Ezekieli

6 “‘No mũrangĩri angĩona rũhiũ rwa njora rũgĩũka na age kũhuuha coro,+ andũ mage gũkinyĩrũo nĩ mũkaana, naruo rũhiũ rwa njora rũũke na rũũrage ũmwe wao, mũndũ ũcio nĩ agaakua nĩ ũndũ wa mehia make, no nĩ ngooria mũrangĩri ũcio thakame ya mũndũ ũcio.’+

7 “Wee mũrũ wa mũndũ, nĩ ngwamũrĩte ũtuĩke mũrangĩri wa nyũmba ya Isiraeli; na rĩrĩa waigua kiugo kuuma kanua-inĩ gakwa, no mũhaka ũmaheage mũkaana ũcio uumĩte kũrĩ niĩ.+ 8 Hĩndĩ ĩrĩa ndera mũndũ mwaganu ũũ, ‘Wee mũndũ ũyũ mwaganu, hatarĩ nganja nĩ ũgũkua!’+ no wage kwaria ũhe mũndũ ũcio mwaganu mũkaana nĩguo agarũrĩre mĩthiĩre yake, nĩ agaakua arĩ mũndũ mwaganu nĩ ũndũ wa mehia make,+ no nĩ ngaakũũria thakame yake. 9 No ũngĩhe mũndũ mwaganu mũkaana agarũrĩre njĩra yake, nake arege kũgarũrĩra mĩthiĩre yake, nĩ agaakua nĩ ũndũ wa mehia make,+ no wee nĩ ũkaahonokia muoyo waku.+

10 “Nawe mũrũ wa mũndũ-rĩ, ĩra nyũmba ya Isiraeli ũũ, ‘Inyuĩ muugĩte atĩrĩ: “Ũremi witũ o na mehia maitũ nĩ matũritũhĩire mũno, magatũma twage hinya;+ nĩ ũndũ ũcio-rĩ, tũngĩgĩthiĩ na mbere gũtũũra atĩa?”’+ 11 Meere atĩrĩ, Jehova Mwathani Ũrĩa Mũnene oigĩte ũũ, ‘O ta ũrĩa niĩ ndũũraga muoyo, ndikenagio nĩ gĩkuũ kĩa mũndũ mwaganu,+ no handũ ha ũguo nyendaga mũndũ mwaganu agarũrĩre njĩra yake+ athiĩ na mbere gũtũũra muoyo.+ Garũrĩrai, garũrĩrai mũtigane na njĩra cianyu njũru,+ tondũ rĩrĩ, mũgũgĩkua nĩkĩ, inyuĩ nyũmba ya Isiraeli?’”+

12 “Nawe mũrũ wa mũndũ-rĩ, ĩra ariũ a andũ anyu ũũ, ‘Ũthingu wa mũndũ mũthingu ndũkaamũhonokia rĩrĩa akaarema;+ o na waganu wa mũndũ mwaganu ndũkaahĩngithia mũndũ ũcio rĩrĩa akaagarũrĩra atigane na waganu wake;+ o na gũtirĩ mũndũ mũthingu ũkaahota gũthiĩ na mbere gũtũũra muoyo tondũ wa ũthingu wake mũthenya ũrĩa akeehia.+ 13 Rĩrĩa ndera mũndũ mũthingu atĩrĩ: “Hatarĩ nganja nĩ ũgũtũũra muoyo,” nake ehoke ũthingu wake mwene eke maũndũ moru,*+ gũtirĩ ũndũ o na ũmwe wake wa ũthingu ũkaaririkanwo, no agaakua nĩ ũndũ wa maũndũ macio moru ekĩte.+

14 “‘Na rĩrĩa ndera mũndũ mwaganu ũũ: “Hatarĩ nganja nĩ ũgũkua,” nake agarũrĩre atigane na mehia make na eke maũndũ ma kĩhooto na ma ũthingu,+ 15 na mũndũ ũcio mwaganu acokie kĩrĩa oete gĩa kũrũgamĩrĩra thiirĩ,+ na acokie kĩrĩa aiyĩte,+ na arũmagĩrĩre mawatho marĩa matongoragia harĩ muoyo na njĩra ya kwaga gwĩka maũndũ moru, hatarĩ nganja nĩ egũthiĩ na mbere gũtũũra muoyo.+ Ndegũkua. 16 Gũtirĩ rĩhia o na rĩmwe rĩa marĩa eekĩte rĩkaaririkanwo.+ Hatarĩ nganja nĩ egũthiĩ na mbere gũtũũra muoyo nĩ ũndũ wa gwĩka maũndũ ma kĩhooto na ma ũthingu.’+

17 “No andũ anyu moigĩte atĩrĩ, ‘Njĩra ya Jehova ti ya kĩhooto,’ ĩndĩ njĩra yao nĩyo ĩtarĩ ya kĩhooto.

