Ezekieli
24 Kiugo kĩa Jehova gĩkĩnginyĩra o rĩngĩ mwaka-inĩ wa kenda, mweri wa ikũmi, mũthenya wa ikũmi wa mweri ũcio ngĩrũo atĩrĩ: 2 “Mũrũ wa mũndũ, andĩka tarĩki cia mũthenya ũyũ,* o ũyũ wa ũmũthĩ. Mũthenya ũyũ nĩguo mũthamaki wa Babuloni ambĩrĩirie gũtharĩkĩra Jerusalemu.+ 3 Na ũtaarĩrie thimo* ĩkoniĩ nyũmba ĩno nemi, uuge ũũ igũrũ rĩmegiĩ:
“Jehova Mwathani Ũrĩa Mũnene oigĩte ũũ:
“Hagĩra nyũngũ ya kũrugĩra,* ũmĩigĩrĩre mwaki-inĩ na ũmĩĩkĩre maĩ.+
4 Ĩkĩra icunjĩ cia nyama thĩinĩ wayo,+ icunjĩ ciothe iria njega,
Kĩero na kĩande; ũmĩiyũrie mahĩndĩ marĩa mega.
5 Oya ngʼondu ĩrĩa njega biũ thĩinĩ wa rũũru+ na ũbange ngũ gũthiũrũrũka rungu rwa nyũngũ ĩyo.
Therũkia icunjĩ icio, na ũruge mahĩndĩ marĩa marĩ thĩinĩ wayo.”’
6 “Nĩ ũndũ ũcio, Jehova Mwathani Ũrĩa Mũnene oigĩte ũũ:
‘Kaĩ itũũra rĩrĩa rĩitithagia thakame rĩrĩ na haaro-ĩ,+ nyũngũ ĩyo ya kũrugĩra ĩrĩ na gutu, na gutu ũcio ndũrutĩtwo!
Mĩonorie gĩcunjĩ o gĩcunjĩ;+ ndũgacicukĩre mĩtĩ.
7 Nĩ gũkorũo thakame ĩyo rĩaitire ĩrĩ o thĩinĩ warĩo;+ rĩamĩitire igũrũ rĩa rwaro rwa ihiga itheri.
Rĩtiamĩitire thĩ nĩguo rĩmĩhumbĩre na rũkũngũ.+
8 Nĩgetha njarahũre marakara ma kwĩrĩhĩria,
Njitĩte thakame yarĩo igũrũ rĩa rwaro rwa ihiga itheri,
Nĩguo ndĩkahumbĩrũo.’+
9 “Nĩ ũndũ ũcio, Jehova Mwathani Ũrĩa Mũnene oigĩte ũũ:
‘Kaĩ itũũra rĩrĩa rĩitithagia thakame rĩrĩ na haaro-ĩ!+
Ngũiganĩrĩra hĩba ndaya na igũrũ ya ngũ.
10 Iganĩrĩra ngũ icio na wakie mwaki,
Therũkia nyama icio biũ, ũite thubu wacio, na ũreke mahĩndĩ macure.
11 Igĩrĩra nyũngũ ĩyo ĩtarĩ kĩndũ makara-inĩ ĩhiũhe
Nĩguo gĩcango kĩayo kĩhiũhe nginya gĩtunĩhe.
Gĩko kĩayo nĩ gĩgũtweka thĩinĩ wayo,+ na gutu wayo ũhĩe.
12 Nĩ wĩra mũritũ na wa mĩnoga,
Tondũ gutu ũrĩa mũingĩ ndũroima.+
Mĩikie mwaki-inĩ na gutu wayo!’
