Ezekieli

28 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Mũrũ wa mũndũ, ĩra mũtongoria wa Turo ũũ, ‘Jehova Mwathani Ũrĩa Mũnene oigĩte atĩrĩ:

“Tondũ ngoro yaku nĩ ĩyambararĩtie-rĩ,+ wee uugaga ũũ, ‘Niĩ ndĩ ngai.

Njikaragĩra gĩtĩ kĩa ũnene kĩa ngai thĩinĩ wa iria gatagatĩ.’+

No wee ũrĩ o mũndũ tu, ndũrĩ ngai,

O na gũtuĩka thĩinĩ wa ngoro yaku wĩyonaga ũrĩ ngai.

 3 Atĩrĩrĩ, wee ũrĩ mũũgĩ gũkĩra Danieli.+

Gũtirĩ hitho o na ĩmwe ũtahithũrĩirio.

 4 Nĩ wĩgĩrĩire na ũtonga nĩ ũndũ wa ũũgĩ na ũtaũku waku,

Na ũthiaga na mbere kwĩigĩra thahabu na betha mĩthithũ-inĩ yaku.+

 5 Ũũgĩ waku wĩgiĩ biacara nĩ watũmire ũgĩe na ũtonga mũingĩ,+

Na ngoro yaku ĩgĩkũria mwĩtĩo nĩ ũndũ wa ũtonga ũcio waku.”’

6 “‘Nĩ ũndũ ũcio, Jehova Mwathani Ũrĩa Mũnene oigĩte ũũ:

“Tondũ thĩinĩ wa ngoro yaku wĩyonaga ũrĩ ngai-rĩ,

 7 Nĩ ngaarehe andũ a kũngĩ magũũkĩrĩre, andũ arĩa matarĩ tha o na hanini thĩinĩ wa ndũrĩrĩ,+

Na nĩ magaacomora hiũ ciao cia njora mokĩrĩre indo njega iria ũgĩĩte nacio nĩ ũndũ wa ũũgĩ waku

Na mathũkie riri waku mũnene.+

 8 Nĩ magaagũikũrũkia irima-inĩ,*

Na ũgaakua gĩkuũ kĩa ũhinya ũrĩ iria-inĩ gatagatĩ.+

 9 Hihi mũndũ ũrĩa ũgaakũũraga no ũkaamwĩra, ‘Niĩ ndĩ ngai’?

Ũgaakorũo ũrĩ o mũndũ tu, no ti ngai, ũrĩ moko-inĩ ma arĩa magaakũniina.”’

10 ‘Ũgaakua gĩkuũ kĩa andũ arĩa matarĩ aruu ũrĩ moko-inĩ ma andũ a kũngĩ,

Nĩ gũkorũo niĩ mwene nĩ njarĩtie,’ ũguo nĩguo Jehova Mwathani Ũrĩa Mũnene oigĩte.”

11 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 12 “Mũrũ wa mũndũ, ina rwĩmbo rwa gũcakaya rũkoniĩ mũthamaki wa Turo ũmwĩre ũũ: ‘Jehova Mwathani Ũrĩa Mũnene oigĩte atĩrĩ:

“Wee warĩ kĩonereria kĩa ũkinyanĩru,*

Warĩ na ũũgĩ mũingĩ+ na ũthaka mũkinyanĩru.+

13 Wee warĩ thĩinĩ wa Edeni, mũgũnda wa Ngai,

Wagemetio na tũhiga tuothe twa goro

—Rubi, topazi, na njathibi; krisolito, onigithi, na jadi; safia, takuisi+ na emeradi;

Na tũnyamũ twa kũnyita tũhiga tũu twarĩ twa thahabu.

Twahaarĩirio mũthenya ũrĩa wombirũo.

14 Ndagũthuurire ũtuĩke kerubi ũrĩa mũitĩrĩrie maguta wa kũgitanĩra.

Warĩ igũrũ rĩa kĩrĩma kĩamũre kĩa Ngai,+ na wathiaga ũgereire mahiga-inĩ ma mwaki.

