Marũa ma Mbere ma Johana

2 Twana twakwa, ndĩramwandĩkĩra maũndũ maya nĩgetha mũtikehie. No rĩrĩ, mũndũ angĩhia, tũrĩ na mũteithia* ũrĩ hamwe na Ithe witũ, nĩwe Jesu Kristo,+ ũrĩa mũthingu.+ 2 Na we nĩ igongona rĩa ũiguano*+ nĩ ũndũ wa mehia maitũ,+ ĩndĩ to ũndũ wa mehia maitũ tu no nĩ nginya ma thĩ yothe.+ 3 Na kũgerera ũndũ ũyũ nĩ tũmenyaga atĩ nĩ tũmũĩ, tũngĩthiĩ o na mbere kũrũmĩrĩra maathani make. 4 Mũndũ ũrĩa uugaga, “Nĩ ndĩmũĩ,” no ndarũmagĩrĩra maathani make-rĩ, ũcio nĩ mũheenania, na ũhoro ũrĩa wa ma ndũrĩ thĩinĩ wa mũndũ ũcio. 5 No rĩrĩ, mũndũ ũrĩa ũrũmagĩrĩra kiugo gĩake, wendo wa Ngai hatarĩ nganja nĩ ũtuĩtwo mũkinyanĩru thĩinĩ wake.+ Kũgerera ũndũ ũcio nĩ tũmenyaga atĩ tũrĩ na ũiguano hamwe nake.+ 6 Mũndũ ũrĩa uugaga atĩ atũũraga arĩ na ũiguano hamwe nake we mwene nĩ agĩrĩirũo gũthiaga o ta ũrĩa ũcio aathiaga.+

7 Endwa akwa, ti rĩathani rĩerũ ndĩramwandĩkĩra, ĩndĩ nĩ rĩathani rĩa tene rĩrĩa mũkoretwo narĩo kuuma o kĩambĩrĩria.+ Rĩathani rĩrĩ rĩa tene nĩ kiugo kĩrĩa mwaiguire. 8 Ningĩ, ndĩramwandĩkĩra rĩathani rĩerũ, na nĩ rĩa ma ũhoro-inĩ wake o na wanyu, nĩ gũkorũo nduma nĩ ĩrathira na ũtheri ũrĩa wa ma nĩ ũrĩkĩtie kwara.+

9 Mũndũ ũrĩa uugaga atĩ arĩ ũtheri-inĩ no nĩ athũire+ mũrũ wa Ithe, arĩ o nduma-inĩ.+ 10 Mũndũ ũrĩa wendete mũrũ wa Ithe atũũraga ũtheri-inĩ,+ na harĩ we gũtirĩ ũndũ ũngĩmũhĩnga. 11 No mũndũ ũrĩa ũthũire mũrũ wa Ithe akoragwo nduma-inĩ na athiagĩra o nduma-inĩ,+ na ndamenyaga kũrĩa arathiĩ,+ nĩ gũkorũo nduma ĩyo nĩ ĩtumumarĩtie maitho make.

12 Ndĩramwandĩkĩra inyuĩ twana tũtũ tondũ nĩ muoheirũo mehia manyu nĩ ũndũ wa rĩĩtwa rĩake.+ 13 Ndĩramwandĩkĩra inyuĩ maithe, nĩ gũkorũo nĩ mũmenyete ũcio ũkoretwo kuo kuuma o kĩambĩrĩria. Ndĩramwandĩkĩra inyuĩ anake, nĩ gũkorũo nĩ mũtooretie ũrĩa mũũru.+ Ndĩramwandĩkĩra inyuĩ ciana, nĩ gũkorũo nĩ mũmenyete Ithe witũ.+ 14 Ndĩramwandĩkĩra inyuĩ maithe, nĩ gũkorũo nĩ mũmenyete ũcio ũkoretwo kuo kuuma o kĩambĩrĩria. Ndĩramwandĩkĩra inyuĩ anake, nĩ gũkorũo mũrĩ na hinya,+ nakĩo kiugo kĩa Ngai gĩtũũraga thĩinĩ wanyu+ na nĩ mũtooretie ũrĩa mũũru.+

