Marũa ma Mbere ma Johana

5 Mũndũ o wothe wĩtĩkĩtie atĩ Jesu nĩwe Kristo aciarĩtwo kuumana na Ngai,+ nake mũndũ o wothe wendete ũrĩa watũmire gũciarũo kũu gwĩkĩke nĩ endete ũrĩa ũciarĩtwo kuumana na ũcio. 2 Ũndũ ũyũ nĩguo ũtũmaga tũmenye atĩ nĩ twendete ciana cia Ngai,+ twakorũo twendete Ngai na tũkahingagia maathani make. 3 Nĩ gũkorũo kwenda Ngai nĩ atĩrĩ, tũrũmagĩrĩre maathani make;+ na maathani make ti mũrigo,+ 4 tondũ mũndũ o wothe ũciarĩtwo* kuumana na Ngai nĩ atooragia thĩ.+ Na ũyũ nĩguo ũhootani ũrĩa ũtooretie thĩ, wĩtĩkio witũ.+

5 Nũũ ũngĩhota gũtooria thĩ?+ Na githĩ ti mũndũ ũrĩa wĩtĩkĩtie atĩ Jesu nĩ Mũrũ wa Ngai?+ 6 Ũcio nĩwe wokire na njĩra ya maĩ na thakame, Jesu Kristo, no ti na maĩ matheri,+ ĩndĩ nĩ na maĩ na thakame.+ Na roho nĩ ũrutaga ũira,+ tondũ roho nĩguo ũhoro ũrĩa wa ma. 7 Nĩ gũkorũo kũrĩ indo ithatũ irutaga ũira: 8 roho,+ maĩ,+ na thakame;+ na icio ithatũ nĩ irĩ ũiguano.

9 Angĩkorũo nĩ twĩtĩkagĩra ũira wa andũ, ũira wa Ngai nĩ mũnene makĩria. Nĩ gũkorũo ũyũ nĩguo ũira ũrĩa Ngai arutaga, ũira ũrĩa arutĩte wĩgiĩ Mũrũ wake. 10 Mũndũ ũrĩa ũigaga wĩtĩkio wake harĩ Mũrũ wa Ngai, arĩ na ũira ũcio thĩinĩ wake. Mũndũ ũrĩa ũtarĩ wĩtĩkio harĩ Ngai amũtuĩte mũheenania,+ nĩ gũkorũo ndaigĩte wĩtĩkio wake harĩ ũira ũrĩa Ngai arutĩte wĩgiĩ Mũrũ wake. 11 Na ũira ũcio nĩ atĩ, Ngai nĩ aatũheire muoyo wa tene na tene,+ na muoyo ũcio ũrĩ thĩinĩ wa Mũrũ wake.+ 12 Ũrĩa ũrĩ na Mũriũ arĩ na muoyo ũcio; ũrĩa ũtarĩ na Mũrũ wa Ngai ndarĩ na muoyo ũcio.+

13 Ndĩramwandĩkĩra maũndũ maya nĩgetha mũmenye atĩ mũrĩ na muoyo wa tene na tene,+ inyuĩ arĩa mũigaga wĩtĩkio wanyu harĩ rĩĩtwa rĩa Mũrũ wa Ngai.+ 14 Na ũyũ nĩguo ũũma* ũrĩa tũkoragwo naguo harĩ we,+ atĩ tũngĩhoya ũndũ o na ũrĩkũ kũringana na wendi wake, nĩ atũiguaga.+ 15 Na angĩkorũo nĩ tũĩ atĩ nĩ atũiguaga ũhoro-inĩ o wothe twamũhoya-rĩ, nĩ tũĩ atĩ nĩ tũkũheo indo iria tũhoyaga, nĩ gũkorũo nĩ tũmũhoete.+

16 Mũndũ o wothe angĩona mũrũ wa Ithe agĩka rĩhia rĩtangĩrehe gĩkuũ, nĩ amũhoere, na Ngai nĩ ekũmũhe muoyo,+ acio nĩ arĩa matekaga rĩhia rĩrĩa rĩrehaga gĩkuũ. Nĩ kũrĩ rĩhia rĩrehaga gĩkuũ.+ Ti ũhoro wĩgiĩ rĩhia ta rĩu ndĩrera mũndũ ũcio amũhoere. 17 Maũndũ mothe matarĩ ma ũthingu nĩ mehia,+ no nĩ kũrĩ rĩhia rĩtarehaga gĩkuũ.

18 Nĩ tũĩ atĩ mũndũ o wothe ũciarĩtwo kuumana na Ngai ndamenyeraga kwĩhia, no ũrĩa ũciarĩtwo kuumana na Ngai* nĩ amũroraga, na ũrĩa mũũru ndangĩhota kũmũnyita.*+ 19 Nĩ tũĩ atĩ tuumanĩte na Ngai, no thĩ yothe ĩkoragwo rungu rwa hinya wa ũrĩa mũũru.+ 20 No nĩ tũĩ atĩ Mũrũ wa Ngai nĩ okĩte,+ na nĩ atũheete ũtaũku* nĩguo tũgĩe na ũmenyo wĩgiĩ Ũrĩa wa ma. Na tũrĩ na ũiguano na ũcio wa ma,+ kũgerera Mũrũ wake Jesu Kristo. Ũcio nĩwe Ngai ũrĩa wa ma na muoyo wa tene na tene.+ 21 Twana tũtũ, mwĩthemagei mĩhianano.+