15 Ndwarĩ na ũcuke njĩra-inĩ ciaku kuuma mũthenya ũrĩa wombirũo

O nginya rĩrĩa maũndũ matarĩ ma ũthingu moonekire thĩinĩ waku.+

16 Nĩ ũndũ wa biacara ciaku nyingĩ,+

Nĩ waiyũrirũo nĩ ũhinya, na ũkĩambĩrĩria kwĩhia.+

Nĩ ũndũ ũcio nĩ ngaakweheria kĩrĩma-inĩ kĩa Ngai ta mũndũ ũrĩ na thahu na ngwanange,+

Wee kerubi ũyũ wa kũgitanĩra, na ngweherie mahiga-inĩ ma mwaki.

17 Ngoro yaku yakũririe mwĩtĩo nĩ ũndũ wa ũthaka waku.+

Wathũkirie ũũgĩ waku nĩ ũndũ wa riri waku mũnene.+

Nĩ ngaakũgũithia thĩ.+

Ndũme ũtuĩke kĩndũ gĩa kwĩrorerũo nĩ athamaki.

18 Nĩ ũthahĩtie kũndũ gwaku kũrĩa gũtheru nĩ ũndũ wa ihĩtia rĩaku inene na biacara itarĩ cia kĩhooto.

Nĩ ngaatũma mwaki uume thĩinĩ waku ũkũniine.+

Ndũme ũtuĩke ta mũhu thĩinĩ wa thĩ mbere ya arĩa othe makwĩroragĩra.

19 Arĩa othe makũũĩ gatagatĩ-inĩ ka ikundi cia andũ magaakwĩrorera magegete.+

Mũthia waku ũgaakorũo ũrĩ wa narua na mũũru mũno,

Na ndũgaacoka gũkorũo kuo rĩngĩ mahinda mothe.”’”+

20 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 21 “Mũrũ wa mũndũ, erekeria ũthiũ waku harĩ itũũra rĩa Sidoni,+ na ũrathe ũhoro wa kũrĩũkĩrĩra. 22 Uuge ũũ, ‘Jehova Mwathani Ũrĩa Mũnene oigĩte atĩrĩ:

“Nĩ ngaagũũkĩrĩra wee Sidoni, na ngoocwo thĩinĩ waku;

Nao andũ nĩ makaamenya atĩ niĩ nĩ niĩ Jehova, ndarĩkia kũrehe ituĩro thĩinĩ wa itũũra rĩu na therio kũgerera harĩ rĩo.

23 Nĩ ngaatũma kũgĩe mũrimũ mũũru thĩinĩ warĩo na thakame ĩtherere barabara-inĩ ciarĩo.

Arĩa makooragwo makaagwa thĩinĩ wa itũũra rĩu hĩndĩ ĩrĩa rĩgookĩrĩrũo na rũhiũ rwa njora kuuma mĩena yothe;

Na andũ nĩ makaamenya atĩ niĩ nĩ niĩ Jehova.+

24 “‘“Thutha wa maũndũ macio andũ a nyũmba ya Isiraeli matigaacoka gũthiũrũrũkĩrio nĩ mĩigua ĩrĩ na ruo,+ nĩyo andũ arĩa mamanyũrũragia; na andũ nĩ makaamenya atĩ niĩ nĩ niĩ Jehova Mwathani Ũrĩa Mũnene.”’

25 “‘Jehova Mwathani Ũrĩa Mũnene oigĩte ũũ: “Rĩrĩa ngaacokanĩrĩria rĩngĩ andũ a nyũmba ya Isiraeli kuuma ikundi-inĩ cia andũ iria maahurunjũkĩire,+ nĩ ngaatherio gatagatĩ-inĩ kao maitho-inĩ ma andũ a ndũrĩrĩ.+ Na nĩ magaatũũra bũrũri wao+ ũrĩa ndaheire ndungata yakwa Jakubu.+ 26 Magaatũũra thĩinĩ waguo marĩ na ũgitĩri+ na nĩ magaaka nyũmba na mahande mĩgũnda ya mĩthabibu,+ na matũũre marĩ na ũgitĩri rĩrĩa ngaaherithia arĩa othe mamathiũrũrũkĩirie, o acio mamanyũrũragia;+ na nĩ makaamenya atĩ niĩ nĩ niĩ Jehova Ngai wao.”’”