15 Mũtikende thĩ o na kana indo iria irĩ thĩinĩ wa thĩ.+ Mũndũ angĩkorũo nĩ endete thĩ, wendo wa Ithe witũ ndũrĩ thĩinĩ wake;+ 16 nĩ gũkorũo maũndũ mothe marĩa marĩ thĩinĩ wa thĩ—merirĩria ma mwĩrĩ+ na merirĩria ma maitho+ na mwĩyonanio wa indo iria mũndũ arĩ nacio ũtũũro-inĩ*—matiumanĩte na Ithe witũ, ĩndĩ moimanĩte na thĩ. 17 Ningĩ-rĩ, thĩ nĩ gũthira ĩrathira na noguo o na merirĩria mayo,+ no mũndũ ũrĩa wĩkaga wendi wa Ngai atũũraga tene na tene.+

18 Twana tũtũ, nĩ ithaa rĩa mũthia, na o ta ũrĩa mũiguĩte atĩ mũregi-Kristo nĩ aroka,+ o na rĩu nĩ kuumĩrĩte aregi-Kristo aingĩ,+ na ũndũ ũcio ũratũmenyithia atĩ nĩ ithaa rĩa mũthia. 19 Acio nĩ mooimire gatagatĩ-inĩ gaitũ tondũ matiarĩ a mũthemba witũ;*+ nĩ ũndũ korũo maarĩ a mũthemba witũ, nĩ mangĩatũũrire hamwe na ithuĩ. Ĩndĩ nĩ mooimire nĩgetha kuonanio atĩ ti othe a mũthemba witũ.+ 20 Na inyuĩ nĩ mũitĩrĩirio maguta nĩ ũrĩa mũtheru,+ na inyuothe mũrĩ na ũmenyo. 21 Ndiramwandĩkĩra atĩ tondũ mũtiũĩ ũhoro ũrĩa wa ma,+ ĩndĩ ndĩramwandĩkĩra tondũ nĩ mũĩ ũhoro ũcio na tondũ gũtirĩ maheeni moimanaga na ũhoro ũrĩa wa ma.+

22 Nũũ mũheenania o tiga ũrĩa ũkaanaga atĩ Jesu nĩwe Kristo?+ Ũcio nĩwe mũregi-Kristo,+ ũrĩa ũkaanaga Ithe witũ na Mũriũ. 23 Mũndũ ũrĩa ũkaanaga Mũriũ ndarĩ na Ithe witũ.+ No ũrĩa umbũraga Mũriũ+ arĩ na Ithe witũ o nake.+ 24 Na inyuĩ-rĩ, no mũhaka maũndũ marĩa mũiguĩte kuuma o kĩambĩrĩria matũũre thĩinĩ wanyu.+ Angĩkorũo maũndũ macio mũiguĩte kuuma o kĩambĩrĩria nĩ megũtũũra thĩinĩ wanyu, o na inyuĩ mũgũtũũra mũrĩ na ũiguano na Mũriũ na mũrĩ na ũiguano na Ithe witũ. 25 Makĩria ma ũguo-rĩ, ũndũ ũyũ nĩguo we mwene aatwĩrĩire—muoyo wa tene na tene.+

26 Ndĩramwandĩkĩra maũndũ maya nĩ ũndũ wa arĩa marageria kũmũhĩtithia. 27 No inyuĩ, gũitĩrĩrio maguta kũrĩa mwaamũkĩrire kuuma kũrĩ we+ gũtũũraga thĩinĩ wanyu, na mũtirabatara mũndũ o na ũrĩkũ wa kũmũruta; no gũitĩrĩrio maguta kũu mwaamũkĩrire kuuma kũrĩ we nĩ kũmũrutaga maũndũ mothe,+ nakuo nĩ kwa ma na ti kwa maheeni. O ta ũrĩa kũmũrutĩte, tũũrai mũrĩ na ũiguano hamwe nake.+ 28 Nĩ ũndũ ũcio twana tũtũ-rĩ, tũũrai mũrĩ na ũiguano hamwe nake, nĩgetha rĩrĩa akaaguũrio tũgaakorũo na wĩyathi wa kwaria+ na tũtikanamũconokere hĩndĩ ya gũkorũo kuo gwake yakinya. 29 Angĩkorũo nĩ mũĩ atĩ we nĩ mũthingu, ningĩ nĩ mũĩ atĩ mũndũ wothe wĩkaga maũndũ ma ũthingu aciarĩtwo kuumana nake.+