Isaia
5 Rekei nyinĩre mwendwa wakwa
Rwĩmbo rwĩgiĩ mwendwa wakwa na mũgũnda wake wa mĩthabibũ.+
Mwendwa wakwa aarĩ na mũgũnda wa mĩthabibũ kũndũ kũnoru hakuhĩ na kĩrĩma.
2 Nake akĩũcimba na akĩeheria mahiga marĩa maarĩ kuo.
Akĩũhanda mũthabibũ ũrĩa mwega ũciaraga thabibũ ndune,
Gatagatĩ-inĩ kaguo agĩaka nyũmba ndaya na igũrũ,
Na thĩinĩ waguo akĩenja kĩhihĩro kĩa ndibei ihiga-inĩ.+
Agĩtũũra erĩgagĩrĩra ũciare thabibũ,
No guo ũgĩciara thabibũ cia gĩthaka theri.+
3 “Rĩu inyuĩ aikari a Jerusalemu na andũ a Juda,
Tuai ciira gatagatĩ-inĩ gakwa na mũgũnda ũcio wakwa wa mĩthabibũ.+
4 Nĩ atĩa ũngĩ ingĩekire mũgũnda ũcio wakwa wa mĩthabibũ
Ũrĩa itarĩ ndeka?+
Rĩrĩa nderĩgagĩrĩra ũciare thabibũ-rĩ,
Nĩ kĩĩ gĩatũmire ũciare thabibũ cia gĩthaka theri?
5 Rĩu kĩrekei ndĩmwĩre
Ũrĩa ngeeka mũgũnda ũcio wakwa wa mĩthabibũ:
Ngeeheria rũgiri rwaguo,
Na ũcinwo ũhĩe.+
Tharie rũthingo rwaguo rwa ihiga,
Naguo ũrangarangwo.
6 Ngaatũma ũkorũo ũrĩ mwanangĩku;+
Ndũgaacehwo kana ũrĩmwo.
7 Nĩ gũkorũo mũgũnda ũcio wa mĩthabibũ wa Jehova mũnene wa ita nĩ nyũmba ya Isiraeli;+
Nao andũ a Juda nĩo mũgũnda ũrĩa eendete.
Aatũire erĩgagĩrĩra kĩhooto,+
No rĩrĩ, wagi wa kĩhooto nĩguo warĩ kuo;
Aatũũire erĩgagĩrĩra ũthingu,
No rĩrĩ, kĩrĩro kĩa mĩtangĩko nĩkĩo kĩarĩ kuo.”+
8 Kaĩ andũ arĩa manyitithanagia nyũmba ĩmwe na ĩrĩa ĩngĩ marĩ na haaro-ĩ+
Na arĩa manyitithanagia mũgũnda ũmwe na ũrĩa ũngĩ+
Nginya hakaga handũ rĩngĩ
Na mũgaikara mũrĩ oiki thĩinĩ wa bũrũri!
9 Jehova mũnene wa ita nĩ ehĩtĩte ngĩiguaga na matũ
Atĩ o na gũtuĩka nyũmba nyingĩ nĩ nene na thaka,
Igaatuĩka kĩndũ gĩa kũguoyohia,
Na gũtirĩ mũndũ ũgaaikara kuo.+
10 Tondũ ĩĩka ikũmi cia mũgũnda wa mĩthabibũ igaaciara gĩthimi kĩmwe tu kĩa mbathi,*
Na mbegũ gĩthimi kĩmwe kĩa homeri* iciare gĩthimi kĩmwe tu kĩa eba.*+
11 Kaĩ andũ arĩa mokĩraga rũcinĩ tene manyue njohi marĩ na haaro-ĩ,+
Arĩa matukagĩrĩrũo gũkagĩa nduma nginya marĩrĩĩo nĩ ndibei!
12 Nĩ makoragwo na kĩnanda kĩa mũgeeto o na kĩnanda kĩa ndigi,
Manyanga, mũtũrirũ, na ndibei maruga-inĩ mao;
Ĩndĩ matiĩciragia ũhoro wa ciĩko cia Jehova,
O na mationaga wĩra wa moko make.
13 Kwoguo andũ akwa magaatwarũo ithamĩrio
Nĩ ũndũ wa kwaga ũmenyo;+
Andũ ao arĩa marĩ riri nĩ makaahũta,+
Nao andũ ao othe mangʼare nĩ ũndũ wa nyota.
14 Nĩ ũndũ ũcio Mbĩrĩra* nĩ ĩyararamĩtie
Na nĩ yathamĩtie kanua kayo gothe;+
Na ũgemu wake,* andũ ake arĩa marĩ inegene, na arĩĩu ake
Hatarĩ nganja nĩ magaaikũrũka thĩinĩ wayo.
