Marũa Kũrĩ Filemona
1 Nĩ niĩ Paulo, o niĩ njohetwo+ nĩ ũndũ wa Kristo Jesu, na Timotheo+ mũrũ wa Ithe witũ, kũrĩ Filemona ũrĩa twendete na mũrutithania wĩra hamwe na ithuĩ, 2 na kũrĩ mwarĩ wa Ithe witũ Apufia, na kũrĩ Arikipo+ ũrĩa mũthigari hamwe na ithuĩ, na kũrĩ kĩũngano kĩrĩa gĩcemanagia gwaku mũciĩ:+
3 Mũrogĩa na ũtugi mũnene na thayũ kuuma kũrĩ Ngai Ithe witũ, na Mwathani Jesu Kristo.
4 Nĩ njokagĩria Ngai wakwa ngatho hingo ciothe rĩrĩa ngũkũgweta mahoya-inĩ makwa,+ 5 tondũ nĩ njiguaga kaingĩ ũhoro wa wĩtĩkio waku na wendo ũrĩa ũkoragwo naguo harĩ* Mwathani Jesu na harĩ* arĩa aamũre othe. 6 Ndĩrahoya atĩ wĩtĩkio ũcio ũnyitanagĩra hamwe na andũ angĩ ũtũme ũtaũkĩrũo nĩ maũndũ mothe mega marĩa tũkoragwo namo kũgerera Kristo. 7 Nĩ gũkorũo, nĩ ndakenire na ngĩũmĩrĩrio mũno ndaigua ũhoro wa wendo waku, tondũ ngoro cia* arĩa aamũre nĩ icanjamũrĩtwo kũgerera harĩ wee, mũrũ wa Ithe witũ.
8 Nĩ ũndũ wa gĩtũmi kĩu, o na gũtuĩka ndĩ na wĩyathi mũnene wa kwaria ũhoro-inĩ wĩgiĩ Kristo wa gũgwatha wĩke ũndũ ũrĩa wagĩrĩire, 9 nĩ kaba ngũthaithe nĩ ũndũ wa wendo, kuona atĩ niĩ Paulo ndĩ mũthuri mũkũrũ, na rĩu ndĩ muohe nĩ ũndũ wa Kristo Jesu. 10 Ndĩragũthaitha nĩ ũndũ wa mwana wakwa, Onesimo,+ ũrĩa nduĩkĩte ithe+ ndĩ njera.* 11 Mbere ĩyo gũtirĩ ũguni aarĩ naguo harĩ wee, no rĩu arĩ na ũguni harĩ wee o na harĩ niĩ. 12 Ndĩramũtũma acoke kũrĩ wee, o ũcio ũtariĩ ta ngoro yakwa mwene.*
13 No nyende tũikare nake gũkũ nĩguo andungatĩre ithenya rĩaku hĩndĩ ĩno njohetwo nĩ ũndũ wa ũhoro ũrĩa mwega.+ 14 No ndirenda gwĩka ũndũ o na ũmwe itarĩ na rũtha rwaku, nĩguo gĩĩko gĩaku kĩega gĩkorũo kĩrĩ gĩa kwĩyendera no ti kũringĩrĩrio.+ 15 No kũhoteke nĩkĩo arakwehereire kwa ihinda inini,* nĩguo acoke kũrĩ wee tene na tene, 16 ti arĩ o ngombo tu,+ no arĩ makĩria ma ngombo, arĩ mũrũ wa Ithe witũ wendetwo,+ na makĩria nĩ niĩ, no rĩu nĩ ũkũmwenda makĩria thĩinĩ wa mwĩrĩ na thĩinĩ wa Mwathani. 17 Nĩ ũndũ ũcio, angĩkorũo nĩ ũnyonaga ndĩ mũrata-rĩ,* mwamũkĩre na njĩra ya ũtugi o ta ũrĩa ũngĩnyamũkĩra. 18 Ningĩ, angĩkorũo nĩ harĩ ũndũ mũũru aagwĩkire kana arĩ na thiirĩ waku wa kĩndũ o na kĩrĩkũ, njũũria arĩ niĩ. 19 Nĩ niĩ Paulo, ndandĩka na guoko gwakwa mwene: Nĩ ngaarĩha—ningĩ nĩ ũĩ atĩ o nawe ũrĩ na thiirĩ wakwa nginya wa muoyo waku mwene. 20 Ĩni, mũrũ wa Ithe witũ, ndĩrahoya ũteithio ũyũ kuuma kũrĩ wee ũhoro-inĩ wĩgiĩ Mwathani; canjamũra ngoro yakwa* ũhoro-inĩ wĩgiĩ Kristo.
21 Ndĩ na ma atĩ nĩ ũgwĩka ũguo, kwoguo ndĩrakwandĩkĩra ngĩmenyaga atĩ o na ũgwĩka makĩria ma ũguo ndoiga. 22 No hamwe na ũguo-rĩ, thondekera handũ ha gũikara, tondũ nĩ ndĩrerĩgĩrĩra atĩ kũgerera mahoya manyu nĩ ngũcokio kũrĩ inyuĩ.*+
23 Nĩ wageithio nĩ Epafara,+ ũrĩa tuohetwo nake tũrĩ na ũiguano na Kristo Jesu, 24 o na Mariko, Aristako,+ Dema,+ na Luka,+ arutithania wĩra hamwe na niĩ nĩ makũgeithia.
25 Ũtugi mũnene wa Mwathani Jesu Kristo ũroikara na roho ũrĩa muonanagia.