13 “‘Gĩko gĩaku kĩoimanire na mĩtugo yaku ya ũũra-thoni.+ Ndageririe gũgũtheria no ndwatherire kuumana na gĩko gĩaku. Gũtirĩ hĩndĩ ũgaathera o nginya rĩrĩa mathũgũta makwa gũkwerekera makaanyihanyiha.+ 14 Niĩ mwene, Jehova, nĩ njarĩtie. Ũndũ ũcio nĩ ũgeekĩka. Ngeeka ũguo itekwĩgirĩrĩria, itekũringwo nĩ tha, na itekwĩrira.+ Magaagũtuĩra kũringana na njĩra ciaku na maũndũ marĩa wĩkaga,’ ũguo nĩguo Jehova Mwathani Ũrĩa Mũnene oigĩte.”
15 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 16 “Mũrũ wa mũndũ, ndĩ hakuhĩ kweheria mwendwa waku na igũtha o rĩmwe.+ Ndwagĩrĩire gũcakaya;* o na kana kũrĩra kana gũita maithori. 17 Cakaya ũkirĩte, na ndũgeke maũndũ marĩa mekagwo ma gũcakaĩra arĩa makuĩte.+ Wĩyohe kĩremba gĩaku+ na wĩkĩre iratũ ciaku.+ Ndũkehumbĩre kanua*+ na ndũkarĩe mũgate wa kũreherũo nĩ andũ angĩ.”*+
18 Na rũcinĩ ngĩarĩria andũ, nake mũtumia wakwa agĩkua hwaĩ-inĩ. Naruo rũcinĩ rũrũ rũngĩ ngĩka o ta ũrĩa ndathĩtwo. 19 Nao andũ maanjũragia atĩrĩ: “Kaĩ ũtaratwĩra ũrĩa maũndũ maya ũreka matũkoniĩ?” 20 Ngĩmacokeria ngĩmeera atĩrĩ: “Kiugo kĩa Jehova nĩ kĩnginyĩire ngerũo atĩrĩ, 21 ‘Ĩra nyũmba ya Isiraeli ũũ: “Jehova Mwathani Ũrĩa Mũnene oigĩte atĩrĩ, ‘Ndĩ hakuhĩ gũthahia handũ hakwa harĩa hatheru,+ o ho kĩhumo kĩa mwĩraho wanyu mũnene, o hau mwendete na heriragĩrio nĩ ngoro cianyu. Anake na airĩtu anyu arĩa mwatigire makooragwo na rũhiũ rwa njora.+ 22 Hĩndĩ ĩyo nĩ mũgeeka o ta ũrĩa njĩkĩte. Mũtikehumbĩra kanua* na mũtikaarĩa mũgate wa kũreherũo nĩ andũ angĩ.+ 23 Mũgaakorũo mwĩyohete iremba cianyu mĩtwe na mwĩkĩrĩte iratũ cianyu magũrũ. Mũtigaacakaya kana mũrĩre. Handũ ha ũguo, mũgaathira nĩ ũndũ wa mahĩtia manyu,+ na nĩ mũkaagĩo nĩ kĩeha kĩnene ngoro mũndũ na ũrĩa ũngĩ. 24 Ezekieli nĩ atuĩkĩte kĩmenyithia harĩ inyuĩ.+ Na o ta ũrĩa ekĩte, ũguo noguo mũgeeka. Rĩrĩa maũndũ macio mageekĩka, nĩ mũkaamenya atĩ niĩ nĩ niĩ Jehova Mwathani Ũrĩa Mũnene.’”’”
25 “Na ha ũhoro waku wee mũrũ wa mũndũ-rĩ, mũthenya ũrĩa ngaamatunya handũ hao harĩa hairigĩre, handũ hathaka harĩa hamarehagĩra gĩkeno, o hau mendete, harĩa ngoro ciao ciĩriragĩria, o hamwe na anake na airĩtu ao-rĩ,+ 26 nĩ ũkaareherũo ũhoro nĩ mũndũ ũrĩa ũgaakorũo etharĩte.+ 27 Mũthenya ũcio nĩ ũgaatumũra kanua warĩrie mũndũ ũcio wĩtharĩte, na ndũgaacoka gũkorũo ũrĩ bubu rĩngĩ.+ Ũgaatuĩka kĩmenyithia harĩ o, na nĩ makaamenya atĩ niĩ nĩ niĩ Jehova.”