18 “Mũndũ mũthingu angĩtigana na ũthingu wake eke ũndũ mũũru, no mũhaka akue nĩ ũndũ waguo.+ 19 No rĩrĩa mũndũ mwaganu atigana na waganu wake na eka maũndũ ma kĩhooto na ma ũthingu, nĩ agaatũũra muoyo nĩ ũndũ wa gwĩka ũguo.+

20 “No inyuĩ muugĩte atĩrĩ, ‘Njĩra ya Jehova ti ya kĩhooto.’+ Ngaatuĩra o ũmwe wanyu kũringana na njĩra ciake, inyuĩ nyũmba ya Isiraeli.”

21 Na rĩrĩ, mwaka-inĩ wa 12, mweri wa ikũmi, mũthenya wa gatano wa mweri ũcio tũrĩ ithamĩrio, mũndũ ũmwe wetharĩte kuuma Jerusalemu nĩ ookire kũrĩ niĩ+ akĩnjĩra atĩrĩ: “Itũũra nĩ rĩanange!”+

22 Na kũrĩ hwaĩ-inĩ mũndũ ũcio wetharĩte atanoka kũrĩ niĩ, guoko kwa Jehova nĩ gwokĩte igũrũ rĩakwa, nake nĩ aahingũrĩte kanua gakwa mũndũ ũcio atanoka kũrĩ niĩ rũcinĩ. Kwoguo kanua gakwa gakĩhingũrũo na ngĩhota kwaria rĩngĩ.+

23 Na kiugo kĩa Jehova gĩkĩnginyĩra ngĩrũo atĩrĩ: 24 “Mũrũ wa mũndũ, aikari a kũndũ gũkũ kwanangĩku+ maroiga ũũ igũrũ rĩgiĩ bũrũri wa Isiraeli, ‘Iburahimu aarĩ mũndũ ũmwe tu, no nĩ eegwatĩire bũrũri ũyũ.+ No ithuĩ tũrĩ aingĩ; hatarĩ nganja nĩ tũheetwo bũrũri ũyũ ũtuĩke igai ritũ.’

25 “Nĩ ũndũ ũcio meere atĩrĩ, ‘Jehova Mwathani Ũrĩa Mũnene oigĩte ũũ: “Mũrĩanagĩria nyama na thakame,+ mũkahoya mĩhianano ĩyo yanyu ĩrĩ magigi,* na mũgaita thakame.+ Mũngĩkĩgaya bũrũri ũyũ atĩa? 26 Mwĩhokaga rũhiũ rwanyu rwa njora,+ mũgeka maũndũ marĩ magigi, na o ũmwe wanyu nĩ athahĩtie mũtumia wa mũndũ ũrĩa ũngĩ.+ Mũngĩkĩgaya bũrũri ũyũ atĩa?”’+

27 “Ũũ nĩguo wagĩrĩirũo kũmeera, ‘Jehova Mwathani Ũrĩa Mũnene oigĩte atĩrĩ: “O ta ũrĩa niĩ ndũũraga muoyo, andũ acio maikaraga kũndũ kũu kwanangĩku makooragwo na rũhiũ rwa njora; nao arĩa marĩ werũ-inĩ ndĩmaneane kũrĩ nyamũ cia gĩthaka matuĩke irio ciacio; nao arĩa marĩ thĩinĩ wa mĩĩgitio na ngurunga-inĩ magaakua nĩ ũndũ wa mũrimũ.+ 28 Nĩ ngaatũma bũrũri ũcio ũtuĩke kũndũ gũtiganĩrie na kwanangĩku biũ,+ na mwĩtĩo ũcio waguo mũnene nĩ ũgaathira, nacio irĩma cia Isiraeli nĩ igaatiganĩrio,+ kwage mũndũ o na ũmwe ũgaatuĩkanagĩria kuo. 29 Na nĩ makaamenya atĩ niĩ nĩ niĩ Jehova rĩrĩa ngaatũma bũrũri ũcio ũtuĩke kũndũ gũtiganĩrie na kwanangĩku biũ+ nĩ ũndũ wa maũndũ mothe marĩ magigi marĩa mekĩte.”’+

30 “Nawe mũrũ wa mũndũ-rĩ, andũ anyu nĩ mararanĩria ũhoro waku marĩ thingo-inĩ na mĩrango-inĩ ya nyũmba ciao.+ Marerana ũũ, o mũndũ akera mũrũ wa ithe, ‘Ũka tũigue kiugo kĩrĩa kiumĩte harĩ Jehova.’ 31 Nĩ megũka maikare thĩ mbere yaku marĩ andũ akwa; na nĩ mekũigua ciugo ciaku, no matigwĩka ũrĩa ciugĩte.+ Nĩ gũkorũo makwĩraga ciugo cia gũgũkenia na tũnua twao, no ngoro ciao ikorokagĩra uumithio ũtarĩ wa kĩhooto. 32 Atĩrĩrĩ, ũkoragwo ũtariĩ ta rwĩmbo rwa wendo harĩ o, rũinĩtwo na mũgambo mũthaka na rũkahũũrũo wega na kĩnanda kĩa ndigi. Nĩ mekũigua ciugo ciaku, no gũtirĩ o na ũmwe wao ũgwĩka ũrĩa ciugĩte. 33 Na hĩndĩ ĩrĩa maũndũ macio makaahinga—na nĩ makaahinga—nĩ makaamenya atĩ nĩ kwarĩ na mũnabii gatagatĩ-inĩ kao.”+