Zefania
1 Gĩkĩ nĩkĩo kiugo kĩa Jehova kĩrĩa gĩakinyĩire Zefania* mũrũ wa Kushi mũrũ wa Gedalia mũrũ wa Amaria mũrũ wa Hezekia matukũ-inĩ ma Josia+ mũrũ wa Amoni+ mũthamaki wa Juda:
2 “Nĩ ngaahaata biũ indo ciothe ciehere thĩinĩ wa thĩ,” ũguo nĩguo Jehova ekuuga.+
3 “Nĩ ngaahaata andũ o na nyamũ.
Nĩ ngaahaata nyoni cia rĩera-inĩ* o na thamaki cia iria-inĩ,+
O na mĩhĩnga*+ hamwe na andũ arĩa aganu;
Nĩ ngeeheria andũ thĩinĩ wa thĩ,” ũguo nĩguo Jehova ekuuga.
4 “Nĩ ngaatambũrũkia guoko gwakwa njũkĩrĩre Juda
Na njũkĩrĩre aikari othe a Jerusalemu,
Na nĩ ngaaniina matigari mothe ma Baali kũndũ gũkũ,+
Niine rĩĩtwa rĩa athĩnjĩri-ngai a ngai ngʼeni o na athĩnjĩri-Ngai arĩa angĩ,+
5 Hamwe na arĩa mainamagĩrĩra mbũtũ ya igũrũ marĩ nyũmba igũrũ,+
Na arĩa mainamagĩrĩra Jehova na makehĩta gũkorũo marĩ ehokeku harĩ we+
O makĩĩhĩtaga gũkorũo marĩ ehokeku harĩ Malikamu;+
6 Na arĩa magarũrũkaga magatiga kũrũmĩrĩra Jehova+
O acio matacaragia Jehova kana magatuĩria ũhoro harĩ we.”+
7 Kira ũrĩ mbere ya Jehova Mwathani Ũrĩa Mũnene, nĩ gũkorũo mũthenya wa Jehova ũrĩ hakuhĩ.+
Jehova nĩ ahaarĩirie igongona; nĩ atheretie arĩa etĩte.
8 “Mũthenya wa igongona rĩa Jehova nĩ ngaaciirithia anene,
Njirithie ariũ a mũthamaki,+ na arĩa othe mehumbaga nguo cia andũ a kũngĩ.
9 Mũthenya ũcio nĩ ngaaciirithia mũndũ o wothe ũhaicaga handũ harĩa hatũũgĩru,*
Arĩa maiyũragia nyũmba ya mwathi wao ũhinya na maheeni.”
10 Jehova ekuuga ũũ, “Mũthenya ũcio,
Nĩ gũgaakorũo na mũgambo wa kĩrĩro kuuma Kĩhingo-inĩ gĩa Thamaki,+
Gũkorũo na kĩrĩro kuuma Gĩcigo-inĩ Kĩrĩa Kĩerũ gĩa itũũra,+
Na mũrurumo mũnene kuuma tũrĩma-inĩ.
11 Rĩrai, inyuĩ aikari a Makiteshi,*
Nĩ gũkorũo onjorithia* othe nĩ maniinĩtwo;*
Arĩa othe mathimaga betha nĩ manangĩtwo.
12 Hĩndĩ ĩyo nĩ ngaacaria Jerusalemu biũ na matawa,
Na nĩ ngaaciirithia andũ arĩa matatindanagĩra na maũndũ,* o acio moigaga ũũ ngoro-inĩ yao,
‘Jehova ndageka ũndũ mwega, na ndageka ũndũ mũũru.’+
13 Ũtonga wao nĩ ũgaatahwo, nacio nyũmba ciao cianangwo.+
Nĩ magaaka nyũmba, no matigaikara thĩinĩ wacio;
Na nĩ makaahanda mĩgũnda ya mĩthabibũ, no matikanyua ndibei kuumana nayo.+
14 Mũthenya ũrĩa mũnene wa Jehova ũrĩ hakuhĩ!+
Ũrĩ hakuhĩ na nĩ ũroka na ihenya mũno!+
Mũgambo wa mũthenya wa Jehova nĩ mũrũrũ.+
Kũu njamba ya ita nĩ ĩkaarĩra.+
15 Mũthenya ũcio nĩ mũthenya wa mangʼũrĩ,+
Mũthenya wa mĩtangĩko na kĩeha,+
Mũthenya wa kĩhuhũkanio na mwanangĩko,
Mũthenya mũtumanu na wa nduma,+
Mũthenya wa matu na nduma ndumanu,+
16 Mũthenya wa coro na wa mbugĩrĩrio ya mbaara,+
Kwerekera matũũra marĩa marĩ na ũgitĩri na nyũmba iria ndaya na igũrũ cia kona-inĩ.+