Zekaria
6 Ningĩ ngĩtiira maitho o rĩngĩ ngĩona ngaari inya cia mbarathi igĩũka ciumĩte gatagatĩ ka irĩma igĩrĩ, na irĩma icio ciarĩ cia gĩcango. 2 Ngaari ya mbere yarĩ na mbarathi cia rangi mũtune, na ngaari ya kerĩ yarĩ na mbarathi cia rangi mũirũ.+ 3 Ngaari ya gatatũ yarĩ na mbarathi cia rangi mwerũ, na ngaari ya kana yarĩ na mbarathi irĩ na marooro na cia marangi matiganĩte.+
4 Ngĩũria mũraika ũcio waaragia na niĩ atĩrĩ: “Mwathi wakwa, ici nĩ ndũĩ?”
5 Mũraika ũcio akĩnjokeria akĩnjĩra ũũ: “Nĩ maroho marĩa mana+ ma igũrũ marĩa maroimagara thutha wa kũrũgama mbere ya Mwathani wa thĩ yothe.+ 6 Ĩrĩa* ĩrĩ na mbarathi cia rangi mũirũ ĩrathiĩ bũrũri wa mwena wa rũgongo;+ nacio cia rangi mwerũ irathiĩ gĩcigo kĩrĩa kĩrĩ mbere ya iria; nacio iria irĩ na marooro irathiĩ bũrũri wa mwena wa mũhuro. 7 Nacio iria ciarĩ na marangi matiganĩte nĩ cieriragĩria mũno gũthiĩ kũndũ na kũndũ thĩinĩ wa thĩ.” Nake agĩciĩra: “Umagarai mũthiĩ kũndũ na kũndũ thĩinĩ wa thĩ.” Nacio ikĩambĩrĩria gũthiĩ kũndũ na kũndũ thĩinĩ wa thĩ.
8 Agĩcoka akĩanĩrĩra akĩnjĩra atĩrĩ: “Ta rora, iria irathiĩ bũrũri wa mwena wa rũgongo nĩ itũmĩte roho wa Jehova ũgĩe na ũhurũko bũrũri-inĩ wa mwena wa rũgongo.”
9 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 10 “Amũkĩra kuuma kũrĩ Helidai, Tobija, na Jedaia kĩrĩa marehete kuuma kũrĩ andũ arĩa marĩ ithamĩrio; na mũthenya ũcio, no mũhaka ũgaathiĩ nyũmba-inĩ ya Josia mũrũ wa Zefania hamwe na acio mokĩte kuuma Babuloni. 11 Wagĩrĩirũo kuoya betha na thahabu ũthondeke thũmbĩ* na ũmĩigĩrĩre mũtwe wa Joshua+ mũrũ wa Jehozadaku, mũthĩnjĩri-Ngai ũrĩa mũnene. 12 Na ũmwĩre atĩrĩ,
“‘Jehova mũnene wa ita ekuuga ũũ: “Ũyũ nĩwe mũndũ ũrĩa wĩtagwo Thuuna.+ Nĩ akaaruta thuuna arĩ handũ hake, na nĩ agaaka hekarũ ya Jehova.+ 13 Nĩwe ũgaaka hekarũ ya Jehova, na nĩwe ũkaagĩa na riri. Nĩ agaaikarĩra gĩtĩ gĩake kĩa ũnene na aathanage, na ningĩ agaakorũo arĩ mũthĩnjĩri-Ngai gĩtĩ-inĩ gĩake kĩa ũnene,+ na nĩ gũgaakorũo na ũiguano wa thayũ gatagatĩ ka mawĩra macio merĩ.* 14 Na thũmbĩ ĩyo* ĩgaakorũo ĩrĩ kĩririkano* harĩ Helemu, Tobija, Jedaia,+ na Heni mũrũ wa Zefania, thĩinĩ wa hekarũ ya Jehova. 15 Nao andũ arĩa marĩ kũraihu nĩ magooka na manyitanĩre harĩ gwaka hekarũ ya Jehova.” Na nĩ mũkaamenya atĩ Jehova mũnene wa ita nĩwe ũndũmĩte kũrĩ inyuĩ. Na ũndũ ũcio nĩ ũgeekĩka—angĩkorũo nĩ mũgũthikĩrĩria mũgambo wa Jehova Ngai wanyu.’”