ othe makĩnyita Sosithene+ ũrĩa warĩ mũrũgamĩrĩri wa thunagogi, makĩambĩrĩria kũmũhũũra marĩ hau mbere ya gĩtĩ gĩa ciira. No Galio ndaatindanĩire na maũndũ macio o na hanini.
18 No rĩrĩ, thutha wa gũikara kũu matukũ mangĩ maingĩ, Paulo akiugĩra ariũ a Ithe witũ ũhoro, akĩingĩra meri agĩthiĩ Siria marĩ na Pirisila na Akila. Arĩ Kenkirea+ akĩenjwo njuĩrĩ yake ĩkĩnyiha, nĩ gũkorũo nĩ eehĩtĩte mwĩhĩtwa. 19 Magĩgĩkinya Efeso na akĩmatiga kuo; no we agĩtonya thunagogi-inĩ na akĩhũthĩra ihooto kũiguithia Ayahudi.+ 20 O na gũtuĩka nĩ maaikaraga makĩmũringagĩrĩria aikaikare kũu, ndeetĩkĩrire 21 no akĩmoigĩra ũhoro na akĩmeera: “Angĩkorũo nĩ wendi wa Jehova,* nĩ ngaacoka kũrĩ inyuĩ rĩngĩ.” Agĩcoka akĩingĩra meri akiuma Efeso 22 na agĩikũrũka agĩkinya Kaisarea. Akĩambata* agĩthiĩ kũgeithia kĩũngano agĩcoka agĩikũrũka Antiokia.+
23 Thutha wa gũikara kũu ihinda rĩigana ũna, agĩthiĩ kũndũ kũingĩ bũrũri-inĩ wa Galatia na Ferugia,+ agĩĩkagĩra arutwo othe hinya.+
24 Na rĩrĩ, Mũyahudi ũmwe wetagwo Apolo,+ ũrĩa waciarĩirũo Aleksandiria, agĩkinya Efeso; aarĩ mũndũ warĩ na kĩheo gĩa kwaria na nĩ ooĩ Maandĩko wega. 25 Mũndũ ũcio nĩ aarutĩtwo* njĩra ya Jehova,* na tondũ wa kũhĩahĩa nĩ ũndũ wa roho, nĩ aaragia na akarutana na kĩyo maũndũ megiĩ Jesu atekũhĩtia, no ooĩ ũhoro wa ũbatithio wa Johana tu. 26 Akĩambĩrĩria kwaria arĩ na ũcamba thĩinĩ wa thunagogi, na rĩrĩa Pirisila na Akila+ maamũiguire, magĩthiĩ nake na makĩmũtaarĩria njĩra ya Ngai na ũrũngĩrĩru makĩria. 27 Ningĩ tondũ nĩ eendaga kũringa athiĩ Akaia, ariũ a Ithe witũ makĩandĩkĩra arutwo a kũu makĩmeera mamwamũkĩre wega. Nĩ ũndũ ũcio, rĩrĩa aakinyire kuo, nĩ aateithirie mũno andũ arĩa maatuĩkĩte etĩkia nĩ ũndũ wa ũtugi mũnene wa Ngai; 28 nĩ gũkorũo nĩ akĩragĩrĩria biũ kuonania mũingĩ-inĩ atĩ Ayahudi nĩ maahĩtĩtie, akamonia kuuma Maandĩko-inĩ atĩ Jesu nĩwe Kristo.+