15 Nake mũndũ nĩ akaanyihio,
Mũndũ nĩ agaaconorithio,
Na maitho ma mũndũ ũrĩa mwĩtĩi nĩ magaaconorithio.
16 Jehova mũnene wa ita nĩ agaatũũgĩrio nĩ ũndũ wa ituĩro rĩake;*
Ngai ũrĩa wa ma, Ũrĩa Mũtheru,+ nĩ akeeyonania atĩ nĩ mũtheru kũgerera ũthingu.+
17 Natuo tũgondu tũkaarĩaga o ta tũrĩ kũrĩa tũrĩithagio;
Nao ageni makaarĩaga irio cia kũndũ gũtiganĩrie kwa nyamũ iria irĩithĩtio wega.
18 Kaĩ andũ arĩa makururagia mahĩtia mao na mĩkwa ya maheeni marĩ na haaro-ĩ
Na magakururia mehia mao na mĩkwa ya tũkaari twa gũkururio;
19 Arĩa moigaga atĩrĩ: “Rekei ahĩkahĩke wĩra wake;
Rekei ũũke na ihenya nĩgetha tũwone.
20 Kaĩ andũ arĩa moigaga atĩ ũndũ mwega nĩ mũũru na ũndũ mũũru nĩ mwega marĩ na haaro-ĩ,+
Arĩa makũũranagia nduma na ũtheri, na ũtheri na nduma,
Arĩa mekĩraga kĩndũ kĩrũrũ ithenya rĩa kĩndũ kĩrĩ cama, na kĩndũ kĩrĩ cama ithenya rĩa kĩndũ kĩrũrũ!
21 Kaĩ andũ arĩa ogĩ maitho-inĩ mao ene
Na magakorũo na ũtaũku maitho-inĩ mao ene marĩ na haaro-ĩ!+
22 Kaĩ andũ arĩa njorua harĩ kũnyua ndibei
Na arĩa ogĩ harĩ gũtukania njohi marĩ na haaro-ĩ!+
23 Arĩa meheragĩria mũndũ ũrĩa mwaganu mahĩtia nĩ ũndũ wa ihaki+
Arĩa maimaga mũndũ ũrĩa mũthingu kĩhooto!+
24 Tondũ wa ũguo, o ta ũrĩa rũrĩrĩmbĩ rwa mwaki rũcinaga mahuti
Na nyeki nyũmũ ĩgekũnja ĩrĩ mwaki-inĩ,
Mĩri yao nĩ kũbutha ĩkaabutha,
Na kĩro kĩao kĩhurunjũke o ta mũtutu,
Tondũ nĩ maareganire na watho* wa Jehova mũnene wa ita
Na makĩagĩra gĩtĩo kiugo kĩa Ũrĩa Mũtheru wa Isiraeli.+
25 Nĩkĩo marakara ma Jehova makanaga kwerekera andũ ake,
Na nĩ agaatambũrũkia guoko gwake harĩ o na amahũũre.+
Irĩma nĩ igaathingitha,
Nacio ciimba ciao igaakorũo itariĩ ta gĩko kĩrĩa kĩrĩ njĩra-inĩ.+
Nĩ ũndũ wa maũndũ macio mothe, marakara make matirĩ marathira,
Na no atambũrũkĩtie guoko gwake nĩguo ahũũrane.
26 Nĩ ahandĩte kĩmenyithia* nĩ ũndũ wa rũrĩrĩ rwa kũraya;+
Nĩ amahuuhĩire kĩhũni nĩguo moke kuuma ituri-inĩ cia thĩ;+
Na atĩrĩ, nĩ gũka maroka mahiũhĩte mũno.+
27 Gũtirĩ o na ũmwe wao mũnogu kana akahĩngwo.
Gũtirĩ ũracũnga kana ũrĩ toro.
Mĩcibi ĩrĩa meyohete njohero ti mĩregeru,
O na ndigi ciao cia iratũ ti nduĩkangu.
28 Mĩguĩ yao yothe nĩ mĩũgĩ,
Na mota mao mothe nĩ makũnje.*
Mahũngũ ma mbarathi ciao mahaana o ta ihiga rĩũmũ,
Namo magũrũ ma ngaari ciao mahaana ta rũhuho rũnene.+
Nĩ makaararama na manyite kĩndũ gĩa kũrĩa
Na more nakĩo na kwage mũndũ wa gũkĩhonokia.
30 Mũthenya ũcio nĩ makaararamĩra kĩndũ kĩu
O ta ũrĩa iria rĩraramaga.+
Ũrĩa wothe ũkeerorera bũrũri ũcio nĩ akoona nduma ya kũmakania;
O na ũtheri nĩ ũgaatuĩka nduma nĩ ũndũ wa matu.+